Read bura-pabir H. Ha Hayeri 7 Bible Online

H. Ha Hayeri 7 - bura-pabir bible

H. Ha Hayeri 7

¹Gə ɓzərngkwa na dakwi apa mə ri, səla gə ɓɗak ka duna akwa ɓaɓi. Kiɗa ga an kəthlərər mdə na masəku ta shang, da təksətəksari ɓɗaku apa liyar dəɓa.

²Shimbura gə gwahəɗu ɓɗaku apa ɗewa, apa ka tsa nghyi ka puɓəladzi ka yimər anap na msəra tədəku! Yimər kuta gə ɓɗaku apa mdə nam ka dinar, apa bagaɗi ɗəvər alkama tə mdə kalaktə ka pukdlayeri.

³U'wa gə ɓɗaku apa dakwi mina suɗa, ɓɗak ka duna apa ɓuli mbəkəl kimar.

⁴Wulya gə saɓəl apa kəra mbwa natə mdə nam ka thlira ciwar. Nca ga akwa mbəlmbəla yilang yilang apa kufayeri na akwa Heshbon, na kudzəhə ka nyarfur Bath Rabbim. Kucira ga an sur wula ɓɗaku laga, apa hən na nal ahar Lebanon natə mdə dəɓatə ka thlira ciwar, na thləthlata amta akwa wul Damaska.

⁵Gə saɓəl ka kəra ga amta ɓɗaku apa Gar Karmel. Shishir kəra ga tə shambar akwa haptari akwa mbəlmbəla mənggəl. Ɓɗakkurərni ana ngka hangkala kəlara kuthli.

⁶Ai, gə dakwi ka duna ngkwara, ga akwa kətə hangkala mda! I hir ngə ka duna, ɓzərngkwarna, I ka kucali ata kəra ga!

⁷Gə saɓəl ka dakwi apa məna, ka uwa gə ɓɗaku apa gwandzal yarni.

⁸I ata ndlətə nfur mən ni kəi tamtə yarni ni. U'wa gə ni ndzi ali apa yar məna, shiwur mpikər ngə ni msəra apa shiwur appəl.

⁹Kəsəm mnya gə ni msəra ka duna, apa ləghəyir yimər anap akwa wulya mda.

¹⁰Ɓzərdakwiyirna, I an ar nga, hangkala ga adzə ra tədəku.

¹¹Asəra, gimarna, ka mwa ləɓəla akwa mtakəu ka mwa ra fəli akwa diyayeri.

¹²Mwa ata ləɓəla ɗəɗəpə mbing akwa fakayeri ar anap, ka mwa wutə anapayeri na ku ɗəɗa, ka wutə pukdlayeri na ku kəlardzi, ka rummanayeri na akwa bara pukdla. Anda antə I ata hamta ala gə hirdzərna.

¹³Antə ga ata nggatə shiwur pukdlayeri na ana thlentə dza mdə sal ni akwa nghyantə shanga vəi ka shiwur ni. Yar nfwa na msəra na bilənari ka natə I pwi təng ɗəm, aɗi kudzəhə ka anyarmbwar mwa. Gimarna, shanga su msəra msəra na waci ka na kulini I ku ɗəmhə ɗa ala ga.