Read bura-pabir Ishaya 27 Bible Online

Ishaya 27 - bura-pabir bible

Ishaya 27

¹Vir nda MTHLAKU ata sə kəthlər ka katsakarərni na ɓəɓal ka ɓəɓatu ka duna kamnyar ɗi Leviyathlan ka tsa tsi dragon shatan manda na ola. Leviyathlan an pwapu na ana pərdzi ka thləl kərni ka ufti.

²Vir nda MTHLAKU ata sə pəla su ata kəra fakər anapərni na ɓɗaku abbər,

³“I ana wulwul ni ka hamta alari yimi tədəku. Pci ka viri I ana sək kərari ta mda asə ɓzamtə ni.

⁴Ɗəffi ku pwi. Amma ma I ku wutə thlali wala mtəhəra akwa fakə ni ɗəffi ata ɓza, antə I ata mbamta ɗa.

⁵Amma ma dawayeri ar mjirna ata bara kəi zhar ɗa ka mpika, to, tar ma da tubi ka kiɗə kəi yafitə ɗa. Jiri tar ma da kiɗə kəi yafitə ɗa.”

⁶Akwa virayeri ndaga mjir Israila ata sə ncidzi apa nfwa ka thləla ka pukdla ka ya munya. Da ata sə ya munya har ka nghyantə duniya.

⁷MTHLAKU ku ɗi mjirni ka duna apatə tsa ɗi dawayeri arɗa ya? Nənga tsa ku kurəmta mjirni apatə tsa kurəmta dawayeri arɗa ri?

⁸Tsa ana ngkərtə jili bwani natə tsa ata hara aka mjir Israila. Tsa famta ɗa ka ɗəffu apatə shambar bwar raghəi ana famta su, ka mwantə ɗa akwa tsəɗi damwa apa mafa.

⁹Ngəni an kura laku tə mda ata mzhi kəcimta bikər mjir Israila akwa, kamnyar apani antə mda ata sənda abbər mdə ku tifəmta alari bikərni: Tar ma da jaɓumta pelar bagaɗiyayeri ka hadləmta ɗa apa bərbər, da aɗi ata mbilar haptər Ashera wala bagaɗi mba sur shiwura wa.

¹⁰Kamnyar bərniyayeri na ka duna akwa Israila ku ndzi kula mda apa mtakəu. Mji ku hwi kazhar ɗa ka fwari ata kəra ɗa. Antə da ku ndzi vəi ɓəla tə thla ana ɓɗə kusar akwa ka ghərəmtaghəra.

¹¹Ma sakatə tsiyayerari ku uli da ata ɓəgələmtadzi, antə mwanki ata tsaptə ɗa kamnyar mba u'u ka da. Kamnyar mji ngəni kula kər, antə Hyel na həntə ɗa aɗi ata damitədzi ka da wala kətadzə ɗa wa.

¹²Vir nda MTHLAKU ata fwaɓəla mjirni baɗita akwa Thlyagha Yufiretis ka vədza aka kəla Masar. Tsa ata ɗəmbəla ɗa duku duku apatə mda ana carɓəla alkama akwa nca cwangcwangari.

¹³Vir nda mda ata sə mbur təmbəl na ola kamnyar kəga shanga mjir Israila na akwa mafakur ahar Assiriya ka Masar ka da ngka akwa Urushalima. Antə da ata sə vəngkər səli aka MTHLAKU ata Gar na ɓɗakkarkara akwa Urushalima.