Read bura-pabir Ishaya 18 Bible Online

Ishaya 18 - bura-pabir bible

Ishaya 18

¹Aiya aka tsəɗi natə mda akwa nggatə kuraka ntsəkwa akwa, tsəɗi na amta təbwar thlyaghayeri ar Ithliyopiya.

²Wakilayeri ana thlata anda akwa shar tə mdə nam ka duwathlu, ka si ata Thlyagha Nayil. Ngka giri avəi, giri na mjir thlentə na ɓəɓatu! Mwantə giri labar akwa tsəɗiyir giri natə thlyaghayeri ku thləthlauwa aka mjir giri na ka duna, saɓəl saɓəl, ka dza ɗa ɓɗaku, natə shanga mjir duniya ana thlivər ɗa.

³Shanga giri na akwa duniya, ka giri psi thləm ka vədzə hangkal aka kəlara sakatə mda ata hapta alam ar seɗar mparna ata kəra gar, wala mbur təmbəl!

⁴Kamnyar MTHLAKU ku pəla ali abbər, “Azi akwa vəi ndzəndziyirna I ata haghəi nci kəi wul su ka hangkal apatə kəlangkə ana təri aviri akwa sakar vəi gərgər, karara apatə pci ana mbəla kərathlər pci.”

⁵Kamnyar kwabə mda ɗəmi anap ni, sakatə pukdlayeri ku pumta, tə anap ku ləkwa ng'ha, MTHLAKU ata kurəmta mjir Ithliyopiya kasəla apatə ingdla ana pamta tsiya nfur anap.

⁶Mda ata sə pumta mshiyir sojayeri arɗa aka ɗikayeri kəga mwaɓi mtakə na akwa garayeri. Antə ɗika ata sə kuri fakəu ata kəra səm mshiyir ɗa, ka mwaɓi sə kuri vəya ata kəra ɗa.

⁷Mjir Ithliyopiya saɓəl saɓəl, ka dza ɗa ɓɗaku. Shanga mjir duniya ana thlivər ɗa kamnyar da ka duna, tsuwa da ana hara su apa mwaɓəlu. Amma ata saka nda da ata thlata akwa tsəɗi ɗa natə thlyaghayeri ku thləthlaɓəla ni ka da səntə cautayeri aka MTHLAKU na ka Duna ta Shang akwa Sihiyona.