Read bura-pabir Ishaya 2 Bible Online

Ishaya 2 - bura-pabir bible

Ishaya 2

¹Ngəni an labar damwa natə Hyel pəla aka Ishaya na ɓzər Amoz ata kəra Yahuda ka Urushalima.

²Akwa virayeri na ata sə si akəmazi, gar na ka mbwar vəngkər səli aka MTHLAKU ata, ata sə ndzi gar na nal ta shanga garayeri. Tsa ata sə ndzi gar na amta ta shanga garayeri, antə shanga mjir duniya ata sə gərdlədli mwari akwa.

³Mji ata sə thlata akwa tsəɗiyayeri hang ka si ka pəla, “Asər giri ka mburu mwari ata garər MTHLAKU, akwa mbwar vəngkər səli aka Hyelər Israila. Tsa ata thlipa ala mburu tsawur ni, antə mburu ata nu su tə tsa pəla akwa. Kamnyar tsawur MTHLAKU ata səɓəla akwa Sihiyona, antə ndərərni ata thlata akwa Urushalima.”

⁴Tsa ata sə hara shariya akwa daɓwa tsəɗiyayeri, ka shwalatə daɓwa mji hang, Da ata sə ɓdləmnya katsakarayeri ar ɗa ka da ndzi garmayeri, ka ɓdləmnya mwasayeri ar ɗa ka da ndzi ingdlar pa kəra nfwa, Antə tsəɗi aɗi ata jaktə haptə katsakar aka tsəɗi nvwa ni wa, wala jaktə ɗəmhədzi kamnyar mpa kəra wa.

⁵Antə kulini mjir Israila, Asər giri, ka mburu nu suayeri tə MTHLAKU thlipa ala mburu.

⁶MTHLAKU, ga ku nggəlar mjir nga Israila ka nggəlar mjir nyarmbwar Yakub, kamnyar tə da akwa nu surharar ɗeaghayeri na abwar raghəi ka hakdzi tsu apa mjir Filistiya, ka hara pazhikur ka durayeri damwa.

⁷Tsəɗi Israila ka adzərfa ka dinar hang ka duna, da ka gəna na akurkur wa. Tsəɗi ni ka takwayeri ka wagənayeri ar taku hang ka duna.

⁸Tsəɗi ni ku nghyi ka haptayeri, antə mji ni ana zuzuri ka vəngkər səli aka haptayeri tə da namtə ka tsiya ɗa.

⁹Antə kulini mda ata kəli səliyir ɗa shang, ka kəlghəi ɗa. Ga aɗiya zhar ɗa MTHLAKU wa!

¹⁰Da ata sə ɗuwardzi akwa kuayeri akwa gar, wala akwa kuayeri damwa kamnyar thlivər ɗəffə bwarbwarkur ar MTHLAKU, ka dunarni ka səliyirni.

¹¹Vir laga hirkər ata sə kura, tə mda ata sə shamta kər olkur. Tar MTHLAKU shini an ata sə wutə olkur.

¹²Vir nda MTHLAKU na ka Duna ta Shang ata sə kəlghəi shanga mji na hir kəra da ka mji na ka kər olkur.

¹³Tsa ata sə shamta shanga nfur seda na nal nal na ahar Lebanon ka shanga nfur ok na akwa tsəɗi Bashan.

¹⁴Tsa ata sə tuzhəghei garayeri na nal nal ka da ndzi bəbal,

¹⁵ka huzamta shanga mbwayeri na nal nal ka katanggar diyayeri na ka duna.

¹⁶Tsa ata shamta shanga sharayeri ar yimi na ar mjir Tarshish, sharayeri na ol'ola kəga natə mdə dəɓatə ɗa.

¹⁷MTHLAKU ata shamta kər olkur ar mji ka kəlghəi mji na hir kəra ɗa. Mda ata sə shagamta shanga haptayeri karkar, vir nda tar MTHLAKU shini an ata sə wutə olkur.

¹⁹Ma sakatə MTHLAKU ku thlatə kamnyar kənggərantə duniya, mji ata sə ɗuwardzi akwa kuayeri akwa gar, wala akwa kuayeri damwa kamnyar thlivər ɗəffə bwarbwarkurərni, ka dunarni ka səliyirni.

²⁰Vir nda, mji ata sə pumta haptayeri arɗa natə mdə nam ka adzərfa ka dinar aka kuratyatya ka ntsəhəlayeri.

²¹Ma sakatə MTHLAKU ku thlatə kamnyar kənggərantə duniya, mji ata sə ɗuwardzi akwa kuayeri ka akwa garayeri na ka pela kamnyar thlivər ɗəffə bwarbwarkurərni, ka dunarni ka səliyirni.

²²Zhar mbərsa ka dunar mda gapani, aɗi ata fəi wa tsa ata mta. Antə tsa aɗi ata mzhi dlar ngə wa.