Read bura-pabir Ishaya 14 Bible Online

Ishaya 14 - bura-pabir bible

Ishaya 14

¹MTHLAKU ata sə jaktə kətadzə kəkayeri ar Yakub. Tsa ata jaktə fəfahə mjir Israila ka hir ɗa ka damwa. Tsa ata jaktə ngka ka da akwa tsəɗiyir ɗa. Antə durayeri damwa ata sə səkwa nca ɗa ka paktə kər kəga da ka ndzi mji duku.

²Mjir tsəɗiyayeri hang ata sə pwar mjir Israila ka da ngka akwa tsəɗi natə MTHLAKU hamta ala ɗa. Da ata hara kəthlər aka mjir Israila apa mafayeri. Mjir Israila ata sə ngkəi mji na ɗar bwani ala ɗa akwa saka na təramta ni, ka hara kuthlikur ata kəra ɗa.

³MTHLAKU ata sə msərantə mjir Israila akwa ɗəffə ɓzəɓza, ka akwa bwani, ka kəthlər mafakur.

⁴Ma sakatə tsa ku hara ngəni antə giri ata sə kumshi kuthlir Babila ka pəla, Nggədza tsikəra kəmanggar ni ja! Ɗimikurərni ni ku kura ashina!

⁵MTHLAKU ku tsi dunar kuthlyayeri na kəmanggar, ka thləthlatə ka kuthlikurər ɗa.

⁶Da an kuthlyayeri natə parang da akwa dlaɓu mdə ka ɗəffu, ka nar bwani tədəku aka tsəɗiyayeri na akira ɗa.

⁷Amma nggədza ashina tsəɗi ni akwa msərakur kula mtirmnya, tə kəlara mda akwa hara ha kamnyar kucali.

⁸Wala nfwayeri na ɓɗakɓɗaku ar mənta ka seda na ahar Lebanon akwa hara kucali kamnyar tə mdə ku ɓəli kuthli ni. Antə kulini mdər jaktə pəla ka mdə ra nthlə ɗa aɗi kəra wa.

⁹Mjir mambəl na aghəyazi akwa ɗəmhədzi ka kucali kamnyar dlu nga, kuthlir Babila. Mambələr kuthlyayeri kəga mji na ol'ola na mtə waci akwa thlata akwa dəkəlayeri arɗa ka kucali kamnyar dlu nga.

¹⁰Shanga ɗa akwa kəga ka pəla ala ga abbər, “Kulini dza ga ku mti antə ga ku ndzi tsu apa yeru!

¹¹Olkur natə gə kəgari ka surtsa na msəra tə mda ana hara ala gə sakanda ku kuri kulini. Kamnyar kulini ga ku səghəi akwa duniyar mjir mambəla, antə ga ata pəpəi ata kəra hwandashu. Tsuwa kulamnya an ata hartə dza ga.”

¹²“Kuthlir Babila, ga an dzardzar na ku təri akwa duniya. Akwa saka na təramta ga ku nggyari tsəɗiyayeri, amma kulini mdə ku psəghəi nga akwa duniya.

¹³Ga ku pəla akwa ɗəffa ga abbər ga ata ləmta ahar hyel, ka vəi dəkəl kuthlikurər nga amta sasəlkayeri na miu. Gə tamata abbər ga ata hara kuthlikur ata kəra garər haptayeri na ciju abwar anəm.

¹⁴Gə pəla abbər ga ata lətə kəra dlambayeri ka ndzi tsu apa Hyel na ka Duna ta Shang.

¹⁵Amma ata vəya ndaga, mdə ku səntə nga aghəyazi akwa duniyar mji mtəmta na zurang ta shang.

¹⁶Mji mtəmta ata wul nga ka mnya ɗa kəlar kəlarari ka ndatədzi. Da akwa pəla, ‘Aɗi ngəni an mdə na kənggərtə duniya ka kədzantə kuthlikurayeri ni pwa?

