Read bura-pabir Ishaya 20 Bible Online

Ishaya 20 - bura-pabir bible

Ishaya 20

¹Sargon, na kuthlir Assiriya, ku tsawa aka mdə na olta shang ata kəra sojayeri ar Assiriya abbər ka da ra dlər Ashdod na akira Filistiya.

²Akwa məva makər na təramta MTHLAKU ku gari aka Ishaya na ɓzər Amoz abbər ka tsa ntsui ɓaɓiyirni ka ləptərni. Antə tsa ku kələngkər ka mwa dura, kula ɓaɓi.

³Aghəla tə Assiriya ku ngkəi Ashdod antə MTHLAKU pəla, “Buɗarna Ishaya ku mwa dura, kula ɓaɓi mnyar məva makər. Ngəni an dludzər su na ata sə wutə Masar ka Ithliyopiya.

⁴Kamnyar kuthlir Assiriya ata sə vu ka mji tə tsa fata ahar Masar ka Ithliyopiya ni mwa dura. Kustayeri kəga mji ol'ola ata sə mwa kula ɓaɓi, dura ka mpur kuciva ɗa aɓəla, ka kəli səli Masar.

⁵Antə mjir Filistiya na ana vəkər ka mbərsa ka duna mjir Ithliyopiya ka gaya ka Masar ata sə thlivəra ka ləkwa sur səli. Ɗəffa ɗa ata sə ɓza.

⁶Antə akwa saka ndaga mji na ka ndzi ata mnya thlyaghar Filistiya ata sə pəla, Wul su na wutə mjir Masar nggwa! Mji natə mburu ana ra bara dlara akəla ɗa abbər ka da msərantə mburu ta mjir Assiriya! Ai ngəni mburu amsər kəra wa!”