Read bura-pabir H. Ha Hayeri 4 Bible Online

H. Ha Hayeri 4 - bura-pabir bible

H. Ha Hayeri 4

¹Gə dakwi ka duna jiri, ɓzərngkwarna, gə dakwi ka duna, nca gə ɓɗaku apa nca bukəl, tə mda akwa wulari akira zhaɓər hartə kəra ga! Shishir kəra ga akwa kənggər ɓɗaku apa bəri kwi, na akwa səghəi akwa fəlfəla ata dzər gar Gileyad.

²Thlira gə pwak mwapu apa mbəkəl təma, tə mdə haɗa pa shishirni ka kəcimta, shanga ɗa cipcippu amta ka aghəi, wala duku aɗi na ɓəl wa.

³Kəsəm mnya gə ni ɓɗaku njau mamza, kuta mnya gə ni ɓɗak ka duna kəlara sakatə ga ata gari. Pukəma gə ni ɓɗaku apa retar yar rumman, tə mda akwa wulari akira zhaɓər hartə kəra ga.

⁴Wulya gə ni saɓəl ka ɓɗaku tə mda bara ka wula apa hən na nal ar Dauda, pərpərari apa kuɓashu ka jiktədzi. Ka gənar wulya tə mdə hatə partauwayeri dəpu ata, partauwur katsalayeri na mulmulari.

⁵U'wa gə ni ɓɗaku apa dakwi kimar suɗa, ɓɗak ka duna apa ɓuli dakwi kimar, na akwa səma akwa nca pugdlayeri.

⁶Kwabə viri a kura, sakatə kuthlə ku baɗitə wuya, I ata hwi mwari ata kəra gar tulari mur, ata kəra ɗəɗəgəl ar sur shiwur na msəra.

⁷Gə dakwi ka duna, ɓzərngkwarna, wala manjivar duku aɗi ata gə wa.

⁸Sər mwa təra kazhar Gar Lebanon, ɓzərngkwarna, sər mwa təra bu usa! Səghəi kazhar kəra Gar Amana, kazhar kəra Gar Senir ka Gar Hermon. Sər kazhar kur pela ar tsəngiyayeri ni, kazhar kur ndzəndziyir tənvwayeri.

⁹Ga ku ndəkərtə hangkali, mdər ɗəffi, mwala amaliyarna! Ga ku ndəkərtə hangkali, atar məcikər nca ga ka duku daci, atar nca gənar wulya ga duku daci.

¹⁰Hirkurər ngə ni msəra ali ka duna, mdər ɗəffi, amaliyarna! Hirkurər ngə təramta msərakur yimər anap, shiwur tulariyir ngə ku təramta msərakur yaji.

¹¹Mtilər kəsəm mnya gə msəra apa məmar pukdla, amaliyarna, məma ka uwa ana səɓəla akira kyanggyara ga. Zhaɓər nga akwa shiwur msəra apa shiwur tulari Lebanon.

¹²Mdər ɗəffi, amaliyarna, ga an fakər pukdla na akwa kadaka, fakər pukdla tə mdə hartə nyarmbwari, kucirkila na harharari ta mji.

¹³Akwa daɓwa kiɗa ga, fakər rumman aɗi, nghyinghyari ka yar nfwayeri na msəra ta shang. Gə ka yaji kəga tulariyayeri na ar henna, ka nard na msəra,

¹⁴ka nard, ka karkom, ka kalamus, ka kinnamon, ka shanga sur shiwur na msəra ar Lebanon. Tsuwa gə ka mur ka alowayeri, ka shanga jili nfur tulari na aɗi.

¹⁵Ga an kucirkilar fakə ni, jiɓə na ka yimari ɓɗaku, zərkə na thlata akwa Gar Lebanon, akwa hwi səghəi.

¹⁶Baɗitə fya, shambar yala! Asəra, shambar anəm. Fi giri akwa gadinarna ni, ka giri nghyantə kuta fakə ni ka shiwur na msəra. Ka ɓzərdakwiyirna ni si akwa gadinarni, ka tsa nggatə msərakur yar nfwari.