Read bura-pabir Ishaya 34 Bible Online

Ishaya 34 - bura-pabir bible

Ishaya 34

¹Asər giri, shanga giri na akwa tsəɗiyayeri! Tsaptə girdzi, ka giri psi thləma giri. Ka duniya, ka shanga su na akwa, shahədzi ka da nggatə ndərərna.

²Ɗəffa MTHLAKU ku ɓzi adzə shanga tsəɗiyayeri kəga sojayeri arɗa. Antə tsa ata vu ka mdə shamta ɗa karkar.

³Mda ata pumta mshiyir ɗa ka da hiɗa ka shiwurari ndlətə duniya. Mamshir ɗa ata sə hwi səghəi ata garayeri.

⁴Pci ka thliya ka sasəlkayeri shang ata sə ɓushirəmtadzi. Vəi na amtazi ata sə pərtədzi ka sha apa kakaɗu tə mdə pərta, antə sasəlkayeri ata sə pughəidzi apatə thlaliyir anap wala kamnda ana ɓumtadzi.

⁵Aghəla tə MTHLAKU ku kuri ka vəi na amtazi, tsa ata pwa ata kəra Edom, tsəɗi natə tsa ku kurtə hamta abbər ka mdə shamta.

⁶Katsakarərni ata sə pər ka mamshir təmayeri ka kwiyayeri, ka hartədzi ka malər kulsha gamayeri. Kamnyar MTHLAKU ata kurəmta mjir Edom hang, ka hara saɗaka ka da akwa bərniyir Bozra.

⁷Mda ata sə kurəmta mji ol'olər Edom na ka duna apatə mda ana kurəmta gyal mtakəu. Tsəɗiyir ɗa ata ta mamza pitu ka mamshi, ka həyir ɗa ndlə ka mal.

⁸Kamnyar ngəni an sakatə MTHLAKU ata ntə dawa aka mjirni, sakatə Edom ata ɗar bwani kamnyar su tə tsa hara aka Israila.

⁹Thlyaghayeri na akwa Edom ata sə ngka mənggəl apa vina, antə tsəɗi ni swakti ata sə dlu u'u ka mbamtadzi.

¹⁰Tsa ata mba təpci ka aviri, ka ləkəma ka hara ɗer. Antə tsəɗi ni ata ndzi hilhilari məva ka məvangkər, mda aɗi na ata hir təramta akwa wa.

¹¹Kapthlaramwapu, ka mantsaha, ka nghyinghyi ka zəlaku an ata sə dlutsə tsəɗi ni. Kamnyar MTHLAKU ata ndəndatə giri ka shamta tsəɗi ni.

¹²Su aɗi anda na ata mzhi ncanta abbər mjir Edom ka kuthlikur wa. Kamnyar shanga mji na ol'ola ata kəra tsəɗi ni ata sə kura.

¹³Thlali kəga mtəhəra ata sə kəla akwa kəyayeri ar kuthlikur ka diyayeri na akwa katangga, antə da ata sə ndzi vəi ɓukcir kilamtakayeri ka vəi piyir zhimnakayeri.

¹⁴Anda antə mwaɓi mtakəu ata sə kadla, kwimtakayeri ata sə kəgadzi. Anda antə suayeri na ana mwa aviri ata sə ghərəmtaghəra.

¹⁵Anda antə nghyinghyayeri ata sə la mbwar ɗa, ka psə thlithli, ka tsətsamta, ka kəlanta. Tsuwa kutəkcivayeri ata si suɗsuɗa ka nvwani ka tsaptədzi anda.

¹⁶Bara kakaɗər MTHLAKU kara karatə su tə mdə pəla ata kəra suayeri na ka mpika. Mda aɗi ata ni ka wala pal akwa nca ɗa wa, tsuwa aɗi na ata ndzi kula nvwani wa. Kamnyar MTHLAKU an ɗəmhə ɗa apani, antə tsa ata paktə da ata kəma duku.

¹⁷MTHLAKU ata ndəkəi tsəɗi ni ala ɗa, ka hamta aka kəlara mda bwa pal. Da ata ndzi akwa tsəɗi ni məva ka məvangkər, antə tsəɗi ni ata ndzi arɗa ka kəra ɗa ba saka madi.