Read bura-pabir Ishaya 17 Bible Online

Ishaya 17 - bura-pabir bible

Ishaya 17

¹MTHLAKU pəla abbər, “Damaska aɗi ata ndzi bərni kəra wa. Tsa ata ndzi mzhiku tsaptsaɓa.

²Bərniyayeri ar Arower ata ndzi kula mda ba saka madi. Da ata ngka vəi ɓəla təma ka thla, vəi tə mwaɓiyayeri ni ata pəpəi kula thlivəra.

³Mda ata huzamta bərniyayeri na ka duna akwa Israila, ka dlutsə dunar kuthlikur ar Damaska. Antə mambila mjir Siriya ata sə ləkwa sur səli tsu apa mjir Israila. I na MTHLAKU na ka Duna ta Shang an pəla su ngəni.”

⁴MTHLAKU pəla, “Vir nda olkur səli tə Israila kəgari ata sə kəmtadzi. Mjirni na ka gəna ata sə ngka ngguɗi.

⁵Israila ata sə ndzi apa fakər mthli tə mdə ku fəi sur fakari, kula mda apa bəbal na akwa mular mjir Refa sakatə mdə ku fəi sur fakari.

⁶Mjir Israila yiɗauwa daci an ata mbila ka mpika. Da ata mbila apa nfur zaitun aghəla tə mdə ku ɗəmi yarni. Ya na ata mbila ata tsiyayerari na nal nal an suɗa wala makər daci, ka nfwar wala ntəfu daci ata mnya tsiyayerari na aghəi. I na MTHLAKU na Hyelər Israila an pəla ndər ngəni.”

⁷Vir nda antə mji ata sə sənda ampaniyir mdə na həntə ɗa, ka putə nca ɗa ata Hyel na ɓɗakkarkara ar Israila.

⁸Da ata fwari ata kəra bagaɗiyayeri ar hamta saɗaka ka haptayeri tə da nam ka tsiya ɗa. Da aɗi ata jaktə nu haptu Ashera wa, wala mba alari sur shiwur wa.

⁹Vir nda bərniyayeri arɗa na ka duna ata sə ndzi kula mda akwa apa mtakər dlədləku. Da ata sə ngka apa diyayeri ar mjir Amor ka mjir Hivi na hwi sakatə da nggata abbər mjir Israila akwa si.

¹⁰Israila, ga ku fwari Hyel na mbantə nga ka msərantə nga, Hyel na ndzi apa gar pela tə mda ana hwi ra ɗuwardzi akwa. Ga ku ncimta pukdlayeri na ɓɗakɓɗaku kamnyar nar səli aka haptu.

¹¹Amma wala ma da an ptsa ka pukdla tsu ɗəɗəpa tə gə nci ɗa ni, ga aɗi ata ɗəmi su ata da wa. Su tə ga ata wutari ata an ɗəffə ɓzəɓza ka kətə na akurkur wa.

¹²Aiya, sojayeri ar tsəɗiyayeri na ka duna akwa si ka kuraku na ola apa kərathla yimi, apa kuraka mpar manda.

¹³Amma wala tə da akwa si ka kuraku na ola apa ka da ɓələmta mnya maghəm, Hyel ata mpa ala ɗa. Antə da ata ngka, ka hwi təra apa ɓaɓiya tə shambar akwa kəlari, apa bərbər tə kəwal fata.

¹⁴Tahaku mpar ɗa mwavər ka duna, amma kwabə ɗəɗəpa mdə ku kuri ka da. Ngəni an watsəɓər kəlara mdə na ku dlər yeru ka fa sur yeru.