Read bura-pabir Ishaya 1 Bible Online

Ishaya 1 - bura-pabir bible

Ishaya 1

¹Su na akwa kakaɗə ngəni an labar na ata kəra Yahuda ka Urushalima, natə Hyel ncaɓəla aka Ishaya na ɓzər Amoz akwa sakatə Uzziya, ka Yothlam, ka Ahaz, ka Hezekiya akwa hara kuthlikur akwa Yahuda akwa sakayeri zumzum.

²MTHLAKU pəla, “Psi gir thləma giri, duniya ka vəi na amtazi! Maɗangkyar natə I an kəlanta amma da akwa haptə hangkali.

³Ai wala thla asəndə mthlakərni, kwara ma ana səndə vəi tə mthlakərni ana nar susəma ata, amma aɗi ka mjirna Israila wa, da aɗi ana nggaɓəla su hun wa.”

⁴Sha ku wutə giri, giri tsəɗi na ka biku, mji na kəmanggar ka dlərpu! Giri ku nggəlar MTHLAKU ka rutəmta Hyel na Ɓɗakkarkara ar Israila, ka shinadzə bwahili alari.

⁵Kamnyar mə tə giri akwa ləkəma ka hara kər ɓəɓalkur ri? Giri akwa bara ka mdə jaktə dlaɓu giri ya? Ai Israila, shanga kəra ga ka mbəlkər dlaɓwa, har apa ka ɗəffa gə ləɓəla.

⁶Baɗita akwa kəra ga ka ləghəi akwa səla ga vəi aɗi na lapiyari ata dza gə wa. Dza gə shang, ku thlatə dlət'dlətu ka mbəlkəu, akwa hwi mamshi. Tsuwa mda aɗi kəcimta ɗa ka mbwi ɗa wa, wala fadza ala ɗa mal wa.

⁷Mdə ku ɓdləmta tsəɗiyir giri, ka mbagamta diyayeri ar giri. Ata nca giri antə durayeri damwa ana dlutsə tsəɗiyir giri, ka shamta shanga su tə da ku wuta.

⁸Urushalima ku ndzi shini kula mda akwa apa mbwar səka akwa fakər anap, apa səva aghəla tə mdə ku fəi sur faku. Tsa ku ndzi apa tsəɗi tə sojayeri ku kalakta, su aɗi tə tsa amzhi harari wa.

⁹Ma MTHLAKU na ka Duna ta Shang an ka mbilar mji ka mpikə wala raka wa, sakani Urushalima ata ndzi kula mda apa Sodom ka Gomora.

¹⁰Ngga gir su tə MTHLAKU akwa pəlari, giri na ndzi apa mjir Sodom, psi gir thləm aka tsawur MTHLAKU na Hyel, giri na ndzi apa mjir Gomora,

¹¹MTHLAKU akwa pəla, “Saɗaka mbamba ar giri akwa mbik kuti, saɗakar gamayeri kəga malkumər mwaɓi mtakə na ku ndli ni, ku mzhi ra apani. I aɗi akwa bara wutə mamshir gyalayeri wala ar gamayeri wala na ar nciwayeri wa.

¹²Kamnyar mə tə giri akwa kadlər ntsəntsartə bəbalər mbwar vəngkər səli ali ka saɗakayeri na kula ampani ri?

¹³Giri aɗiya jaktə səntə saɗakayeri wa, shiwurər ɗa akwa kəl kəri ka duna. Ya nggitə wul kucalər giri ar Thliya Bilən, wala ar Vir Ghərəmtaghəra, ka sakayeri damwa na ar tsaptədzər vəngkər səli wa. Giri ku ɓzamtə ɗa ka bikayeri ar giri shang.

¹⁴I aɗi akwa bara Kucalər Thliya Bilən ar giri, wala sakayeri damwa na ar kucali wa. Da ndzi ali apa kəla natə I ku ghər ka kəlari.

¹⁵Wala ma sakatə giri ku haptə tsiya giri amta akwa sakar adduwa I aɗi ata wul giri wa. Wala giri an hara adduwa apa madə ri, I aɗi ata ngga giri wa, kamnyar tsiya giri ka mamshi.

¹⁶Kəcimta giri kər giri ɓɗaku. Zhar giri hara suayeri na ɗimi ɗimi tə I akwa wulari ni. Zhar giri hara ɗimikur

¹⁷ka giri hara su na ɓɗaku. Ka giri wuta abbər mdə ku hara jirkur, ka dlar mji na akwa ɗar bwani, ka mbuli maɗa' muta ka kughungayeri.”

¹⁸MTHLAKU akwa pəla abbər, “Səra, ka mburu ɗəmhə gari ni. Giri ku tatədzi ka biku ka ndzi mamza pitu, amma I ata kəcimta giri ka giri ndzi mwapu apa mpur puwa. Wala ma bikər giri ku hara mamza apa msha, giri ata ngka mwapu apa shishir təma.

¹⁹Ma giri ata hirari ka kələngkər ali, giri ata wutə susəma hang akwa tsəɗi ni ka giri səma.

²⁰Amma ma giri ku nggəlari ka hara mulmulkur, dawayeri ar giri ata tsi giri. I na MTHLAKU an pəla.”

²¹Aiyi! Urushalima na ka jirkur waci ku ndzi apa mwala na karwa kulini. Waci mjirni ana hara su na kalkal ka jirkur, amma kulini tar mjir tsi mda an mbila.

²²Urushalima, sakanda ga apa adzərfa, amma kulini kəthlərər nga aɗi wa. Sakanda gə msəra apa yimər anap, amma kulini təng gə yimi daci.

²³Mji ol'olər nga ku ndzi mjir thlentə hangkal, həlayeri an pazhir ɗa. Kuthlyayeri ar nga hir dlu sur dzəɓ mnya, da aɗi ana mbuli mutayeri ka kughungayeri akəma shariya wa.

²⁴Apani MTHLAKU ar mji dlama dlama, Hyelər Israila na ka Duna ta Shang, akwa pəla, “I ata pumta ɗəffi ata giri na dawayeri arna.

²⁵I ata ɗi giri ka mbaɓəla shanga diɗayeri na namtə giri ɗimi akwa dza giri, na ngkatə giri ta vəngkər səli ali ni.

²⁶Aghəla nda I ata sə jaktə hamta ala giri mjir pwara ka mjir sauri apatə giri kəgari hwatu. Antə mda ata sə kəga Urushalima abbər Bərni na ka Ɓɗakkur ka Jirkur.”

²⁷Kamnyar MTHLAKU ana hara su na kalkal ka jirkur, tsa ata sə msərantə mji na ku tubi akwa Urushalima.

²⁸Amma tsa ata sə kurəmta mjir biku ka mjir thlentə hangkal ata kəma duku. Tsa ata kurəmta shanga mji na ku fwari ata kərari.

²⁹Ata sə ndzi sur səli ala giri kəlara sakatə giri ɗangta abbər giri ku ɗar vəngkər səli aka nfwayeri ka mələmayeri.

³⁰Giri ata sə ndzi apa nfur ok akwa tətəɓwa, apa gadina na kula mdər hamta alari yimi.

³¹Tsu apatə u'ur ashana ana mbamta kusar tuktukku, apani tsuwa antə ɗimikur ar mjir giri na ka duna ata sə shamta ɗa, mdər mzhi ngkatari aɗi wa.