Read bura-pabir Ishaya 13 Bible Online

Ishaya 13 - bura-pabir bible

Ishaya 13

¹Ngəni andər na ata kəra Babila natə Ishaya na ɓzər Amos ku dluwa akəla Hyel.

²Ka giri hapta alam ar mpa ata kəra gar na kula su ata. Ka giri haptə kuraku ka pəla ka tsiya giri aka sojayeri abbər ka da baɗitə dlər Babila diyir mji ol'ola.

³I na MTHLAKU surna an ku kəgaɓəla sojayeri arna na carcarari, ka na ka duna ka da mpa ata vəyi ka ɗi ali mji na ku ɓzamtə ɗəffi.

⁴Ngga giri kuraku ata gar, kuraka dlamar mji, kuraka tsəɗiyayeri kəga kuthlikurayeri na akwa tsaptədzi. MTHLAKU na ka Duna ta Shang akwa tsaptə ɗa azi kamnyar ɗəmhədzər mpa.

⁵Da thlata akwa diyayeri na ciju, akwa datər duniya. Da an kari mpar MTHLAKU na ata ncaɓəla ɗəffə bwarbwarkurərni. Antə da ata ɓdləmta tsəɗi ni karkar.

⁶Ka giri tuwa ka kuraku diya, kamnyar saka natə MTHLAKU ata sənta asar ni ku si kudzəha.

⁷Antə apani tsiya mji shang ata kədza kamnyar thlivəra, tə wala mji na ka ɗəffər salkur hyala ɗa ata nthlə ɗa.

⁸Shanga ɗa ata sə thlivəra har ka dza ɗa kətə ɗa, apa kətər mwala akwa kutərya. Da ata sə wul nvwa ɗa ka ncar thlivəra, ka səli akwa nca ɗa.

⁹Virər MTHLAKU akwa si, vir tə tsa ata sə ncantə ɗəffə bwarbwarkurərni na mwavər apa u'u. Duniya ata sə ndzi apa mtakəu kula mda, kamnyar tə mda ata sə shamta shanga mjir biku na akwa.

¹⁰Vir nda kəlara sasəlka ka mambəlkulci ata sə zhar mbəla. Pci ata sə shin ka kuthlu tsu ata balti, tsuwa thliya aɗi ata hamta parakərni wa.

¹¹MTHLAKU pəla, “I ata sənta asar ata kəra duniya ka ɗi mji na kəmanggar kamnyar bikər ɗa. I ata kəli səli kəlara mdə na hirkərni, ka ɗi kəlara mdə na ɗimi kula hangkal.

¹²Ata sə ndzi mwavər ka mdə wutə mji na ata mbila ka mpika apatə ana ndzi mwavər ka mdə wutə dinar. Wutər mda ata sə ndzi mwavər apa wutər dinar ar Ofir.

¹³Vir nda I ata vu ka vəi na amtazi kənggərantədzi, tə duniya ata kənggər ka təri kazhar vəi ndzəndziyirni. Kamnyar vir nda antə I ata ncantə ɗəffə bwarbwarkurərna.”

¹⁴“Shanga mətəpiyayeri na akwa Babila ata sə titila ka hwi apa kimarayeri na msəra akwa tsiya muzəmaku ka ngka akwa tsəɗiyir ɗa, apa təmayeri na akwa kadlə kula mdər ɓəla.

¹⁵Kəlara mdə natə mdə ku wutə ka ngkəi ni, mda ata ntsəvəmta ni ka katsakar ka tsi ni.

¹⁶Ata nca ɗa antə mda ata dlaɓumta kustayeri arɗa ka da mta. Mda ata famnya shanga su na akwa kəyayeri arɗa, ka ngka mwankir ɗa ka pi ka da.

¹⁷I ata thlentə hangkala mjir Medes natə hangkur kwaba aɗi ata mzhi masɓəla hangkala ɗa wa, ka da dlər mjir Babila.

¹⁸Sojayeri ni ata shi maɗadakwiyir ɗa ka afa ka kurəmta ɗa. Da aɗi ata kətadzə maɗangkyar na ata hili wa, zhar ka maɗangkyar na ku tərtədzi wa.

¹⁹Babila an ɓɗakta shang akwa shanga kuthlikurayeri, tsa an afər gaya ar shanga mjir Babila. Amma I ata ɓdləmta Babila tsu apatə I ɓdləmta Sodom ka Gomora.

²⁰Mda aɗi na ata jaktə ndzi anda kəra wa. Wala mjir kadla apa mjir Arab ma, aɗi na ata jaktə latə mbwar ɗa anda wa, zhar ka mdər ɓəla an ata hir ka thlarni jaktə ghərəmtaghəra anda ya?

²¹Tsa ata sə ndzi vəi natə tar mwaɓi mtakəu an ata ndzi anda, vəi tə nghyinghyayeri ata la mbwar ɗa. Zhimnakayeri ata ndzi anda, tsuwa kwi mtakəu ata sə fəlfəla anda.

²²Su tə mda ata nggata akwa mbwayeri na nal nal na ka kəyayeri na ka duna an kuraka mwaɓəlu ka kilamtaku. Sakar mtər Babila ku hara kudzəha! Tsa aɗi ata fəi kəra wa.”