Read bura-pabir Ishaya 10 Bible Online

Ishaya 10 - bura-pabir bible

Ishaya 10

¹Sha ku wutə giri, giri na ana ɗəmhə tsawayeri na ɗimi kamnyar nar bwani aka mji!

²Giri ana ngkatə ta mda ahara ɓɗakkur ka su na kalkal aka mjir tursu. Akwa laku ngəni antə giri ana dlutsə sur kughungayeri kəga mutayeri.

³Man su tə giri ata sə harari vir tə Hyel ku thlentə durayeri damwa na ciju ka da sə ɗi giri ka asar ri? Ama antə giri ata sə hwi kara bara dlar ri? Tsuwa ama antə giri ata sə ra ɗuwar gənar giri ri?

⁴Mda ata kurəmta giri, wala fatə giri apa pərsənayeri ar mpa. Amma ba kulini ɗəffa MTHLAKU aɗi ata pwi wa, tsa ata ləkəma ka ɗi giri.

⁵MTHLAKU ku pəla, “I ata namtə Assiriya apa tsa zwalərna kamnyar ɗi mji na ku ɓzamtə ɗəffi.

⁶I ata thlentə Assiriya ka tsa ra dlər tsəɗi na kula thlivər Hyel, mji na ku ɓzamtə ɗəffi. Tsa ata famnya sur ɗa, ka dlutsə sur ɗa, ka ntsəntsarəmta ɗa apa maɓu na akwa laku.”

⁷Amma kuthlir Assiriya aɗi ata sənda abbər I an thlentə ni wa. Arni tsa kəta abbər tsa ka kərari an akwa dlər mjirna, aghəla nda ka tsa shamta tsəɗiyayeri damwa hang.

⁸Tsa ata gaya abbər, “Ai kulikulini shanga mjirna na ol'ola ata kəra sojayeri ata ndzi kuthlyayeri!

⁹Yeru ata shamta Kalno tsu apatə yeru shamta Karkemish, ka dlərəmta Hamath tsu apatə yeru hara ka Arpad. Yeru ata kurəmta mjir Samariya tsu apatə yeru kuri ka mjir Damaska.

¹⁰I ku ɗi kuthlikurayeri na ana nu haptu, natə haptayeri arɗa ka duna ta haptayeri na akwa Urushalima ka Samariya.

¹¹Antə ma I ku shamta Samariya ka shanga haptayeri arni, I ata shamta Urushalima tsuwa ka haptayeri arni.”

¹²MTHLAKU akwa pəla, “Aghəla tə I ku kuri su tə I bara kəi hara ka Urushalima, I ata shinardzi ata kəra kuthlir Assiriya kəi ɗi ni kamnyar gaya ka kər olkur tə tsa hara.”

¹³Kamnyar kuthlir Assiriya ni pəla, “Atar dunar ɗəvərna ka ɗəɗukurərna antə I ku səm mpa nayeri ni. Atar duni ka mwavərkurərna na apa gyal antə I ku kurəmta kuthlyayeri, ka dlutsə tsəɗiyir ɗa, ka famnya gənar ɗa.

¹⁴Tsəɗiyayeri na akwa duniya ku ndzi apa mbwar ɗika, antə I ku tsaptə gənar ɗa kasəla apatə mda ana fatə thlithlyayeri natə ɗika ku hwi kazhari. Wala ɓəɓəku duku aɗi na haptədzi abbər ka tsa thlivərantə ra wa, wala ɗika laga na ku haɓəla mnyari ka tuwa wa.”

¹⁵Amma MTHLAKU pəla, “Kəma ata mzhi gaya abbər tsa ka duna təramta mdər kəthlər ka tsa ya? Nənga zartau ata mzhi pəla abbər tsa təramta mdər kəthlər ka tsa ri? Ai zwal wala purpu amzhi haptə mthlakərni ka gyali kəgari wa, tar mda an ata mzhari.”

