Read bura-pabir Ishaya 11 Bible Online

Ishaya 11 - bura-pabir bible

Ishaya 11

¹Nyarmbwar kuthlikur ar Dauda ndzi apa gwagwa. Antə apatə gwagwa ana jaktə ɗəɗa bilən, antə kuthli bilən ata sə səɓəla akwa nyarmbwar Dauda.

²MTHLAKU ata nar dunar ɗəɗukur, ka hamta alari səndə ka masəkukur mwa ka mjirni. Tsa ata hamta alari dunar hamta sauri na ɓɗaku, antə tsa ata nggaɓəla su tə MTHLAKU akwa barari ka nar səli.

³Tsa ata nggatə msərakur kələngkər aka MTHLAKU. Tsa aɗi ata huvə thlamta shariya ata kəra su tə ncari aɗi wutə wa, wala ata kəra su tə thləmari nggatə daci wa.

⁴Ata vəyari, tsa ata hara shariya ka jirkur aka mjir tursu, ka ɗəmhə su na kalkal aka mji na ka kanaɗikur. Tsa ata hamta tsawa kamnyar ɗi mji, ka kurəmta mji na ɗimi ɗimi.

⁵Tsa ata hara kuthlikurərni kalkal ka jirkur.

⁶Kilamtakayeri ka maɗa' təma ata sə ndzəndzi ata vəi duku akwa msərakur, tənvwayeri kəga maɗa' kwi ata sə pəpəi ata vəi duku. Kənayeri kəga maɗa' tsəngi ata sə səm susəma ata vəi duku, antə maɗangkyar an ata pwar ɗa.

⁷Thlayeri ka tənvwayeri ata sə səm susəma ata vəi duku, ka maɗa' ɗa ata pəpəi ata vəi duku akwa msərakur. Tsəngi ata ɓɗə kusar apatə thla ana hara.

⁸Wala ɓzəngkyar ata sə gyali adzə pwapu, tsa ata vu tsiyari akwa kur fufukər kula dəkəidzi.

⁹Su aɗi na ata dəkəi mda wala tsi mda akwa shanga garayeri ar haptə thləmi wa. Antə apatə yimi ana nghyantə manda antə tsəɗi ni ata nghyi ka mji na asəndə MTHLAKU.

¹⁰Saka ata sə si tə kuthli na bilən akwa nyarmbwar Kuthli Dauda ata sə ndzi seɗar wutə mbantədzi aka shanga mjir duniya. Da ata sə tsaptədzi adzə ni, antə thləma tsəɗiyirni ata sə tuwa.

¹¹Vir nda MTHLAKU ata sə jaktə kətadzə mjirni na mbila akwa tsəɗiyayeri ka ngka ka da avəi, ngka na suɗkur. Tsa ata fatə mjirni na ku mbila ka mpika akwa Assiriya, ka Masar, ka Pathros, ka Ithliyopiya, ka Elam, ka Shinar, ka Hamath, ka diyayeri na ciju ata mnya yimi, ka ngka ka da akwa Israila.

¹²Tsa ata sə haptə seɗa laga na ata ncanta aka tsəɗiyayeri abbər tsa akwa tsaptə mjirni na titil kazhar Israila ka Yahuda ka mwari bamama akwa kuɗəmayeri na nfwar ar duniya.

¹³Aghəla nda Israila aɗi ata sə jaktə səlkər Yahuda kəra wa, antə Yahuda aɗi ata ndzi dawar Israila wa.

¹⁴Ata vəyari, da ata paktə sojayeri arɗa ka dlər mjir Filistiya na akwa ramta. Tsuwa da ata dlər mji na akwa raghəi ka famnya sur ɗa. Da ata dlər mjir Edom ka mjir Mowab ka nggyari ɗa, antə mjir Ammon ata ndzi akira ɗa.

¹⁵Apani MTHLAKU ata shiwantə tsiya Manda Masar. Tsa ata səntə shambar na mwavər ata kəra Thlyagha Yufiretis ka ndəkəu ni ka bwa murfa, har ka mdə mzhi fəlɓəlari kasəla.

¹⁶Tsuwa lambata na ola ata sə səɓəla akwa Assiriya kamnyar mjir Israila na mbila anda, tsu apatə ku wutədzi aka kəkayeri arɗa sakatə da akwa səɓəla kazhar Masar.