Read bura-pabir Ishaya 3 Bible Online

Ishaya 3 - bura-pabir bible

Ishaya 3

¹Akwa saka ngəni MTHLAKU na ka Duna ta Shang ata thlamta shanga su tə mjir Urushalima ana vəkər kari, tsa ata thlamta susəmər ɗa ka yimər ɗa.

²Tsa ata shamta katsalayeri kəga sojayeri, alkaliyayeri, naɓiyayeri, ɗeaghayeri kəga mji ol'olər tsəɗi.

³Tsa ata shamta mji ol'olər mpa na ata kəra mji ntəfkumari ntəfkumari, mjir tsəɗi na ka səli, mjir hamta sauri, ɗeaghayeri na masəku, ka mjir tsa di.

⁴MTHLAKU ata vu ka maɗashili natə kəra ɗa aɗi ɗəwul wa ndzi mji ol'olər ɗa.

⁵Waskəi ata sə ɗar bwani aka nvwani. Maɗadakwi aɗi ata sə nar səli aka mji na olta da wa, maɗashambar aɗi ata nar səli aka mjir ɗa na ol'ol wa.

⁶Akwa saka nda mji na akwa nyarmbwa duku ata sə carɓəla mdə pal akwa nca ɗa ka pəla alari abbər, “Təng tə ar nga gə ka ləptu na ola, ga ata ndzi olər mburu akwa saka ngəni na mwavər ni, antə ga ata ndzi ola ata kəra fi ngəni.”

⁷Amma tsa ata shinau ala ɗa abbər, “Awa, ya amzhi dlara akwa su ngəni wa. Kamnyar I aɗi ka susəm wala ləptu wa. Antə giri aɗiya vəi ra ola ata kəra giri wa.”

⁸Kamnyar asar ata si ata kəra Urushalima, antə Yahuda akwa ndla! Da aɗi ana ngkər gari na msəra wala hara su na kalkal aka MTHLAKU wa. Da ku kəli səliyirni ata nca mji.

⁹Nca zumzumkur tə da hara ni ata sə ngka ata kəra ɗa sur ɗa. Da ana hara biku ata bəbal kula səli apa mjir Sodom. Da ata nggahari! Da an ndəkərəngkər asar ni ata kəra ɗa sur ɗa.

¹⁰Pəla aka mji na ana hara su kalkal abbər arɗa da ata nggatə msəra. Da ata səm riɓar kəthlərər ɗa.

¹¹Amma sha an wutə kəmanggar! Kamnyar su tə da hara aka mji antə mji ata sə hara ala ɗa.

¹²Wala tə da an mjirna maɗangkyar an akwa pwar ɗa, tsuwa mwanki an ka kuthlikur ata kəra ɗa. Ai mjirna, mji na akwa pwar giri ni akwa shamta giri. Da akwa ndəndatə hangkala giri ata kəra laku tə kalkal ka giri nuwa.

¹³MTHLAKU ku ɗəmhədzi kamnyar hara shariya aka mjirni. Tsa an alkali na olta shang.

¹⁴MTHLAKU ata hara shariya aka mjir pwara ka mji ol'olər Israila. Tsa ata pəla, “Giri an famnya sur fakayeri ar anap, ka nghyantə kəyayeri ar giri ka su tə giri dlutsa akəla mji turtura.

¹⁵Man tə giri tamatə ri, tə giri ata hadləmta mjirna ka fwavu kəma mji turtura ata di ni?”

¹⁶Tsuwa MTHLAKU ku pəla abbər, “Wul giri laku tə mwankir Urushalima ka hirkər akwa! Da ana mwar karidzi ka ndəra wulya ɗa. Da ana hatə lenduwayeri na ata kənggər ka tuwa ata wulya səla ɗa, ka mwa ka ncar ləka, akwa pakəla ka ɓəgəldzi.

¹⁷Amma I na MTHLAKU ata vu ka kulkulni tsuhumta shishir kəra ɗa ɗanɗan, ka zhar ashira ɗa ata bəbal.”

¹⁸Vir nda MTHLAKU ata sə ndəkəmta mwankir Urushalima ka sur dəɓar ɗa na ɓɗakɓɗaku. Tsa ata ndəkəmta ɗa ka mədlər wulya səl, ka gənar mbwa kər, ka gənar wulya,

¹⁹ka sur thləm, ka nggirkumi, ka adikwa.

²⁰Tsa ata ndəkəmta ɗa ka ɗangkwali, ka ausa shahu, ka gyalle, ka kwali tulari, ka məsəpar ɓzərngkwakur,

²¹ka lenduwar tsi, ka lenduwar kucir,

²²ka zhaɓər ləɓəla, ka adikwa, ka ləptu, ka thləvur kəsi ata tsi,

²³ka zhaɓi na yarang yarangnga, ka zhaɓər lilin, ka zhaɓər bar kər, ka shawal.

²⁴Ata vəya ka dza ɗa shiwur tulari, da ata shiwur su na ɗimi. Ata vəya zhaɓər mbwi kusar, da ata mbwidzi ka səwa. Ata vəya ɗəmkər na ɓɗaku, da ata ndzi ka hyalang. Ata vəya ha ləptər gəna, da ata ha dasa. Ata vəya ka da wutə səli, sur səli an ata wutə ɗa.

²⁵Mda ata tsəgəi shilər ɗa na kustayeri akwa mpa, wala mji na katsala ta shang ata mta akwa mpa.

²⁶Antə mjir bərni ni ata sə tuwa ka jikatuwa, ka bərni ni sə ndzi apa mwala natə maɗa'ni ku shamtadzi karkar, tə tsa ndzəndzi ata di akwa jikatuwa.