Read bura-pabir Ishaya 30 Bible Online

Ishaya 30 - bura-pabir bible

Ishaya 30

¹MTHLAKU ku pəla aka mjirni na ka kər ɓəɓalkur, “Sha ku wutə giri kamnyar giri ku nggəlar ndərərna. Giri ana nu sauriyeri natə aɗi I an hamta ala giri wa, ka mbwi alkawal kula giri yu ra, ka hara biku ata kəra biku.

²Giri ana mwari ahar Masar kamnyar bara dlara kula giri tsəkwitə ra. Giri ana mbərsa ka kuthli abbər tsa ata mzhi mbantə giri, antə giri ana bara ka Masar an wul kəra giri.

³Amma atar mbərsa ka vəkər ka Masar, giri ana sə ləkwa sur səli ka mji rutə giri.

⁴Kamnyar wala tə tsa ka ajiyayeri arni ahar Zowan, ka wakilayeri arni ahar Hanes,

⁵giri ata sə ləkwa səli, kamnyar da aɗi ata mzhi dlar giri wala raka wa.”

⁶Nggədza labar Hyel na ata kəra mwaɓiyayeri na akwa mtakər anəm, “Wakilayeri ni akwa mwa ka hangkal ka da təramta akwa mtakə na mwavər na ka tsəngiyayeri, ka fufukər kəga pwapu na ana fəla akwa. Da putə gənar ɗa ka cautayeri na ɓɗakɓɗaku ata kwarayeri ka dləkəmauwayeri akwa mwantari aka tsəɗi na amzhi dlar ɗa wa.

⁷Masar ana hara ala giri alkawal ndzang mi wa su aɗi tə tsa amzhi dlar giri akwa wa. An su na hara tə I vəta alari thləm, ‘Mwaɓəl Gundi’ ni.”

⁸Hyel pəla ali abbər kəi rəbutə ɗimikur tə mjir Masar hara ata pampəlam ka akwa kakaɗu, kamnyar ka mdə sə ɗangtə ɗimikurər ɗa ni ba saka madi.

⁹Kamnyar da mji na ka kəra ɗa ɓəɓal, ka mjir thlandəra. Da aɗi ana kələngkər aka su tə MTHLAKU thlipa ala ɗa wa.

¹⁰Da ana pəla aka naɓiyayeri abbər, “Hartə giri mnya giri. Yeru aɗi ata bara ka giri gari ata kəra su tə Hyel ncanta ala giri wa, wala ngkər labar ata kəra jirkur wa. Pəla ala yeru su na ata kəskəra yeru, wala suari aɗi jiri wa.

¹¹Fara girdzi kazhar ala yeru laku usa! Yeru aɗi akwa bara ka yeru jaktə nggatə labar ata kəra Hyel na ɓɗakkarkara ar Israila ni wa.”

¹²Antə nggədza su tə Hyelər Israila pəla ata kəra ɗa: Kamnyar tə giri ku rutə ndərərna, ka ra mbərsa ka mwavərkur ka thlandəra,

¹³antə giri ku hara biku. Giri ndzi apa banggwa na ɗukɓəladzi ka ntaudzi, abaka ndla. Aɗi ata fəi wa tsa ata ndla ka ɓəgəlwadzi akwa məcikər nca.

¹⁴Mda ata hadləmta giri ɗimi ɗimi apa tughum həi, natə wala cangtangari aɗi ata mbila na amzhi kətə hakthlir u'u, wala mzhi kətsə yimi akwa jiɓə wa.

¹⁵MTHLAKU na ka Duna ta Shang, Hyel na ɓɗakkarkara ar Israila, akwa pəla, “Ngka giri adzə ra ka giri mbərsa ka iya, antə I ata mbantə giri. Apani antə hangkala giri ata pwi antə giri ata wutə duna.” Amma giri aɗi hir wa.

¹⁶Giri pəla, “Awa, yeru ata huyimtari ata takwayeri na ɓəɓatu.” Antə jiri giri ata sə hwi ata abbər ka giri msəra. Amma dawayeri ar giri ata sə kədlə giri ka maɗa' taku na ɓəɓatu ta ar giri!

¹⁷Sojar ɗa duku ata sə kədləmta sojayeri ar giri dəpu pal. Ma da an ku mwantə ntəfu da ata titiləmta giri shang. Giri ata sə mbila apa zwalər alam na mbil duku shini ata kər gar.

¹⁸Amma ba kulini MTHLAKU akwa sək ka giri si adzə ni ka tsa ncanta ala giri laku tə tsa hir giri akwa ka kətadzə giri. Kamnyar MTHLAKU an Hyel na ka jirkur. Da ka barka mji na ana mbwi ɗəffa ɗa ka səkə ni ka tsa dlar ɗa.

