Read bura-pabir Ishaya 37 Bible Online

Ishaya 37 - bura-pabir bible

Ishaya 37

¹Təkəma sakatə Kuthli Hezekiya nggatə labar ni, ɗəffari ku ɓzi. Antə tsa kukwahəmta ləptərni, ka hatə dasa, ka mwari akwa mbwar vəngkər səli aka MTHLAKU.

²Tsa thlentə Eliyakim, natə tsan olər pada, ka Shebna na sakatariyir kuthli, ka pristayeri na ol'ola aka naɓi Ishaya na ɓzər Amoz. Shanga ɗa ku hatə dasa kambəla təra.

³Sakatə da ku mwari antə da jikata aka naɓi Ishaya su tə Kuthli Hezekiya pəla, “Ashina yeru ata ɗar bwani. Mda ata ɗi yeru, ka nggəl yeru ka kəli səliyir yeru. Tsəɗiyir yeru swakti ku ndzi apa mwala na abaka ya, amma dunari amzhi yaɓəlari wa.

⁴Kuthlir Assiriya ku thlentə olər sojayeri arni ka tsa nggəl MTHLAKU na ka mpika. Antə ma MTHLAKU na Hyelər nga ku nggati, tsa ata ɗi ni. Antə usa kara hara ala yeru adduwa, yeru na mbil ka mpikə ni.”

⁵Sakatə Ishaya ku nggatə ndərər Kuthli Hezekiya ni,

⁶tsa shinau alari abbər, “MTHLAKU akwa pəla abbər ga aɗiya hir ka gari na ɗimi tə kuthlir Assiriya pəla ata kəri ni thlivərantə ngə wa.

⁷MTHLAKU ata vu ka kuthli ni nggatə su na ata vu ni ka tsa ngka akwa tsəɗiyirni, antə MTHLAKU ata vu ka mdə tsi ni tsu akwa tsəɗiyirni.”

⁸Tsu akwa saka ngəni antə olər sojayeri ar Assiriya ni nggata abbər kuthlirni ku zhar Lakish ka ləkwa mpa ka Libna. Antə tsa zhar Urushalima ka mwari adzə ni.

⁹Tsuwa tsu akwa saka ngəni antə labar ku mzhitə kuthlir Assiriya abbər Kuthli Tirhaka na ahar Ithliyopiya akwa pwar sojayeri ar Masar ka da ra dlər mjirni. Antə kuthlir Assiriya ni thlentə mjirni adzə Kuthli Hezekiya,

¹⁰ka da pəla alari abbər, “Giri aɗiya hir ka hyel natə giri mbərsa ka tsa ni pwaktəmta giri abbər tsa ata mbuli Urushalima akwa tsi wa diya.

¹¹Ai giri ku nggatə su tə kuthlyayeri ar Assiriya hara aka tsəɗiyayeri ka ɓdləmta ɗa karkar. Antə ar ngə ga ana wuta apa ga ata msər ya?

¹²Haptayeri ar mjir Gozan, ka Haran, ka Rezef, ka mjir Eden na akwa Telassar, ku mzhi mbuli ɗa akwa tsiya kuthlyayeri na akəmata i'i ya?

¹³Kulini kuthlyayeri ar Hamath, Arpad, ka Sefarvayim, ka Hena, ka Ivva ni, da ama ka mpikə ri?”

¹⁴Aghəla tə Hezekiya ku dlu wasika ni ka karata, antə tsa təra mwari akwa mbwar adduwa ka pəbələmta wasika ni kamnyar ka MTHLAKU wuta.

¹⁵Antə Hezekiya hara adduwa abbər,

¹⁶“MTHLAKU na ka Duna ta Shang, Hyelər Israila, dəkəl kuthlikurər nga an abwa kəra Kerubayeri! Ga an Hyel duku na ata kəra shanga kuthlikurayeri na akwa duniya. Ga an namtə vəi na amtazi ka duniya.

¹⁷Psi thləma ga ala yeru bu MTHLAKU, kara nggatə jili ndər ɗimi tə Sennakerib akwa pəlari ata kəra ga, Hyel na ka mpika!

¹⁸Jiri, yeru ka səndari MTHLAKU abbər kuthlyayeri ar Assiriya ku dlər tsəɗiyayeri ka ