Read bura-pabir Ishaya 23 Bible Online

Ishaya 23 - bura-pabir bible

Ishaya 23

¹Ngəni an labar na ata kəra Taya. Tuwa giri ka ɗəffu, giri na sharər yimi ar Tarshish na thlata akwa diyayeri na ciju. Kamnyar mdə ku shamta Taya, shanga kəyayeri kəga sharayeri arni ku huzamtadzi. Giri ata nggaɓəla labar ni akəla sharayeri ar giri na thlata ahar Saiprus.

²Tuwa giri akwa ɗəffa giri, giri na ciju ata mnya yimi, ka giri na mjir fəli ar Sidon. Mjir fəli ar giri ku ntamta manda ka ndlantə giri.

³Mjir fəli ar giri ku nu mandayeri ka nggaltsə mthlir Masar kamnyar ka da ɗəla ka ndzi ka gəna. Tsuwa da ana səntə sur fakə tə da ana thli ata mnya Nayil. Giri an mjir fəli na ol'ola akwa duniya.

⁴Sidon, ga an bərni na ka duna tə mdə lata ata mnya manda. Amma gə ku ləkwa sur səli! Kamnyar manda ni ku nggəlar nga ka pəla, “I ku ndzi apa mwala na aɗi ɗar kutərya wa, wala ya maɗa' wa, wala kəlantə maɗashili wala maɗangkwi wa.”

⁵Wala mjir Masar, ma sakatə da ku nggata abbər mdə ku ɓdləmta Taya, da ata damitədzi.

⁶Tuwa giri ka ɗəffu, giri na mjir mnya yimi. Hwi giri ka giri ləhar Tarshish!

⁷Ngəni aɗi an Taya bərni na msəra waci ni pwa? Aɗi tsa an thlentə mjirni akwa diyayeri na ciju ciju ka da ra hara kuthlikur ata kəra ɗa ni pwa ya?

⁸Wan ɗəmhə jili asar ngəni ata kəra Taya, bərni natə kuthlyayeri an mjir fəli arɗa, mji na ka səli akwa duniya nə ri?

⁹MTHLAKU na ka Duna ta Shang an ɗəmha. Tsa hara apani kamnyar ka tsa shamta hirkər tə da kəgari, ka tsuwa ka tsa kəli səliyir mjir ɗa na ol'ola.

¹⁰Pu girdzi akwa Taya, giri na mjir Tarshish na akirari! Kamnyar kulini sur ngkatə ta mda ləkwa Taya aɗi kəra wa.

¹¹MTHLAKU ku haɓəla tsiyari ata kəra yimi ka dlutsə kuthlikurayeri. Tsa ku tsawa ka mdə huzamta vəyayeri na ka duna akwa Kanana.

¹²MTHLAKU ku pəla aka mjir Sidon, “Giri aɗi ata jaktə nggatə msəra kəra wa, Gə tə mjir nga akwa ɗar bwani. Wala ma giri an hwi ka ləhar Saiprus, hangkala giri aɗi ata pəpəi wa.”

¹³Wul su tə mjir Babila hara aka Taya nggwa! Mjir Babila ku latə ka kalaktə Taya ka mbwayeri na nal nal ka dlər ni, ka huzamta kəyayeri ar kuthlikur na akwa tsəɗi ni. Antə kulini tar mwaɓi mtakəu an akwa ndzi akwa kumbari.

¹⁴Tuwa giri ka ɗəffu, giri na mjir lənggu akwa shar ata manda, kamnyar mdə ku huzamta bərni natə tsa an duna tsəɗiyir giri.

¹⁵Sakanda mda ata sə fwari su ata kəra Taya har məva murfəkumari, kəkal ka saɓəlkur mpika kuthli. Aghəla məva murfəkumari ni, Taya ata sə ndzi apa mwala karwa tə mdə thlangkər alari ha:

¹⁶Kət yakandiyir nga, ka ra dlarhə kutadi, gə na karwa na ku fəi kula mji sə adzə nga. Gyali kara hara hayeri ar nga ka damwa, ka mji shili jaktə ngka adzə nga.

¹⁷Aghəla tə məva murfəkumari ni ku kuri, antə MTHLAKU ata jaktə namtə Taya. Amma mjir Taya ni ata jaktə ngka ata mnya kəthlərərni na waci, ka ndzi apa mwala karwa na ana ɗəl dzari aka shanga mjir duniya.

¹⁸Antə shanga riɓa tə tsa wuta akwa karwakur ni, tsa ata hamtari aka MTHLAKU. Tsa aɗi ata kəsiyari wa, amma tsa ata hamtari aka mjir nu MTHLAKU ka da mastə susəma hang ka kari hata na ɓɗakɓɗaku kəgari.