Read bura-pabir H. Ha Hayeri 8 Bible Online

H. Ha Hayeri 8 - bura-pabir bible

H. Ha Hayeri 8

¹Ka namtə nga apa gə ɓzərma'na, natə mama'na an ya ni ka kəlanta! Antə mwa ata mzhi paktə mnya mwa ata bəbal, kula mdə rutə hangkali.

²I ata mwantə nga akwa kəyir mama'na, vəi tə ga ata thlipa ali hirdzi. I ata hamta ala gə yimər anap na lapiya ka ra sa, ka yimər yar nfur rumman arna ka ra sa.

³Ka gə hangkir tsi matsəkara ga akira kəri, ka tsi mazəma gə fəfahə ra!

⁴Maɗangkwi Urushalima, I akwa kiɗə giri, abbər, “Usa giri aɗiya damitə yeru sakatə yeru akwa nggatə msərakur nvwadzi wa, tar ma ku mzhi yeru.”

⁵Ngəni wa an akwa si nə ri, na thlata akwa mtakə ni, na bartə pathlaha ɓzərdakwiyirni ni? Akira nfur appəl antə I thlentə nga, anda antə mama' ngə ya nga.

⁶Ka gə rəbutə thləmi shira ata ɗəffa ga, apa lamba ata shaha ga, kamnyar hirkur an ka duna apa mta, tsa ka duna kamta apa kula. Afərni ndzi apa kyanggyara u'u, Kyanggyara u'u na mwavər ka duna.

⁷Shanga yimər mandayeri amzhi tsi u'ur hirkur wa, wala avava amzhi famtari wa. Wala mdə na hamta shanga gənar kutakəyirni abbər ka tsa mastə hirkur ni, təng ɗəffari an ata ɓzə daci.

⁸Ngkwarma'yeru aɗi na raka, natə u'uwari aɗi kəl katagu wa. Ma vir tə ɓzərdakwi ku sə yu ni abbər ka tsa kəl ni, man su tə ka yeru hara ri?

⁹Ma kərathlari ndzi patərathlu apa banggwa yeru ata həndza alari uwa ol'ola ka adzərfa! Ma tsa aɗi ka uwa hwatu wa, yeru ata dzəkatə ni avəi ka katako ar seda.

¹⁰I, sakanda kərathli patərathlu apa banggwa, amma kulini I ka zəmbəng apa gunda gadina. Kulini I ku ndzi ɓzərngkwa aka ɓzərdakwiyirna, antə kulini I ku namtə ɗəffari msəra alari.

¹¹Solaman ka fakər anap ahar Baal Hamon, tə tsa hamta hayari aka mji. Kəlara pal akwa nca ɗa ata səntə liyar adzərfa dəpu pal, akwa kuta watsəɓər yar nfur fakə ni.

¹²Amma fakər anap ni arna I shira, Solaman, ga ata mzhi kəsi liyar adzərfar ngə na dəpu pal ni, mjir kəthlər fakə ni kəsi aru suɗa.

¹³Ga antə I hirhira akwa fakə ni, pazhayeri arna akwa bara ka da nggatə kuraka ga, ndzi kəi nggatə kuraka gə bu tsuwa.

¹⁴Mwa taktar kara si, gimarna, ka gə ndzi ɓəɓatu apa kimar, wala apa dakwi jikəl, na ata kəra garayeri na ka sur shiwur na msəra.