¹⁹Giri na mjir Urushalima, giri aɗi ata jaktə tuwa kəra wa. MTHLAKU ana kətadzə mda, antə ma giri ku tuwa alari abbər ka tsa dlara, tsa ata dlar giri.

²⁰Wala tə MTHLAKU akwa hamta ala giri bwani ka ɗəffə ɓzəɓza apa tsa an buradi ka yimi ar giri, ba kulini tsa ata ndzi adzə giri, ka thlipa ala giri. Giri ata wutə MTHLAKU na maləmər giri ka nca giri sur giri.

²¹Ma giri ku pəra abwa mazəm wala abwa matsəkar, giri ata nggatə kuraku laga aghəla giri na ata pəla abbər, “Nggədza laku ni, ngka giri ka giri nu abwa ni.”

²²Antə giri ata sə huzamta haptayeri ar giri natə giri nam ka adzərfa ka fəi dza ɗa ka dinar ni. Giri ata sə pumta ɗa apa mzhiku, ka pəla, “Tərar girdzi ali usa!”

²³Kəlara sakatə giri ku thləkamta hwulfər giri, MTHLAKU ata thlentə yimi na ata ptsantə ɗa ka kəlantə ɗa. Antə di ata ya su ka hamta ala giri susəma hang. Tsuwa giri ata sə wutə vəi ɓəla hang aka mwaɓiyir giri.

²⁴Gyal thlayeri ka kwarayeri na ana kukul fakəu ata sə səm bina ka buktər na ɓɗak ta shang.

²⁵Vir nda, ma sakatə giri ku ngkəi diyayeri na ka duna, ka kurəmta dawayeri ar giri, antə yimi ata sə hwi səɓəla akwa kəlara gar ka ɗəɗəgəl.

²⁶Thliya ata sə mbəla parakəu apa pci, antə pci ata sə jakəngkər parakər mbələrni ka bwa murfa. Parakərni ata ndzi dunar parakər mbələrni na ar vir murfa tə mdə tsapta. Ngəni an su tə MTHLAKU ata sə harari, sakatə tsa ku baɗitə kəcə mbəlkayeri tə tsa puta aka mjirni ni, ka mbantə ɗa.

²⁷Wul giri su! MTHLAKU ku thlatə ciju akwa si ka ɗəffari akwa mba ni bwarbwar. U'u ka ɗer an seɗar bwarbwarkur ɗəffari na ku ɓzi. Ma tsa ata gari, ndərərni ana səɓəla apa mbar u'ur mtakəu.

²⁸Mpikərni ana səɓəla apa pərtu na kəl wulya mda, ka tsarəmta shanga dawayeri arni. Tsa ata kətərɓəla tsəɗiyayeri na ka kər olkur ka sur kətər na ana hilantə su. Tsa ata mbwau lanjam akwa mnya ɗa, ka kuri ka da.

²⁹Amma ar giri, giri na mjir Hyel, giri ata sə hara har kucali, apatə giri ana hara hwatu akwa tahakər vir kucali. Giri ata sə nghyi ka kucali, apa mdər mbur shwala na akwa pwar mjir mwari akwa Urushalima, mji na akwa ləmta akwa garər MTHLAKU, na ana mbuli mjir Israila.

³⁰MTHLAKU ata vu ka shanga mji nggatə kurakari na ka səli. Mda ata wutə sakatə tsiyari abaka tsa su sakatə ɗəffə bwarbwarkurərni ku hara apa u'ur mtakəu. Ɗəffə bwarbwarkurərni ata səghəi ata kəma duku ka dlərər hyel, handzəkəla, ka yimi na ata tər ka ɓzamtə su.

³¹Mjir Assiriya ata sə yakata sakatə da ku nggatə kuraka MTHLAKU, ka wutə ni akwa dlaɓu mji ka zwal liya.

³²Sakatə MTHLAKU akwa ləkəma ka dlaɓu ɗa, mjirni ata ləkəma ka tsa kəcaikəcai ka guləm. Hyel surni an ata mpa mjir Assiriya.

³³Təng waci vəi aɗi tə mdə ɗəmhə kamnyar mbamta kuthlir Assiriya ka u'u na ola. Vəi ni bau ka zurang tə mdə patə udzəm na saɓəl saɓəl. MTHLAKU ata sə mpika antə u'u na mwavər, apa u'u na ana səɓəla akwa kər gar, ata səɓəla akwa kucirari ka tamtə vəi ni.