Read bura-pabir Ishaya 16 Bible Online

Ishaya 16 - bura-pabir bible

Ishaya 16

¹Mjir Mowab na ku msər ta mta akwa tsəɗiyir ɗa ka ndzəndzi ahar Sela, ku thlentə cautər təma aka kuthlir Urushalima.

²Mwankir Mowab ku ndzi kula kəi apa ɗika tə mdə kədləɓəla kazhar mbwar ɗa, tə da ləkwa kadla ahar hyel ata kəra Thlyagha Arnon.

³Da pəla ka kuraku aka mjir Yahuda abbər, “Usa, pəla giri ala yeru su tə ka yeru hara. Ndzi giri ala yeru apa nfu na ana hamta shanggurərni mtathlaku akwa sakatə pci gərgər təpkər. Yeru akwa hwi dawar yeru, antə usa, ɗuwar giri yeru.

⁴Zhar giri yeru, yeru tə mdə kədləmta yeru ni ka yeru ndzi akwa tsəɗiyir giri. Ɓəlatə gir yeru ta mjir bara kurəmta yeru ni.” Ma sakatə mjir Mowab na kəmanggar ni ku təra, tə da aɗi ata jaktə dlər yeru kəra wa,

⁵Antə pal akwa nca kəkayeri ar Kuthli Dauda ata sə ndzi kuthli. Tsuwa tsa ata hara kuthlikur ka hirkur ka jirkur ba saka madi. Tsa ata hara su na kalkal ka wuta abbər shang mji ku wutə su tə kalkal ka da wutə kula shamta saka.

⁶Antə mjir Yahuda pəla abbər, “Ngəni mjir Mowab ya, di natə thləmari tuwa akwa hirkər, ka kər ɓəɓalkur, ka kər olkur ni? Ai gajakakur giri ni kulini ku ndzi shang gapani.”

⁷Mjir Mowab ata sə tuwa kamnyar bwani tə da ata sari. Shanga ɗa ata sə tuwa kəlara sakatə da ɗangtə jili msərakur susəmər mjir Kir Hareseth tə da tsəli ka səmari ni. Da ata sə tuwa har ka da ndzi sur kətadza.

⁸Kamnyar fakayeri na adzə Heshbon ka fakayeri ar anap na ahar Sibma ku mtəgəi. Akwa fakayeri ndaga antə mda ana wutə yimər anap na ana vu ka mji ol'olər tsəɗiyayeri wika. Saka laga aɗi tə Mowab ndzi apa nfur anap na akwa hwi, har tə kyanggyarari ku mzhitə Yazer, ka ndlətə mtakə na abwar ramta, ka pudza aka Manda Mtəmta.

⁹Amma kulini dawa ku tsi anap ndaga. Antə I akwa tuwa ka jaɓ tuwa kamnyar Yazer ka fakayeri na ahar Sibma. Nci akwa hwi shimwi kamnyar Heshbon ka Eleyale, kamnyar su aɗi tə mda awuta akwa fakayeri ni na akəs kəra mdə wa.

¹⁰Antə kulini mda aɗi natə ɗəffari msəra alari ata kəra fakayeri na ɓɗakɓɗaku ni kəra wa. Mda aɗi na akwa hara ha wala na ka kucali akwa fakər anap kəra wa. Kamnyar mda aɗi ana ntsar yimər anap akwa vəi ntsarari kəra wa. I ku thləthlatə ka kurakər kucali ar fəi sur fakər ɗa.

¹¹Apani I ku tuwa ka nggyinggya kamnyar su na wutə Mowab ka Kir Hareseth.

¹²Mjir Mowab ku ghərantə kərɗa akwa mwari akwa mashiɗayeri kamnyar kiɗə kəra haptayeri arɗa na ata gar, amma shang sur dlar ɗa aɗi akwa wa.

¹³Ngəni an labar natə MTHLAKU ku hamta ata kəra Mowab akwa saka na təramta.

¹⁴Amma kulini MTHLAKU akwa pəla, “Akwa kuta məva makər, apatə sakar mda tə mdə kəta akwa kəthlər, gənar Mowab ka səli tə tsa kəgari ata kura. Ata kəra hangkur mji tə tsa kəgari, mji yiɗauwa daci an ata mbila, antə wala da ma dza ɗa ata ndzi mtəmtari.”