Read bura-pabir Ishaya 35 Bible Online

Ishaya 35 - bura-pabir bible

Ishaya 35

¹Mtaku na ul'ulari kula yimi ata sə nggatə msəra, mtakə tə kusar ana ptsa akwa wa ata sə pukdla hang ka hara kucali.

²Jiri mtakə ni ata sə pukdlə hang, tsa ata hara ha, ka kucali ka kuraku. Tsa ata ngka ɓɗaku laga apa Gar Lebanon, ka ya su apa Gar Karmel ka Mular Sharon. Kəlara mda ata sə wutə səliyir MTHLAKU, ka wutə kuthlikurər Hyelər mburu.

³Dunautə tsiya mdə na ku ghəri, ka ɓunja mdə na ku yakata.

⁴Pəla aka mji natə dza ɗa ku mti, “Ka giri ndzi ɓəɓal, giri aɗiya thlivər wa! Kamnyar Hyelər giri akwa sə mbantə giri, tsa akwa səntə bwani aka dawayeri ar giri.”

⁵Tsa ata kəlar nca mdlyang, ka da wutə su, ka kəlar thləma twangtwang ka da nggatə su.

⁶Nggurdəkəi ata sə fəla ka ɓathla, antə mji na ka mnya dləɓdləɓa ata sə kucali ka hara ha. Kamnyar kucirkila ata sə ntula akwa mtakər janggi, ka zərkayeri sə ɓəla akwa hamada.

⁷Vəi wuyaku na ana təl bwarbwar ata sə ndzi kufa, antə bwa na ul'ulari ata sə nghyi ka kucirkilayeri. Kusar vəi jijaɓu kəga duwathlu ata sə kəla, akwa vəi ndzəndziyir kilamtaku.

⁸Mda ata sə ɓəli laku na ola anda, tə mda ata sə kəga ni Laku na Ɓɗakkarkara. Mji na dlimbur aɗi ata sə nuwari wa, cakwayeri aɗi ata mzhi shamta mjir nu laku ngəni wa.

⁹Tsəngi aɗi ata ndzi anda wa, tsuwa mwaɓi na mwavər aɗi ata mwari anda wa. Tar mji natə MTHLAKU ku mbantə ɗa, an ata sə nu laku ni.

¹⁰Antə mji natə MTHLAKU ku pəli ɗa, da ata sə mzhitə Urushalima ka msərakur, akwa hara ha ka kuraku kamnyar kucali. Da ata ndzi ka kucali ba saka madi, ka msər ta ɗəffə ɓzəɓza ka damitədzi ba saka madi.