Read bura-pabir Ishaya 33 Bible Online

Ishaya 33 - bura-pabir bible

Ishaya 33

¹Sha ku wutə giri mjir Assiriya! Giri ku ɓəli yeru ka famnya sur yeru, wala tə mda aɗi na ɗar ɓəli giri wala famnya sur giri wa. Amma aghəla tə giri ku ɓəli yeru ka famnya sur yeru, antə mda ata sə ɓəli giri ka famnya sur giri tsuwa.

²MTHLAKU, kara dlar yeru, kamnyar yeru akwa vəkər ka ga. Kara ɓəlatə yeru tədək viri, ka gə mbantə yeru akwa sakar bwani.

³Kəlara sakatə ga ata mpa kamnyar yeru, ma dawar yeru ku nggatə kuraka ga da ata titila ka hwi.

⁴Mjir Urushalima ata tsaɓəngkərdzi ata kəra Assiriya apa baɗəm, ka famnya kariyir ɗa apatə ntsəkwa ana mbutə fakə ka ngyarəmnya.

⁵MTHLAKU an ola! Tsa andzəndzi akwa vəi na amta ta shang. Tsa ata vu ka mdə hara su na kalkal ka jirkur akwa Urushalima.

⁶Tsa ata tsəlpi mjirni akwa saka na mwavər, ka mbantə ɗa. Tsa ata hamta ala ɗa ɗəɗukur ka sənda. Thlivər ɗəffa MTHLAKU an ashira barka ngəni.

⁷Kulinari, wakilayeri ar giri na ahar Assiriya, akwa kəɗar mwari adzə kuthlir ɗa ka tuwa abbər ka tsəɗiyayeri ni shwalatədzi.

⁸Lambatayeri ar giri ku ndzi kula mda, mda aɗi ana nggitə nuwari kəra wa. Mjir Assiriya ku ɓəli alkawalər ɗa ka huzamta gari tə da ɗəmha. Da aɗi ana wutə səliyir mdə wa.

⁹Shanga tsəɗi Israila ku ul kula ya su. Kuɓər nfur Lebanon ku thlarəmtadzi ka tətəɓumtadzi. Bəbal mtakər Sharon na ana ya su kulini ku mti ka ndzi gapani. Tsuwa nfwayeri na akwa kuɓər nfur Bashan ka Karmel akwa pumta thlaliyir ɗa.

¹⁰MTHLAKU akwa pəla aka tsəɗiyayeri, “Kulini I ata hara su laga na ata ncantə dunarna, ka mdə sənda abbər I ka kuthlikur.

¹¹Giri aɗi ana dzam su na pwa wa, antə shanga su tə giri akwa harari ata ndzi gapani. Mpikər giri ata shina ka u'u ka mbagamta giri.

¹²Antə mjir giri ata sə mbamtadzi tuktukku ka ndzi pənju, tsu apatə mda ana nthləmta mtəhəra ka mbamta akwa u'u.

¹³Ka shanga tsəɗiyayeri na ciju ka na kudzəha nggatə su tə I hara, ka səndə jili duna natə I kəgari.”

¹⁴Mji na asəndə Hyel wa ka shanga mjir biku na akwa Urushalima akwa thlivəra ka yakata. Da akwa pəla, “Wan ta mzhi nggitə jili u'u ngəni na amtəmtə wa ni ja?”

¹⁵Giri ata mzhari ma giri ata pəla su na kalkal ka hara su na kalkal, ma giri ku nggəlar gənar ɗimikur ka zhar ta dlu sur dzəɓ mnya, ma giri ku zhar tsi mda ka nggəlar ta hara shanga ɗimikur.

¹⁶Nayeri ni an mji na ata mzhi ndzəndzi akwa Urushalima. Pelayeri na ol'ola akwa garayeri an ata ndzi vəi ɗuwardzər ɗa na lapiya. Mda ata hamta ala ɗa susəma ka yimi.

¹⁷Giri ata sə jaktə wutə kuthli na ata hara kuthlikur akwa tsəɗi na akwa kəlardzi kəlara bwa.

¹⁸Labar ar thlivər mjir dlu tsəma ka mjir wul ashira tsəɗi ata sə ndzi labar na waci.

¹⁹Giri aɗi ata jaktə kəɓa ka jili mji na ana hara su apa mwaɓi ni wa. Da an mji na ka kər olkur na ana kəka ka mnya jili laga tə mda anggaɓəla wa.

²⁰Wul giri Sihiyona, bərni tə mburu ana hara kucali ka hu Hyel akwa. Giri ata wutə Urushalima, bərni damwa aɗi na msəra apa tsa wa. Tsa ndzi tsu apa tent tə mda ana nci kula tərari, natə səlayerari aɗi ana ntsuɓəladzi wa, wala ka suwayerari nthləgəmtadzi wa.

²¹Hyel ka kuthlikurərni ata ndzi adzə mburu. Tsa ata ndzi apa manda na bau, na ata ngkamta ta dawar mburu amzhi ntamtari ka sharər ɗa ka mzhitə mburu.

²²Kamnyar MTHLAKU an Alkaliyir mburu, ka kuthli ata kəra mburu. Tsa ata ndzi ka kuthlikur mburu ka tsəlpi mburu.

²³Amma ar giri, tsəɗiyir giri ku ndzi tsu apa shar na mpəlmpəlari, na ka jikwarari akwa kənggəra. Dawayeri arni ata pwa ata kərari, ka famnya surni ka ndəkəuwa, tə wala nggurdəkəi ata wutə bwarni.

²⁴Antə mdər Israila aɗi wala duku na ata sə jaktə tuwa shilkər kumər dzari wa, kamnyar MTHLAKU ata tifəmta ala mburu bikər mburu.