Read bura-pabir Ishaya 22 Bible Online

Ishaya 22 - bura-pabir bible

Ishaya 22

¹Ngəni an labar na ata kəra Mular Wulsu. Man akwa harari? Kamnyar mə tə shanga mjir di ni akwa hara kucali ata bəbal kəra mbwar ɗa ri?

²Shanga di ni ku kənggərantədzi ka nghyi ka kurakər thlentə hangkal. Mji na mta akwa di ni aɗi mta ata mnya mpa wa.

³Shanga mji na ol'ola ar nga ku hwi abbər ka da msəra, amma mdə ku ngkəgəi ɗa kula da mzhi shimta wala afə pal.

⁴Antə I pəla, “Zhar ra kəi tuwa mjirna na mtə ni, ga aɗiya pəla abbər ga ata shiktə ra wa.”

⁵Vir nda mburu ata ndatədzi ka tuwa ka kuraku kamnyar mda ata dlərəmta mburu akwa Mular Wulsu apatə MTHLAKU na ka Duna ta Shang ku ɗəmha ata kəra mburu. Mdə ku ndlagamta katanggar bərniyir mburu, antə kurakər tuwa akwa səɓəla akwa garayeri.

⁶Sojayeri ar tsəɗiyir Elam ku si ata taku ka afa ka kwaja akəla ɗa. Sojayeri ar Kir ku fatə partauwayeri arɗa akwa sək su.

⁷Antə takur wagənayeri ku nghyantə mularayeri ar giri na ɓɗakɓɗaku. Tsuwa mjir fəl taku ku thləthlata akwa nyarfayeri ar Urushalima.

⁸Mdə ku famnya shanga sur mpar mjir Yahuda. Sakatə su ndaga ku hara, ga ku hwi ra bara sur mpa akwa vəi pwi kari mpa.

⁹Giri ku wulhə gulayeri na ata katanggar Urushalima kamnyar ka giri wulɓəla vəyayeri na ata bara nama. Giri ku kətsə yimi akwa Kufa na Aghəi.

¹⁰Giri ku wulhə kəyayeri na akwa Urushalima ka ɓəgələmta bwaduku kamnyar ka giri wutə sur jaktə hənɓəla katangga ni.

¹¹Giri ku latə kur pwi yimi akwa daɓwa katangga na suɗə ni kamnyar ka yimi na akwa kufa na fəifəyari ni hwi ka ləkwa. Amma giri aɗi kələngkər wala hamta ɗəffa giri aka Hyel na ɗəmhə suayeri ngəni təng waci ni wa.

¹²Vir nda MTHLAKU, Hyel na ka Duna ta Shang, ku kəga giri ka giri tuwa ka ndzi ka ɗəffə ɓzəɓza, ka giri shimta kəra giri ka hatə dasa.

¹³Amma ata vəya ndaga, giri ku kumshi ka hara kucali. Giri ku tsi təma kəga thla ka ɓɗa, ka sangkər yimər anap. Giri pəla, “Kuji ka mburu səm ka sa, ma ku ndzi mburu ata mtə ɗəpa.”

¹⁴MTHLAKU na ka Duna ta Shang surni ku pəla ali abbər, “Jili ɗimikur ngəni tə da hara ni mda aɗi ata tifəmta ala ɗa ba saka madi wa. I na MTHLAKU na ka Duna ta Shang an pəla su ngəni.”

¹⁵MTHLAKU na ka Duna ta Shang ku jaktə pəla ali abbər kəi mwari adzə Shebna, na ola ata kəra kəi kuthlikur ni, kəi pəla alari,

¹⁶“Shebna, gə ntsari mə laga ri, har tə ga ata ntul kulər nga amta akwa pela?

¹⁷Nuhum ga ata wuta abbər gə ka duna, amma MTHLAKU ata tamtə nga ka tsa shiwultə nga ka duna, ka ndzəhəmta nga ka ufti.

¹⁸Tsa ata shiwul ka shiwul nga ka ndzəhəmta nga ciju apa bwal akwa dəli mtakəu. Ga ata mta anda adzə wagənər takwayeri na ɓɗakɓɗaku natə ga akwa gaya ka da ni. Ga an sur səli aka mthlakər nga.

¹⁹MTHLAKU ata kələmta nga kazhar vəi kəthlərər nga, ka kəli nga kazhar olkur tə gə kəgari.”

²⁰MTHLAKU pəla aka Shebna, “Aghəla nda I ata thlenta aka buɗarna Eliyakim na ɓzər Hilkiya ka tsa si.

²¹I ata hadza alari ləptər olkur ar ngə ni, ka mbwi kusarari ka sur mbwi kusar, ka hamta alari shanga olkur tə gə kəgari sakanda. Antə tsa ata ndzi apa təddar mjir Urushalima ka Yahuda.

²²I ata hamta alari tsəkuram nyarmbwar Dauda. Tsa ata ndzi ka tsəkuram nyarmbwar vəi kəthlər. Antə ma tsa ku kəlari, mdər hartari aɗi wa. Tsuwa ma tsa ku harta, mdər kəlarari aɗi wa.

²³I ata nci ni ɓɗaku, antə tsa ata ndzi afər gaya aka shanga mjir kutakəyirni.”

²⁴“Shanga turər yangkurayerari ka mji na akwa nyarmbwarni ata ndzi ata wulyari, antə tsa ata səntə səli aka shanga mjirni ol ka ntsaha.”

²⁵MTHLAKU na ka Duna ta Shang pəla, “Aghəla nda, I ata sə ntsuɓəla su na kukwi səlari ɓəɓal ni, antə tsa ata səɓəla ka təri ata di. Ngəni ata ndzi datər ni ka shanga su na ata wulyari ni.”