Read bura-pabir H. Ha Hayeri 6 Bible Online

H. Ha Hayeri 6 - bura-pabir bible

H. Ha Hayeri 6

¹Ɓzərdakwiyir ngə ni ləmari, mwala na ɓɗakta shang? Tsa nu laku madə ri? Pəla ala yeru, ka yeru dlar nga akwa pakə ni?

²Ɓzərdakwiyirna ku təra ləghəi akwa gadinarni, vəi tə sur shiwur na msəra ana kəla akwa, ka tsa nar susəma aka mwaɓiyirni, ka nthlətsa pukdlayeri na ana nu parakər pci.

³Ɓzərdakwiyirna an arna, antə I arni. Tsa shini an ata nggatə msəra akwa nca pugdlayeri na nu parakər pci ni!

⁴Ɓzərngkwarna, gə dakwi ka duna apa Tirza, ɓɗak ka duna apa Urushalima, Darajar ngə ni akwa kənggərantə dzi, apa alamər dlamar sojayeri an akwa kənggəra.

⁵Ga aɗiya wul ra apani wa, kamnyar ɓɗakkur nca gə ni akwa kəl kəri, Shishir kəra gə ni akwa kənggər ɓɗaku apa bəri kwi, na akwa səghəi ata dzər gar Gileyad.

⁶Thlira gə pwak mwapu apa təma, natə mdə haɗa kəcimta shishirni, shanga ɗa cipcippu amta ka aghəi, wala duku aɗi na sha wa.

⁷Pukəma ga an ɓɗaku apa retar yar rumman, akira zhaɓər hartə kəra gə ni.

⁸Wala mda an wutə kuthli mwanki ngkwakumari, ka mwanki tə mdə pwi nciskumari, ka maɗangkwi hang tə mda ajikatə wa,

⁹tsu bukələrna, mwala na nghyinghyari ni, tsu tsa duku an kura mwala ali. Kamnyar tsa zum ta hwada aka mayarni tsa antə mama'ni hirhir ni ta shang, su aɗi tə mda awutə ka nggəla adzə ni wa. Kəlara sakatə maɗangkwi nvwa ɗa wutə ni da ana fwal ni ka pəla tsa mwala na ka barka. Wala mwankir kuthli kəga mwankir kəi kuthli ana hu ni.

¹⁰“Amma mwala madə ri ngəni an dakwi apa dzardzar ni, na dakwi ka duna apa thliya na tsaktsaku, ka hulang apa səla pci, ɓɗaku apa alamər sojayeri na akwa kənggər ni?”

¹¹I ku ləghəi akwa fakər nfur səma, kamnyar wul pukdlər yar nfwa na akwa mular, kamnyar wul anapayeri na ku ɗəɗa, kamnyar wul rummanayeri na ku pukdla.

¹²Kwabə I anggaɓəla hangkali ku ləkwa wagənər taku adzə kwakunarna.

¹³Ngka, ngka bu ngkwar di Shulam, ngka, ngka bu ka yeru jaktə wul nga. Kamnyar mə tə giri ata bara wul ra, sakatə I ata ɓathla akwa layi akwa nca mji ri?