Read bura-pabir Ishaya 19 Bible Online

Ishaya 19 - bura-pabir bible

Ishaya 19

¹Ngəni an labar natə MTHLAKU pəla ali ata kəra Masar. MTHLAKU akwa si ahar Masar, tsa akwa si ka hwi ata dlamba. Haptayeri ar Masar ata kədza akəmari, antə dza mjir Masar ata mta kamnyar yakata.

²MTHLAKU pəla, “I ata vu ka mpa thlata akwa daɓwa mjir Masar, tə mdə ka ɓzərma'ni ata mpa, mda ka ntəwulərni ata mpa ka nvwani. Di ka di ata sə səlkərdzi, kuthli ata sə səlkər kuthli nvwani har ka da mpa.

³I ata tuzhimta shanga su tə mjir Masar ɗəmha, kəi fəi shaha ɗa. Da ata kiɗə dlara akəla haptayeri arɗa, ka ra hakdzi adzə ɗeaghayeri, ka tsəkwitə mjir mambəla.

⁴I ata hamta mjir Masar akwa tsiya mthlaku na kula kətadza, akwa tsiya kuthli na mwavər ka tsa hara kuthlikur ata kəra ɗa.” I na MTHLAKU an pəla su ngəni.

⁵Yimər Thlyagha Nayil ata shiwa, antə kuta thlyagha ni ata ula.

⁶Thluhwayeri ar Nayil ata shiwa, yimər tsiya zərkayeri ar Masar ata kur kwaktaku ka ula. Veng kəga kusar mnya yimi ata tətəɓwa ka uləmtadzi.

⁷Shanga sur fakə tə mdə thləka ata mnya Thlyagha Nayil ni ata uləmtadzi ka shambar fimta ɗa har ka da sha.

⁸Mji na ana ngka kəlfa ata mnya thlyagha ni ata sə tuwa. Mjir kəthlər ka anggilku ka mjir kəthlər ka banggama ata sə ndzi kula kəthlər.

⁹Ɗəffa mjir tsa ləptu ka puwa ata sə ɓza, kamnyar da aɗi ata sə wutə puwa nggira wala mpur puwa wa.

¹⁰Ɗəffa mjir tsa puwar garga na ahar Masar ka shanga mjir kəthlər akwa vəi tsa ləptu ata ɓza.

¹¹Mji na ol'ola ahar Zowan ni kəgaɓu! Mjir hamta sauri na kalkal aka kuthli akwa hamta sauri na kula kər. Kamnyar mə tə har da ata thlandər aka kuthli abbər da an dlu tsiya kəkayeri arɗa na kuthlyayeri ka mji na ɗəɗu ɗəɗu waci waci ri?

¹²Kuthlir Masar, man hara aka mjir sauriyir nga na ɗəɗu nə ri? Ai da ata mzhi jikata ala gə su tə MTHLAKU na ka Duna ta Shang ku ɗəmha ata kəra Masar.

¹³Ajiyayeri ar Zowan ka Memfis ni kəgaɓu, mji ku pwaktəmta ɗa. Da an mji na kalkalər pwar tsəɗi ni, amma təng da ra vu Masar akwa sha.

¹⁴MTHLAKU an vu ɗa ka da hamta sauri na ata shamta ɗa. Antə apani da ku vu tsəɗi Masar akwa suayeri na aɗi kalkal wa. Tsa akwa mwa mbalmbalari apa mdər wika na akwa takəla akwa tapərərni.

¹⁵Antə mda aɗi akwa Masar wala duku na amzhi dlar wa, wala mdə na ka gəna, wala ngguɗi, wala mdə na ka səli wala tsa an kwafa.

¹⁶Ata saka ndaga, mjir Masar ata sə ngka mtathlaku apa mwanki. Da ata sə thlivər ka yakata ma sakatə da ku wuta abbər MTHLAKU na ka Duna ta Shang ata ɗi ɗa.

¹⁷Mjir Masar ata sə thlivər mjir Yahuda kəlara sakatə mdə ku kamnya Yahuda ala ɗa, kamnyar ata ɗangtə ala ɗa su tə MTHLAKU ku ɗəmha ata kəra ɗa.

¹⁸Ata saka ndaga, bərniyayeri ata mwantə ntəfu na ata sə mbwi alkawalər nu MTHLAKU na ka Duna ta Shang, ka gari ka mnya Ibrani. Mda ata kəga pal akwa nca bərniyayeri ni abbər Bərni ar Pci.

¹⁹Ata saka ndaga, mda ata sə namtə bagaɗiyir vəngkər səli aka MTHLAKU ata ɗəffa tsəɗi Masar, ka nci pela shanggam aka MTHLAKU ata kəla Masar.

²⁰Da ata ndzi seɗayeri ka sur ɗangta aka mjir Masar abbər MTHLAKU na ka Duna ta Shang adzə ɗa akwa Masar. Antə kəlara sakatə mji ni ku ɗar bwani ka tuwa aka MTHLAKU kamnyar dlara, tsa ata thlentə mdə na ata msərantə ɗa.

²¹Apani MTHLAKU ata ncantə kərni aka mjir Masar, antə da ata səndə ni ka vəngkər səli alari, ka sənta alari saɗaka mbamba ka sur hamta. Da ata hara alkawalayeri alari ka nghyaɓəla ɗa.

²²MTHLAKU ata ɗi mjir Masar, amma aghəla nda tsa ata sə mbantə ɗa. Da ata sə ngka adzə ni, antə tsa ata sə nggatə adduwar ɗa ka mbantə ɗa.

²³Ata saka na ndaga, laku na ola ata sə wutədzi akwa daɓwa Masar ka Assiriya. Apani mjir Masar ka Assiriya ata sə ləhar nvwa ɗa kula damitədzi, antə tsəɗiyayeri na suɗə ni ata sə tsaptədzi ata kəma duku ka vəngkər səli aka Hyel duku.

²⁴Ata saka ndaga, Israila ata sə ndzi pazhir Masar ka Assiriya. Antə Israila ata sə ndzi tsəɗi na ka barka aka shanga duniya.

²⁵MTHLAKU na ka Duna ta Shang ata vədza ala ɗa barka ka pəla abbər, “I ata vədzə barka ala ga, Masar, giri na mjirna. I ata vədzə barka ala gə Assiriya, tsəɗi natə I an nthləi. I ata vədzə barka ala ga, Israila, mjirna natə I an carɓəla aka kəri.”