¹⁶Apani MTHLAKU na ka Duna ta Shang ata thlentə shilku na ɗimi ka tsa ngkəi sojayeri na ka duna. Antə dza ɗa ata kətə ɗa apa u'u an akwa mba ɗa.

¹⁷Hyel natə tsa an parakər mjir Israila ata sə ndzi u'u. Hyelər mjir Israila na ɓɗakkarkara ata sə ndzi apa kyanggyara u'u. Tsa ata mbamta mjir Assiriya akwa kuta vir duku apa su tə u'ur mtakəu ana hara aka thlali ka mtəhəra.

¹⁸MTHLAKU ata mbamta kuɓər nfwayeri ka ɓzamtə fakayeri na ɓɗakɓɗaku. Da ata higəlantədzi apatə shilku na ɗimi ana thlarəmta mji.

¹⁹Nfwayeri na namtə kuɓər nfu ni ata sə mbiləmta yiɗauwa daci, tə wala ɓzəngkyar ata sə jikatə ɗa.

²⁰Aghəla nda antə mjir Israila, watau kəkayeri ar Yakub na mbil ka mpika aɗi ata sə jaktə və kər ka tsəɗiyayeri na shamta ɗa kəra wa. Da ata mbərsa sə ka dunar MTHLAKU na Hyelər Israila na ɓɗakkarkara.

²¹Mjir Israila na mbil yiɗauwa ata sə ngka adzə Hyelər ɗa na ka Duna ta Shang.

²²Kamnyar wala tə kulini mjir Israila hang apa wuyakər mnya manda, mji yiɗauwa daci an ata sə ngka ata saka nda. MTHLAKU ku kurtə ɗəmhə ka wuta abbər kalkal ka mji sə kurəmta mjirni Israila.

²³Jiri, MTHLAKU na ka Duna ta Shang ku ɗəmha abbər tsa ata sə shamta shanga mjir tsəɗi ni.

²⁴MTHLAKU na ka Duna ta Shang akwa pəla aka mjirni na akwa Urushalima abbər wala tə mjir Assiriya akwa bwani ala ɗa apa su tə mjir Masar hara ni, da aɗiya thlivər ɗa wa.

²⁵Kamnyar aɗi ata fəi wa ɗəffi na bwarbwar ata kəra giri ni ata pwi, antə I ata shinardzi ata kəra ɗa kəi shamta ɗa.

²⁶Antə I na MTHLAKU na ka Duna ta Shang, I surna an ata ɓu ɗa tsu apatə I ɓu mjir Midiyan akwa pelar Oreb. Ka zwal tə I ɗi mjir Masar antə I ata ɗi mjir Assiriya.

²⁷Ata saka nda I ata sə kəli ghəra ata wulya giri, ka msərantə giri ta bwaniyir mjir Assiriya.

²⁸Sojayeri ar Assiriya ku si ahar Aiyath, da si atar Migron. Da akwa pwi kariyir ɗa ahar Mikmash.

²⁹Da ku təramta vəi pəra, antə tahaku nda da ata fəli akwa Geba. Vir nda thlivəra ku ngkəi mjir Rama, tə mji na akwa Gibeya na diyir Shawulu ku hwi.

³⁰Haptə gir kuraku, giri na mjir Gallim! Psi gir thləm, giri na mjir Layisha! Amsa giri, giri na mjir Anathloth!

³¹Mjir Madmena ka Gebim akwa hwi kamnyar msərantə mpika ɗa.

³²Ashina dawayeri ni ata fəli ahar Nob, ka kənggərtə matəkuma ɗa kamnyar thlivərantə Gar Sihiyona na akwa Urushalima.

³³Amma MTHLAKU na ka Duna ta Shang ata tadərəmta ɗa ka duna apatə mda ana tadərəmta nfwa. Tsa ata shamta mji na ol'ola ka mjir hirkər na akwa nca ɗa.

³⁴MTHLAKU ata tadərwa dawayeri arni ka ada apatə mda ana tadərəmta nfwayeri na ol'ola akwa mtakər Lebanon ka da ndla.