¹⁷Aɗi an mdə na huzatə duniya ka namtə ni kula mda apa mtakə ni pwa? Aɗi tsa an nggəlar ta msərantə pərsənayeri ka da ləhə ni pwa?’ ”

¹⁸“Shanga kuthlyayeri ar duniya ku pəpəi ka olkurər ɗa akwa kulayeri na dəɓadəɓari,

¹⁹amma ar nga, mdə ku psəmta mshiyir nga ciju kazhar vəi kulər nga ka tsa hiɗa aɓəla. Mda ata tsaɓəngkər ala gə mshiyir mji na mta akwa mpa tə mdə harəmta akwa ku ni. Antə da ata ntsəntsartə nga akira səla ɗa.

²⁰Mda aɗi ata harəmta nga apa kuthlyayeri damwa wa, kamnyar ar nga ga ku hilantə tsəɗiyir nga ka kurəmta mjir nga. Tsuwa mda aɗi ata mbila ka mpikə wala pal akwa nca mjir kutakəyir nga na ɗimi ni wa.

²¹Ka mdə baɗitə kurəmta maɗashilərni tsu tə vəi ɗəm! Mda ata kurəmta ɗa kamnyar bikər kəkayeri arɗa na waci. Mda aɗiya zhar ka maɗa'ni sə thlatə ka hara kuthlikur akwa duniya wa, wala jaktə latə bərniyayeri ka nghyantə duniya ni wa.”

²²MTHLAKU na ka Duna ta Shang akwa pəla, “I ata ɓdləmta Babila ka shamta ni karkar, tə wala ɓzəngkyar duku aɗi na ata mbil alari ka mpikə wa. Wala kəka duku I aɗi ata zhari alari ka mdə sə ɗangtə ni ata wa.

²³I ata namtə Babila ka tsa ndzi vəi ndzəndziyir hwisayeri, ka kufayeri. I ata tsarəmta Babila ka shimtər asar. I na MTHLAKU na ka Duna ta Shang an pəla su ngəni.”

²⁴MTHLAKU na ka Duna ta Shang ku kətə alkawal abbər, “Su tə I ku ɗəmhə tsa ata hara. Su tə I ku vu akwa ɗəffi abbər I ata harari sur ngkatari aɗi wa.

²⁵I ata titiləmta mjir Assiriya na akwa Israila, kəi dlidlyaɓəmta ɗa ata garayeri arna. I ata msərantə mjirna na akwa ɗar bwani akwa tsiya mjir Assiriya, kəi ndəkəmta ɗa ka kəthlər mafakur tə da ana hara.

²⁶Ngəni an su tə I ɗəmhə kamnyar shanga duniya, kamnyar I ka duna ata kəra shanga duniya.”

²⁷MTHLAKU na ka Duna ta Shang ku ɗəmhədzər hara su ngəni, antə sur ngkamtari aɗi wa. Ma tsa ku pəla tsa ata hara su, wa an ata mzhi pəla alari ka tsa zhari ri?

²⁸MTHLAKU ku pəla ali ndər ngəni akwa məva tə Kuthli Ahaz mta.

²⁹Mjir Filistiya, giri aɗiya kumshi kamnyar tə kuthli na ana na giri bwani ni ku mtə wa. Kamnyar wala tə zwalərni ni ku ɓəli, ɓzərni ata hara su na ɗimi ta tsa. Kamnyar pwapu ndaga ata yaɓəla pwapu na ata fəlfəla ka gwarərni mwavər, antə tsa ata kurəmta giri.

³⁰MTHLAKU ata vu ka mji na turturari wutə susəma, ka lapiyakur. Amma tsa ata thlentə mi na mwavər aka mjir Filistiya, ka kurəmta mambila ɗa.

³¹Tuwa giri ka kuraku, giri na bərniyayeri ar Filistiya, kamnyar sha ku wutə giri! Ka giri yakata, shanga giri! Kamnyar sojayeri na mulmulari ku thlata akwa bwar yala akwa si, ka bərbər ata dəlpa ɗa apa dlamba. Mda aɗiya akwa nca ɗa wala pal na ana thlivər su wa.

³²Man tə ka mburu pəla aka mjir thlentə na ku thlata ahar Filistiya ri? Mburu ata pəla ala ɗa abbər MTHLAKU ku latə Urushalima, antə mjirni na ku ɗar bwani ata ndzəndzi lapiya anda.