Read bura-pabir Ishaya 28 Bible Online

Ishaya 28 - bura-pabir bible

Ishaya 28

¹Sha ku wutə bərni Samariya! Səliyirni akwa təri apatə dzakwar kuthlikur tə mdə nam ka pukdlayeri ana tətəɓwa ata kəra mji ol'olərni na ana sa ka wika. Da ana hir kəra ɗa ka pshitə dza ɗa ka tulari, amma nggədza ɗa aperəmta wikəwikari.

²Kamnyar MTHLAKU ata thlentə sojayeri ar Assiriya na ka duna ka da ra dlər Israila. Da ata pwa ka mpa ata kəra Israila apatə yimər handzəkəla na mwavər ana pughəidzi ka ɓzamtə su, ka pərtuwari famta di.

³Mda ata ntsəntsarəmta dzakwar kuthlikur ar Samariya, natə tsa an dzakwar hirkər ni, ka səla mda.

⁴Bərni Samariya an ata kəra mular na ka kuɓa. Amma səliyir mji ol'ola arni na hir kəra ɗa ni ata sə kura. Tsa ata kura tsu apatə mda ana nthləi yarakəmar kamndə na ku ng'həi təkəma ka kwasəmnya.

⁵Aghəla nda antə MTHLAKU na ka Duna ta Shang surni ata sə ndzi dzakwar kuthlikur na ka səli aka mjir Israila na ku mbil ka mpika.

⁶Tsa ata hamta dunar hara shariya ka jirkur aka alkaliyayeri, ka dunautə sojayeri na ana sək nyarfu.

⁷Wala naɓiyayeri kəga pristayeri ana sa ka wika. Da ana sa yimər anap na mwavər hang kamta ka ndəndatədzi akwa kəthlərər ɗa. Antə ma naɓiyayeri ni ku wikə kamta da aɗi ana nggaɓəla su tə Hyel pəla ala ɗa wa. Tsuwa ma pristayeri ni ku wikə kamta da aɗi ana mzhi thlamta shariya na kalkalari wa.

⁸Kamnyar shanga vəi ndzəndziyir ɗa ana nghyi ka tapəra, vəi aɗi tə mda awutə na kula adiya wa.

⁹Har ka da pəla, “Tsa ana wuta apa tsa ata thlipa aka wa ri? Wan ata mzhi nggaɓəla su tə tsa akwa ngkərari ri? Tsa ana wuta apa mburu maɗangkyar natə mdə haɗa kəliyari ata uwa ya?

¹⁰Kamnyar tsu su duku antə tsa akwa ngkər ka ngkərari ala mburu, ka jaktə nutə ka nuta, layi layi, kulikulini tsa azi, ɗarndzi raka tsa anda.”

¹¹Ma giri aɗi ata psi thləm ali wa, to Hyel ata fatə dur damwa na ka mnyar ɗa zum ka da ɗuwuləmta ala giri kəra giri.

¹²Tsa ku pəla abbər tsa ata na giri msərakur na jirari ka ghərəmtaghəra, amma giri aɗi psi thləm alari wa.

¹³An su na hara tə MTHLAKU ata ngkər ka ngkər ala giri, ka jaktə nutə ka nuta, layi layi, kulikulini tsa azi, ɗarndzi raka tsa anda ni. Amma ba kulini ndər na butu, ka ata bəbal ku ndzi ala giri sur tsamta səl. Giri ata ndla ka bwahila giri ka dəkəidzi ka mdə fatə giri.

¹⁴Antə giri na kula kər na akwa hara kuthlikur akwa Urushalima, psi giri thləm aka su tə MTHLAKU akwa pəlari.

¹⁵Giri akwa gaya abbər giri ku mbwi alkawal ka mta har ka nggaɓəladzi ka duniyar mjir mambəla. Giri ku hamta jiri abbər wala asar an si tsa aɗi ata tsəkwar giri wa, kamnyar giri akwa vəkər ka thlandərayeri abbər da ata msərantə giri.

¹⁶Antə nggədza su tə MTHLAKU na ka Duna ta Shang akwa pəlari, “Nggədza I akwa nci pelar səla mbwa akwa Sihiyona. Tsa ata ndzi səla mbwa na gyang ka duna. I ata nci pela na ɓəɓal akwa kuɗəmar mbwa ni, natə mdə ku rəbuta ata abbər, ‘Mdə na ka hamta jiri aɗi ana huvə wa.’

¹⁷Mda ata ngkər səla mbwa ni ka səwur jirkur, ka thlentə ni dwaɗu ka jirkur.” Yimər handzəkəla ata tsarəmta shanga thlandərayeri natə giri akwa vəkər kari, ka pərtuwari famta kəyayeri ar giri.

¹⁸Mda ata sharəmta alkawal natə giri mbwi ka mtə ni, ka huzamta gari tə giri ɗəmhə ka duniyar mji mtəmtari ni. Antə ma sakatə asar ku tsa giri, tsa ata nggyari giri.

¹⁹Asar ni ata tsa giri ata kər ata kər, ɗəɗəp ɗəɗəpa, pci ka viri. Kəlara labar na wutədzi ala giri ata ndzi labar na ata thlivərantə giri.

²⁰Ga ata ndzi apa mdə tə mda ana ngkər akwa karapu, na bara heni akwa dəkəl na kwadang dzau ta amzhi ndərardzərni, ka barkwa na ter ta amzhi hartə dzari.

²¹MTHLAKU ata sə mpa apatə tsa hara ka mjir Filistiya ata Gar Perazim, ka su tə tsa hara ka mjir Amor akwa mular Gibeyon. Tsa ata hara su laga zum tə tsa aɗi ɗar harari ka pal wa: Tsa ata shamta mjirni surni.

²²Antə giri aɗiya gyal ka ndər ngəni wa! Ma giri ku gyal kəgari bwaniyir giri ata ndzi mwavər ta ni. Kamnyar MTHLAKU na ka Duna ta Shang ku pəla ali su tə tsa kwamta kamnyar shamta giri.

²³Psi gir thləm aka su tə I akwa pəlari, ka giri vədzə hangkal aka su tə I ata pəlari ala giri.

²⁴Mda ana ləkəma ka kukul fakərni kula ɗəmhədzər thləka ya?

²⁵Ai təkəma tə tsa ku namtə fakərni ɓɗaku, tsa ata ɓucimta hwulfər yaji arni. Aghəla nda tsa ata ntau alkama ka barli, ka kawartə tenga fakə ni ka mthli.

²⁶Mdər fakə ni asəndə kəthlərərni, kamnyar tsa ku thlipta akəla Hyel.

²⁷Aghəla tə tsa ku fəi yajirni tsa ana dəkəmta yaji ni ka zwal na kəkaffa. Tsa ɗi ana hir ka mdə dəkə yaji ni ka amalangke ar taku wa.

²⁸Tsa aɗi ana ləkəma ka dək alkamarni har ka thladlərəmta wa. Wala ma tsa ata dəkari ka amalangke ar taku, tsa asəndə laku tə tsa ana hara akwa tə munyari aɗi ata hil wa.

²⁹Shanga ɗəɗukur ngəni thlata akəla MTHLAKU na ka Duna ta Shang. Hyel ana hamta sauri na ɓɗakta shang, nghyinghyari ka ɗəɗukur na jirari.