Read bura-pabir H. Ha Hayeri 5 Bible Online

H. Ha Hayeri 5 - bura-pabir bible

H. Ha Hayeri 5

¹I ku səkwa gadinarna ni, mdər ɗəffi, amaliyarna! I akwa tsaptə mur ka yajayeri, I akwa sa cirməma arna ka kangkangari, I akwa sa yimər anap arna ka uwa hadlu, Səm giri, ɓzərngkwa ka ɓzərdakwi, ka giri sa, har ka tsa mzhi giri.

²I akwa heni, amma ɗəffi ata wula, Psi gir thləm! Ɓzərdakwiyirna akwa tsarar nyarmbwa. Kəlar ali nyarmbwa ni bu, mdər ɗəffi, ɓzərngkwarna, bukələrna, mwala na nghyinghyari. Kamnyar kəri ku ləɓə ka kəlangkəu, tsuwa shishirna ku ləɓa aviri.

³I ku kurtə ka ntsui ləptərna, kamnyar mə tə kəi jaktə hatə nə ri? I ku kurtə ka kəcimta səli, kamnyar mə tə kəi jaktə diɓərantə ɗa ri?

⁴Ɓzərdakwiyirna ku hau tsiyari akwa gula nyarmbwa ni ka tsa kəlari, antə mamshir dzi thlatə yirr,

⁵I ku thlatə kəi kəlari aka mdər ɗəffi, tsi akwa njinjə tulari mur, kuleng tsi arna akwa hwi mal mur na msəra ta shang, sakatə I tamtə vəi kəsi nyarmbwa ni.

⁶I ku kəlari aka dakwiyirna, amma tsa ku ngka ka təra! I ku bara abbər kəi jaktə nggatə kurakari! I ku pakə ni, amma I aɗi wutə ni wa, I ku kəga, amma I aɗi nggatə kurakari wa.

⁷Mjir səka aviri ku wutə ra sakatə da akwa dlarhə kutadi. Da ku dəkə ra ka dəkəi ra. Mjir səka na ata kəra katangga ni ku thləthləhuwa shawalərna.

⁸I akwa kiɗə kəra giri, maɗangkwi Urushalima, ma giri ku wutə dakwiyirna, usa ka giri pəla alari abbər I nggawa kamnyar tə I aɗi wutə ni wa.

⁹Haba, mwala ɓɗakta shang! Apa ɓzərdakwiyir ngə ni təramta hwada ya? Man su tə tsa təramta ɗa kəgari ri, har tə ga ata kiɗə yeru?

¹⁰Ai ɓzərdakwiyirna ku mzhi vəyari, tsa ata mbəlmbəl njarnjar mamza, Mda awutə jiliyirni akwa nca mji dəpu kuma wa.

¹¹Kəmari ɓɗak ka duna apa mdə nam ka əmza, shishir kərari thlarthlarari ɓɗaku, mənggəl apa zəlaku.

¹²Ncari ɓɗaku apa bukəl ata mnya kucirkila, mwapu apa bukəl na pəra akwa uwa, na thləthlata ata mnya zərkəu ɗəmhəɗəmhari.

¹³Pukəmari an ɓɗaku laga apa bagaɗiyir yaji na ka shiwurari msəra. Kəsəm mnyari an ka shiwur msəra apa pukdlər kudla, ləɓləɓari ka tulari mur na msəra ta shang.

¹⁴Shahari an apa zwal liyar dinar na tawarwar, ka sur dəɓa ata. Dzari lələɓu apa thlira ciwar tə mdə fwavumta, ka dəɓatə ka pelayeri ar sapfiya.

¹⁵Pwakcakari an ɓɗaku, dwaɗu ka ɓəɓal apa pelar hən mbwa, natə mdə vəta ata dinar. Tsa gurjam apa gar Lebanon, tsa ka duna apa nfwayeri ar seda.

¹⁶Kuta mnyari ni msəra apa məma, shanga su na adzə ni ɓɗak ka duna. Ngəni an laku tə ɓzərdakwiyirna akwa, ngəni an laku tə gimarna akwa, maɗangkwiyir Urushalima.