Read bura-pabir Ishaya 24 Bible Online

Ishaya 24 - bura-pabir bible

Ishaya 24

¹Wul giri bu! MTHLAKU ata huzamta duniya, ka namtə ni kula mda akwa. Tsa ata ɓzamtə kəra duniya ni ka titiləmta mji na ata.

²Jili asar duku an ata wutə shanga mji, Asar duku an ata wutə mji na ndzang ka prist, mafa ka mthlakərni, ngkwarmbwa ka marmbwa'ni, mdər ɗəl su ka mdər masari, mdər hamta təpa ka mdər dlu təpa, mdər gəna ka ngguɗi.

³Mda ata shamta shanga su na ata kəra duniya, antə tsa ata ndzi kula su. MTHLAKU an pəla su ngəni.

⁴Duniya ata ula, tə shanga su na ka thlali ata tətəɓwa. Tsa ata mtathla ka ndzi kula duna. Mji na ol'olər duniya ata ndzi kula duna.

⁵Mji ku hilantə duniya atar ɓəli tsawayeri ar Hyel, ka atar ɓəli alkawal na ba saka madi tə da ku mbwi akwa daɓwa ɗa.

⁶Antə mənggəla ku si ata kəra duniya ka ləkwa kurəmta mji. Da akwa ɗar bwani kamnyar biku tə da hara. Antə da ata ləkəma ka kəmtadzi, tə mji na ka mpika ata sə mbil yiɗauwa.

⁷Nfur anap ata sə ula, antə ata sə ndzi mwavər ka mdə wutə yimər anap. Shanga mji na ka kucali sakanda ata sə kəl ɗəffu.

⁸Mda aɗi ata sə hara kucali ata mnya kəcaikəcai wa, wala nggatə kurakər kucali kəra wa. Kucali tə mda ana hara ata mnya guləm wala gangga ata sə sha.

⁹Mji aɗi ata sə hara ha ka kucali ata kəra yimər anap kəra wa. Kamnyar yimər anap na msəra hwatu ata sə ndzi mumwasu.

¹⁰Kuta bərni ata sə huzəɓtədzi. Antə mji ata sə hagartə nyarfur ɗa ta mji aləvəi ata kəra ɗa.

¹¹Mji ata sə tsaptədzi ata layi ka tuwa ka kuraku kamnyar yimər anap aɗi wa. Kucali ka msərakur ata sə kura akwa tsəɗi ni.

¹²Mda ata sə ɓdləmta bərni ni, ka ɓəgələmta nyarfayerari.

¹³Ngəni an su na ata sə wutə kəlara tsəɗi na akwa duniya. Tsəɗi ni ata sə ndzi hayang apa sakatə mdə ku ɓwi zaitun kazhar nfurni, apa anap tə mda akwa hwilkari aghəla tə mthlakari ku ɗəmi.

¹⁴Mji na ku mbili ata sə haptə kuraka ɗa ka hara har kucali. Mji na akwa ramta ata sə ngkər kuthlikur MTHLAKU aka mji.

¹⁵Mji na akwa raghəi ata sə nar səli alari, antə mji na ata mnya yimi ata sə hu MTHLAKU na Hyelər Israila.

¹⁶Ba akwa tsəɗiyayeri na ciju ciju mda ata sə nggatə hayeri ar hu MTHLAKU. Amma ɗəffi ɓzəɓzari! Dzi ku mti! Sha ku wutə ra! Kamnyar mji akwa ɓəli nvwa ɗa, tsuwa shimnyakur akwa mulmula.

¹⁷Psi gir thləma giri ali! Suayeri na ana thlivərantə mda, apa ku, ka dərku shang akwa səksəkə giri!

¹⁸Kəlara mdə na thlivər ka hwi, tsa ata tərkwa ku, antə mdə na msər ta tərkwa ku, dərku ata ngkəi ni. Vəi na amtazi ata kəlardzi bau ka pughəi bwani ata kəra giri, antə duniya ata kənggərantədzi.

¹⁹Duniya ata kənggərantədzi ka duna, ka ntəntaudzi, ka ndəkəmtadzi.

²⁰Duniya ka kərari surni ata ndzi apa mdə na ku wika, ka kənggəra apa mbwa kusar na akwa shambar yimi. Tsa ata ndla kula jaktə thlata, kamnyar bikərni ku hara kəgəɓu alari.

²¹Ata saka nda MTHLAKU ata sə ɗi mjirthlentərhyel na ku ndla, ka kuthlyayeri na akwa duniya.

²²Hyel ata tsaptə kuthlyayeri ata vəi duku akwa ku apa pərsənayeri. Tsa ata hartə ɗa akwa mbwar pərsəna har ka vədza aka sakar bwaniyir ɗa.

²³Sakanda thliya ata sə ndzi kuthlu, pci aɗi ata sə mbəl kəra wa. Kamnyar MTHLAKU na ka Duna ta Shang ata sə lətə Gar Sihiyona, ka hara kuthlikur akwa Urushalima. Antə shanga mji na ol'ola ata sə wutə kuthlikurərni ka nar səli.