Read bura-pabir Ishaya 25 Bible Online

Ishaya 25 - bura-pabir bible

Ishaya 25

¹MTHLAKU ga an Hyelərna, I ata nar səli ala ga ka hu nga. Kamnyar ga ku hara suayeri na ata ndatə mda, ga ku ɗəmhə su nayeri ni təng waci, antə kulini ga ku nghyaɓəla ɗa cip cipu.

²Kamnyar ga ku shinantə bərniyayeri ka kumba bərniyayeri na ka duna ku shin ka hwashim. Kəyayeri ar kuthlikur na akwa tsəɗiyayeri damwa aɗi kəra wa, tsuwa mda aɗi ata jaktə latə ɗa kəra wa.

³Antə mjir tsəɗiyayeri na ka duna ata sə nar səli ala ga, tsəɗiyayeri na kəmanggar ata sə thlivər nga.

⁴Kamnyar ga ku ndzi vəi wutə dlara aka mjir tursu, ka vəi ɗuwardzi aka mji akwa sakar bwani. Ga ku ndzi mbwar həlamta shambar na mwavər ka shanggur həlamta bwarbwarkur pci. Kamnyar mji na ɗimi ni ata mpa, apa shambar yimi ata dza mbwa,

⁵apa u'ur pci akwa tsəɗi bwar wuyaku. Amma ga ku hartə mnya dawayeri ar yeru, apatə dlamba ana hartə bwarbwarkur pci ka ləmbəku. Apani ga ku ngkatə hara ha aka kəmanggarayeri.

⁶Azi ata Gar Sihiyona antə MTHLAKU na ka Duna ta Shang ata ɗəmhə susəmər kucali aka shanga mjir duniya. Tsa ata ɗəmha ala ɗa kum na msəra ta shang ka sur sa na msəra ta shang.

⁷Sakanda antə MTHLAKU ata sə famta zhaɓər tuwa ka ɗəffə ɓzəɓza tə mdə pungkər ata kəra shanga mjir duniya.

⁸MTHLAKU na ka Duna ta Shang ata kələmta mta ba saka madi, ka famta shimwi ata nca shanga mji. Tsa ata kələmta rutə ka sur səli na ata kəra mjirni na akwa duniya shang.

⁹Sakanda antə mji ata sə pəla, “Ngəni an Hyelər yeru ni! Yeru ku mbərsa ka tsa, antə tsa ku mbantə yeru. Ngəni an MTHLAKU natə yeru mbərsa ka tsa ni! Antə kulini ɗəffa yeru msəra ala yeru kamnyar tsa ku mbantə yeru.”

¹⁰MTHLAKU ata ɓəlatə Gar Sihiyona, amma tsa ata ntsarəmta Mowab ka səl apatə mwaɓi ana ntsarəmta kusar ka tsa ndzi kuɓa.

¹¹Da ata ndərar tsiya ɗa apa da ata bara idla, amma Hyel ata kəli səliyir ɗa, antə tsiya ɗa ata ləghəi ka sha akwa yimi.

¹²Tsa ata ɓəgələmta katanggayeri na nal ar Mowab, ka hadləmta ɗa ata di apa bərbər.