Read bura-pabir Ishaya 15 Bible Online

Ishaya 15 - bura-pabir bible

Ishaya 15

¹Ngəni an labar na ata kəra Mowab Mdə ku shamta bərniyayeri ar Ar ka Kir akwa vir pal, antə su aɗi akwa tsəɗi Mowab kəra wa.

²Mjir Dibon ku ləmta akwa mashiɗayeri arɗa akwa jaɓ tuwa. Mjir Mowab akwa tuwa ka ɗəffu kamnyar bərniyayeri ar Nebo ka Medeba. Da ku shimta kəra ɗa ka kumiya ɗa kamnyar ɗəffə ɓzəɓza.

³Da hatə dasa, akwa mwa akwa kutadi. Mji akwa jaɓ tuwa ka dlar shimwi akwa kəlara kəi ka kəlara vəi tə mji tsaptədzi ata.

⁴Mda akwa nggatə tuwar mjir Heshbon ka Eleyale ba ahar Yahaz. Wala sojayeri ar Mowab na katsala akwa tuwa ka kuraku ka duna kamnyar su ni ku nthlə hyala ɗa.

⁵Mowab akwa kətadzə ra. Mjirni akwa hwi mwari ahar Zowar ka Eglath Shelishiyah. Mji laga akwa ndləɓəla ahar Luhith ka tuwa, bwadukwa mji tsuwa akwa hwi lahar Horonayim akwa tuwa asar.

⁶Zərkər Nimrim ku uli, tə kusar na ata mnyari ku tətəɓwi, su aɗi anda ka thlaliyari mirakəu kəra wa.

⁷Apani mjir Mowab ku fatə kari tə da wuta akwa ndzəndziyir ɗa, natə da amzhi kətari, ka ləɓəla akwa Mular nfur Popla ka hwi təra.

⁸Kamnyar har mda akwa nggatə tuwa ni akwa diyayeri na ciju ata kəla tsəɗi Mowab. Mda akwa nggatari ba ahar Eglayim ka Beyerelim.

⁹Nggədza tsuwa mamshi ku hilantə yimi na ahar Dibon tə tsa ku ndzi mamza pitu. Amma ba kulini da aɗi wutə su na mwavər katagu wa, kamnyar su na ɗimi ta ngəni tsu akwa si. Kamnyar tsəngi ata kurəmta mji na ku msər kazhar Mowab, ka mji na mbiləmta akwa Mowab ka mpika.