Read bura-pabir H. Ha Hayeri 3 Bible Online

H. Ha Hayeri 3 - bura-pabir bible

H. Ha Hayeri 3

¹Vir laga aviri tə I akwa vəipiyirna, I ku bara kəi wutə ɓzərdakwiyirna, I ku bara kəi wutə ni ka duna, amma I aɗi wutə ni wa, I kəga ni, amma I aɗi nggatə kurakari wa.

²Antə I pəla akwa ɗəffi, “I ata thlatə kəi dlarhə kutadi, akwa nyarfayeri ka matəngndlayeri, akwa pakə ɓzərdakwiyirna akwa kəlara vəi.” I ku pakə ni, amma I aɗi wutə ni wa.

³Mjir səka ku wutə ra sakatə da akwa dlarhə kutadi, antə I yu ɗa abbər, “Giri ku wutə ɓzərdakwiyirna ya?”

⁴Ndəkər yeru raka kəga da, təng I wutə ɓzərdakwiyirna, tə I ha tsi ka kəsi ni, ka nggəlar ta psi ni ka tsa təra, tar tə I səntə ni ambwar mama'na.

⁵Maɗangkwi Urushalima, I akwa kiɗə giri, akwa thləma kimar ka mina mtakəu abbər, Usa giri aɗiya damitə yeru sakatə yeru akwa nggatə msərakur nvwadzi wa, tar ma ku mzhi yeru.

⁶Ndagə wan akwa səɓəla akwa mtakəu, na akwa thlentə bərbər apa thlatər ɗer nə ri? Tsa akwa si ka sur shiwur na msəra ta shang ka mur ka shanga jili sur shiwura ar mji na aɓəla.

⁷Azha Solaman an akwa si ata dəkələrni, maɗa giri! Ka sojayeri na mulmulari ngkwakumari natə mdə carɓəla akwa Israila ka da pwar ni.

⁸Shanga ɗa ka katsakar, masəku akwa mpa, waskəi ka katsakar ata kusarari, nuhum mpa laga asə thlata aviri.

⁹Kuthli Solaman ku namtə dəkəl wagənər takurni ni, ka udzəm tə mdə fa akwa kuɓər nfur Lebanon.

¹⁰Mdə fəi dza zwalayerari ni ka adzərfa, ka ɗahətə lapəliyari ka dinar. Mdə namtə vəi ndzəndziyari ka zhaɓi na ka yar ndləngi həng'ha. Maɗangkwiyir Urushalima ku ɗahətə dzari na avəivəi ka fwatar hirdzi, ka dəɓatə ɓɗaku laga.

¹¹Maɗangkwiyir Urushalima, səɓəla giri! Wul giri Solaman ka dzakwar daraja ar kəldzərni! Dzakwar daraja tə mama'ni hamta alari vir kəldzərni, Vir kucali arni na ola.