Read bura-pabir Ishaya 21 Bible Online

Ishaya 21 - bura-pabir bible

Ishaya 21

¹Ngəni an labar nthləhyel natə MTHLAKU ku ncanta ali ata kəra Babila. Apatə kəwal na mwavər ana thlata akwa mtakəu, antə asar ata sə thlata akwa tsəɗi na mwavər ka si ata kəra giri.

²Akwa wulsu ni I ku wutə suayeri na ɗimi ɗimi na ata thlivərantə mda. I wutə mdər ɓəli mda ka mdər tsi mda. Ləkəma, Elam, ka ra dlər Babila! Ka ra kawartə ni ka sojayeri, Mediya! Kamnyar Babila ata ndla, antə tsəɗiyayeri na akwa ɗar bwani akirari apa mafa ata msəra.

³Antə su tə I wutə ka nggatə ni ku thlivərantə ra, ka damitə ra apatə kutərya ana damitə mwala.

⁴Kəri akwa kəl ra, antə I ku yakata kamnyar thlivəra. I mwaɓa abbər ka pci təri ɗəm kəi heni, amma təng tsa ra si ka sur thlivərantə ra.

⁵Akwa wulsu ni mdə ku ɗəmhə susəmər kucali laga. Mdə ku pshari sərpəi ka mji ndzəndzi ata, antə shanga ɗa ku baɗitə səm susəma ka sa sur sa. Təkəma təng kuraku laga ku si abbər, “Mwa giri taktar, giri na mji ol'olər mpa, ka giri ɗəmhə partauwayeri ar giri!”

⁶Kamnyar MTHLAKU ku pəla ali, “Mwari ka ra vəi mdər gadi, kara pəla alari ka tsa səntə labar ata kəra kəlara su tə tsa wuta.

⁷Ma tsa ku wutə mji akwa si ata taku suɗsuɗa, ka mji na akwa si ata kwarayeri ka dləkəmauwayeri, tar ka tsa wul su tə da ata harari ka hangkal.”

⁸Antə mdər səkə ni haptə kuraku ka pəla, “Zanuwa, I athləthlata azi akwa vəi səkə ni parang pci ka viri.

⁹Təkəma təng I wutə mji laga akwa si! Mji shili an akwa si ata taku suɗsuɗa.” Antə mdər səkə ni pəla, “Babila aɗi kəra wa! Mdə ku ɓəgələmta ka pugəmta shanga haptayeri arɗa ata di.”

¹⁰Ai mjirna Israila, mdə ku dəkəmta giri ka puhəmta giri apa alkama. Amma I ka labar na msəra ala giri na thlata akəla MTHLAKU na ka Duna ta Shang, Hyelər Israila.

¹¹Ngəni an labar na ata kəra Edom. Mdə laga ahar Edom akwa kəga ra ka pəla abbər, “Mdər gadi, nawa tə viri ata kur ri? Pəla ali sakatə viri ata kura.”

¹²Antə I shinau abbər, “Viri ata kura, amma viri ata jaktə hara. Ma ga ata bara jaktə yu su ata kər, jaktə si ka ra yuwa.”

¹³Ngəni an labar na ata kəra Arabiya. Giri na mjir Dedan na ana mwa akwa wagənər taku, na akwa fəli akwa mtakər Arabiya,

¹⁴ka giri na yimi aka mji na ku si adzə giri ka thləli. Giri na mjir Tema, ka giri na susəma aka mji na akwa hwi ta mpa.

¹⁵Da akwa hwi ta mda akurəmta ɗa ka katsakarayeri tə mdə ntsuɓəla, kəga laliyayeri natə mdə ku ɗəmhədzər shari, ka shanga asarayeri ar mpa.

¹⁶Antə MTHLAKU pəla ali, “Azi ka məva pal kalkal, səliyir mjir Kedar ata kura, tsu apatə sakar kəthlər mdə tə mdə kəl ni kwanggila ana kura aghəla məva pal.

¹⁷Təng mjir sha na katsala an ata mbila yiɗauwa. Ngəni an su tə MTHLAKU na Hyelər Israila pəla.”