Read bura-pabir Ishaya 29 Bible Online

Ishaya 29 - bura-pabir bible

Ishaya 29

¹Sha ku wutə Urushalima, na an vəi hamta saɗaka aka Hyel məva ata məva! Bərni natə Dauda fəli akwa ku ləkwa makər! Ləkəma giri ka ɓəla virayeri ar susəmər kucali tədək məva.

²Amma tsu Hyel ata sənta asar ata kəra bərni ni, antə mji ata sə tuwa ka jaɓ tuwa. Kamnyar Urushalima ata ndzi apa vəi kurəmta mji. Antə shanga bərni ni ata pər ka mamshi apa vəi hən kum.

³Hyel ata nggəlar bərni Urushalima. Tsa ata kalaktə ni ka mbwayeri na nal nal, ka dlər ni akwa kəlara bwa.

⁴Urushalima ata sə ndzi apa mambələr mdə na akwa ɓujir bara gari akwa kula, ka kurakari ncinciya, amzhi səɓəla akwa bərbər wa.

⁵Amma mda ata fatə shanga dawayeri ar nga na dlama dlama ni ka təra ka da apatə shambar ana təra ka bərbər. Dawayeri arni ata hwi ka ufti apa ɓaɓiya tə shambar na mwavər an kəta. Təkəma kula səndər ɗa

⁶MTHLAKU na ka Duna ta Shang, ata thlentə shambar yimi na mwavər, ka dləra, ka kənggərantə di. Tsa ata thlentə kəwal, ka u'ur bara ka shamta ɗa, ka msərantə mjir nga.

⁷Antə shanga sojayeri ar tsəɗiyayeri na akwa mpa ka Urushalima, ka shanga kariyir mpar ɗa ata sə sha apatə suni ana sha aka mdə ɗəɗəpa.

⁸Shanga tsəɗiyayeri na ku tsaptədzi kamnyar dlər Urushalima ata ndzi apa mdə na suni abbər tsa akwa səm susəma kara thlatə ka məi. Da ata ndzi apa mdə na ka thləli na suni abbər tsa akwa sa yimi, amma tsa thlatə ka wulyari tsu ul'ulari.

⁹Ləkəma giri ka cakukur ni! Mwa giri ka mdlyangkur ni! Ləkəma giri ka wika kula yimər anap ni! Ləkəma giri ka mwa apa giri ata ndla kula giri ɗar yimər anap!

¹⁰Kamnyar MTHLAKU ku vəngkər ala giri henər mta, ka hartə nca naɓiyayeri natə da an mjir wulsu.

¹¹Antə shanga karapur suayeri na ata sə si tə Hyel ncanta ala giri ku sha, ka ndzi apa kakaɗu na dləɓdləɓari. Wala ma gə kətə ka mwanta aka mdə na asəndə karatə ka pəla alari ka tsa karata, tsa ata pəla, “I amzhi wa, kamnyar dləɓdləɓari.”

¹²Tsuwa ma gə kətə kakaɗu ka mwanta aka mdə na asəndə karatə wa ka pəla alari ka tsa karata, tsa ata pəla, “Kaai, diya I amzhi karatari mai.”

¹³MTHLAKU ku pəla, “Mji ngəni ana pəla abbər da ana vəngkər səli ali, amma təng da ana pəla ata mnya ɗa daci. Kamnyar hangkala ɗa aɗi adzə ra wa, tsuwa adduwa ngəni tə da ana hara ni shang gapani. Təng da akwa hara su na ar kum ka mamshi daci, ka nu tsawur kəkayeri arɗa, natə da ku kəsi akwa kəra ɗa təng ɗəm.

¹⁴Antə apani I ata ndatə mji ngəni ka surndatayeri na ol'ola na ata thlivərantə mda. Tsuwa I ata hilantə ɗəɗukur ar mjir ɗa na ɗəɗu ɗəɗu, kəi shamta səndər mji na kəta abbər da asəndə su ni.”

¹⁵Aiya aka mji na ana ɗuwar su tə da ɗəmha aka MTHLAKU! Da ana hara sur ɗa akwa ɗuwari, ka dzama abbər mda aɗi na ata wutə ɗa wala səndə su tə da akwa harari wa.

¹⁶Da ana shinantə shanga su titikər! Akwa daɓwa tughum ka mdər hənari, mada ɗa an təramtari ri? Tughum ata mzhi yu mnya mdə na həntə ni abbər, “Ga aɗi an nam ra wa” ya? Nənga tsa ata mzhi pəla abbər, “Ga asəndə su tə ga akwa hara ri wa” ri?

¹⁷Aɗi ata fəi wa mtakər kuɓər nfur Lebanon ata ndzi bəbalər fakəu na ata ya su, antə bəbalər fakəu ata ndzi mtakər kuɓər nfwa na ɓɗaku.

¹⁸Ata saka nda twangtwang ata sə mzhi nggatə su tə mdə karata akwa kakaɗu, nca mdlyang tsuwa na ku fəi kula wutə su ata sə kəlardzi ka wutə su.

¹⁹Mji na ka kanaɗi ata sə jaktə nggatə msəra akəla MTHLAKU. Mji na ngguɗi ata sə hara kucali kamnyar su tə Hyel na ɓɗakkarkara ar Israila ata hara ala ɗa.

²⁰Ngəni an ata ndzi tsikəra mji na ana hara bwani aka nvwa ɗa. Mda ata shamta shanga mji na ana hara ɗimikur.

²¹Hyel ata shamta mji na ana hamta seɗa na ɗimi ata kəra mji na ka jirkur. Tsuwa mji na ana ngkatə ta mji na ka jirkur awutə shariyar jirkur, ka thlandər ata kəra ɗa, da ata sə kura.

²²An su na hara tə MTHLAKU na Hyelər Israila, na msərantə Ibrahim akwa bwani akwa pəla abbər, “Mjirna, giri na kəkar Yakub, giri aɗi ata sə jaktə ləkwa səli kəra wa, wala ka kəma giri ncantə damitədzi wa.

²³Kamnyar ma sakatə giri ku wutə maɗangkyar hang ka barkayeri damwa, giri ata sə sənda abbər I an Hyel na ɓɗakkarkara ar Israila. Antə giri ata sə nar səli ali ka thlivər ra.

²⁴Mji na ku sha ata sə nggaɓəla su ka dlu jirkur, mji tsuwa na hir nggungguni ata sə hir ka mdə thlipa ala ɗa su.”