Read bura-pabir Ishaya 32 Bible Online

Ishaya 32 - bura-pabir bible

Ishaya 32

¹Vir laga mda ata sə wutə kuthli na ata hara kuthlikur kalkal, ka mji ol'olər tsəɗi na ata pwar mji na akira ɗa ka jirkur.

²Kəlara pal akwa nca ɗa ata ndzi apa mbwa tə mda ana ɗuwardzi akwa, ka vəi ɗuwardzi akwa sakar shambar yimi. Mji ata nggatə msərakurərni apa zərkə na akwa mtakəu, apa pela na ola na ana hamta shanggur akwa sakar pci akwa mtakə na kula nfwa.

³Antə shanga mji na ana wutə su ata sə kəlar nca ɗa ɓɗaku, tsuwa mji na ana nggatə su ata sə psi thləma ɗa.

⁴Antə wala mji na ana huva su, da ata sə nu su ka hangkal. Mji na ana kəka ata sə ngkərɓəla su taktar ata bəbal.

⁵Sakanda, mda aɗi ata jaktə nar olkur aka mdə na bəlkəu wa, wala nar səli aka mdə na hilhilari wa.

⁶Kamnyar mdə na bəlkəu ana gari caku caku, ka ɗəmhə ɗimikur. Tsa aɗi ana hara su na kalkal wa, wala mnya na kalkal ata kəra MTHLAKU wa. Tsa ana ngkatə susəma aka mji na ka mi, ka ngkatə yimi aka mji na ka thləli.

⁷Mdə na hilhilari ana ndzi kəmanggar, antə tsa ana hara suayeri na ɗimi ɗimi. Tsa ana thlandəra ka hara bwani aka mjir tursu, ka ngkata ala ɗa su tə kalkal ka da wuta.

⁸Amma mji na ka səli ana ɗəmhə su na kalkal ka thləthlata ata kəra su na ka jirkur.

⁹Giri na mwanki na ana kətə su kasəla, tə su aɗi na ana damitə giri wa, psi giri thləm aka su tə I ata pəlari.

¹⁰Nuhum kulini giri aɗi ka sur damitədzi wa, amma apta saka pani giri aɗi ata wuta anap akwa fakər giri ka giri ɗəmi wa, antə giri ata sə yakata.

¹¹Giri ku tsəli ka ndzi kula damitədzi. Amma kulini ka giri thlivər ka yakata! Fi giri zhaɓər giri, ka giri mbwatə dasa ata kusara giri.

¹²Dək giri kərathla giri kamnyar ɗəffə ɓzəɓza, kamnyar mda ata ɓzamtə fakayeri ar anap ka shanga fakayeri ar giri,

¹³kamnyar thlali kəga mtəhəra an ata sə kəla akwa. Wala kucali na akwa kəyayeri na akwa Urushalima ata sə kura.

¹⁴Wala kəyir kuthlikur na ɓəɓal ta shang mda ata sə hwi kazhari, mda ata sə titila kazhar bərni ni. Məciɓayeri ka mbwayeri na ka duna ata sə ndzi kur mwaɓi mtakəu ba saka madi. Da ata ndzi vəi kadlər kwaramtaku ka vəi ɓəla təma.

¹⁵Amma Hyel ata sə jaktə thlenta ala mburu mambələrni. Antə mtakə ngəni ata sə jaktə ndzi vəi kuɓa, antə vəi kuɓə ni ata sə ndzi apa kuɓər nfwa ka ya su.

¹⁶Antə kəlara bwa akwa tsəɗi ni ata sə ndzi ka jirkur ka hara su na kalkal.

¹⁷Kamnyar tə shanga mji ata sə hara su na kalkal ka jirkur antə tsəɗi ni ata sə ndzi akwa msərakur ba saka madi.

¹⁸Antə mjir Hyel ata sə ndzi lapiya ka msərakur akwa kəyayeri arɗa, kula su damitə ɗa,

¹⁹wala tə handzəkəla ata sə dlaɓumta kuɓər nfwayeri, ka huzamta bərni ni.

²⁰Hyel ata vədzə barka aka mjirni antə kəlara vəi tə da thləkamta hwulfər ɗa ata, suari ata ya ka duna. Da ata sə ɓəla thlayeri arɗa ka kwarayeri arɗa akwa vəi na ka kusar ɓɗaku.