Read bura-pabir Ishaya 36 Bible Online

Ishaya 36 - bura-pabir bible

Ishaya 36

¹Akwa sakatə Kuthli Hezekiya ku hara məva kumnya nfwar akwa kuthlikur, antə Kuthli Sennakerib na ar Assiriya ku dlər bərniyayeri na ka duna akwa Yahuda ka nggyari ɗa.

²Antə kuthlir Assiriya ku thlentə olər sojayeri arni ka sojayeri hang ka da zhar Lakish ka mwari adzə Kuthli Hezekiya ahar Urushalima abbər nuhum tsa tubi. Sakatə da mzhitə Urushalima antə da thləthlata ata laku kudzəhə ka mbwar Mjir Kəcir Kwaba, na akwa tsikəra thluhwa na mwantə yimi akwa kufa na amta.

³Antə wakilayeri makər ar kuthlir Yahuda ku ləɓəla ka kəɓa ka da. Da an Eliyakim na ɓzər Hilkiya, natə tsan olər pada, ka Shebna na sakatariyir kuthli, ka Yowa na ɓzər Asaf, natə tsan ola ata kəra kakaɗayeri na akwa kəi kuthlikur.

⁴Antə olər sojayeri ni pəla ala ɗa ka da pəla aka Hezekiya abbər, “Kuthli na Ola ar Assiriya akwa pəla, Man tə gə ntsari tə ga aɗi akwa thlivər wa nə ri?

⁵Gə na wuta apa mnya ndzang an ɗəɗukur ka dunar mpa ya? Wan tə ga akwa vəkər kari ri, tə har ga ata karidzi ali ni?

⁶Ga akwa mbərsa ka Masar. Amma mbərsa ka Masar an kəkal ka mdə na akwa rwatədzi ata duwathlu abbər tsan zwalər mwarni. Tsa ata mbakdlya ka ntsəvəi tsiya kəlara mdə na rwatədzi ata. Kuthlir Masar aɗi mdə natə mda ambərsa ka tsa wa.

⁷Ta ga asə pəla ga akwa mbərsa ka MTHLAKU na Hyelər giri! Kamnyar I na wuta apa tsu Hyel ndaga antə Hezekiya huzamta mashiɗərni ka bagaɗi alari ni! Hezekiya an psəmnya abbər ka shanga mjir Yahuda vəngkər səli ata bagaɗiyir hamta saɗaka na akwa Urushalima daci.”

⁸“Kuthlir Assiriya ata hir ka giri ngkərhə su tə tsa ata na ga ata vəyari. Tsa ata hamta ala gə taku dəpu aru suɗa, ma ga ata mzhi wutə mjir fəlari.

⁹Ka sojayeri ar nga ngəni raka ni, giri amzhi nggyari sojar yeru na raka ta shang wala duku wa. Antə ga ana wuta apa takwayeri ka mjir taku tə ga akwa vəkər kari ahar Masar ni ata sə kuri ala gə wujir ya?

¹⁰Ga ana wuta apa I dlər tsəɗiyir giri ka nggyari ni ka dunar ɗəva daci kula tsiya MTHLAKU akwa ya? MTHLAKU surni an pəla ali abbər kəi dlər tsəɗiyir giri ka shamta ni.”

¹¹Antə Eliyakim, ka Shebna, ka Yowa pəla aka olər sojayeri ar Assiriya, “Gari ala yeru akwa mnya mjir Aramiya, kamnyar yeru ana nggata. Ga aɗiya gari ala yeru akwa mnya Ibrani wa, ta mji na andzəndzi ata katangga ni asə nggata.”

¹²Amma olər sojayeri ar Assiriya ni pəla, “Giri na wula apa kuthlir yeru thlentə ra adzə giri ka kuthli ni daci ya? Awa, tar ka mji na andzəndzi ata katangga ni nggata. Ma da hir ka da tubi, ma apani wa da ata kwasə civər ɗa ka sangkər kinər ɗa tsu apatə giri ata sə harari.”

¹³Antə soja na olta shang ni haptə kuraku ka pəla akwa mnya Ibrani, “Psi gir thləma giri aka ndərər kuthli na ola, kuthlir Assiriya!

¹⁴Kuthli ni pəla, ‘Giri aɗiya hir ka Hezekiya pwaktə giri wa, kamnyar tsa aɗi ata sə mzhi msərantə giri wa akwa tsi wa.

¹⁵Antə giri aɗiya hir ka tsa zwalitə giri ka giri mbərsa ka MTHLAKU wa. Giri aɗiya mbərsa abbər MTHLAKU ata msərantə giri ka ngkatə ta kuthlir Assiriya anggyari giri wa.’ ”

¹⁶“Kuthlir Assiriya akwa pəla, ‘Giri aɗiya ngga Hezekiya wa! Səɓəla giri ka giri tubi ali, antə I ata zhar giri ka giri ləkəma ka səm anap, ka kamndə na akwa fakayeri ar giri, ka sa yimər jiɓər giri.

¹⁷Giri ata ləkəma ka harari apani, har tar ma I ku si ka fatə giri ka mwantə giri akwa tsəɗi damwa tsu apa ngəni, tsəɗi na ka mthli ka yimər anap, tsəɗi na ka susəma ka fakayeri ar anap.

¹⁸Giri aɗiya psi thləm aka Hezekiya wa, apatə tsa akwa pwaktə giri ka pəla, “Ai MTHLAKU ata msərantə yeru” ni wa. Nənga giri ku nggata abbər haptər tsəɗi laga aɗi na ku ɗar mbuli tsəɗiyirni akwa tsiya kuthlir Assiriya ri?

¹⁹Man wutə haptayeri ar Hamath, ka Arpad, ka Sefarvayim ri? Da ku mzhi mbuli Samariya akwa tsi ya?

²⁰Hyelər mjir tsəɗi madi akwa nca tsəɗiyayeri ni an mzhi mbuli tsəɗiyirni akwa tsi ri? Kaha, tə aɗi wala duku wa, man hara tə giri ata mbərsa abbər MTHLAKU ata mbuli Urushalima akwa tsi nə ri?’ ”

²¹Amma mjir Hezekiya ku dləɓ səri apatə tsa pəla ala ɗa ka da hara, da aɗi shinangkər ala ɗa wa.

²²Antə Eliyakim, ka Shebna, ka Yowa ku kukwahəmta ləptər ɗa kamnyar ɗəffə ɓzəɓza, ka mwari ka jikata aka kuthlir ɗa su tə olər sojayeri ar Assiriya ni ku pəla.