Read bura-pabir Ishaya 31 Bible Online

Ishaya 31 - bura-pabir bible

Ishaya 31

¹Sha ku wutə mji na ana ra bara dlara akəla Masar! Da ana mbərsa ka takwayeri ar Masar, ka hangkur takur wagənayeri, ka mjir fəl takwayeri ni kamnyar da ɓəɓal. Amma da aɗi ana mbərsa ka MTHLAKU na Hyelər Israila wa, wala bara dlara akəlari wa.

²Amma ai Hyel aɗi bəlkəu wa! Tsa aɗi ana pali su tə tsa pəla wa, antə tsa ata thlenta asar. Tsa ata hara bwani aka mji na ɗimi ɗimi ka mji na ana mbwa kir ala ɗa.

³Ai mjir Masar ni aɗi Hyel wa, da mji tsu apa mburu. Takur ɗa tsuwa an taku na ndzangari, aɗi Hyel an thlentə ɗa wa. Antə kəlara sakatə MTHLAKU ku baɗitə ncantə dunarni, tsa ata ɓdləmta mjir Masar ka shanga mji na ana dlar ɗa. Antə shanga ɗa ata kurəmtadzi ata kəma duku.

⁴MTHLAKU ku pəla ali, “Ma sakatə tsəngi ku tsi təma, wala ma mjir ɓəla an hara kuraku apa mə ri, tsəngi ni ata ləkəma ka ɓɗə kumərni kula thlivəra. Apani tsuwa I na MTHLAKU na ka Duna ta Shang ata si kamnyar sək kəra Gar Sihiyona, sur ngkatə ra aɗi wa.

⁵Tsu apatə ɗika ana kadla ata kəra mbwarni kamnyar ɓəlatə maɗa'ni, antə I na MTHLAKU na ka Duna ta Shang, ata harari aka Urushalima ka mbuli ni.”

⁶Antə giri na mjir Israila, wala tə giri ku hara biku ka hara nggyarɗəkur ali, kulini ngka giri adzə ra.

⁷Kamnyar ata saka nda, shanga giri ata sə pumta haptayeri natə giri nam ka adzərfa ka dinar.

⁸“Mda ata kurəmta mjir Assiriya, amma aɗi ka dunar ɗəva wa. Maɗadakwiyir ɗa ata hwi abbər nuhum da msəra, amma mda ata ngkəi ɗa ka pu ɗa akwa kəthlər mafakur.

⁹Kuthlir ɗa ata sə yakata ka hwi, antə sojayeri arni na ol'ola ata sə thlivər ka hwi kazhar alamər mpa arɗa.” Ngəni an su tə MTHLAKU ku pəla, MTHLAKU na ka lindər u'urni na mwavər ata Gar Sihiyona.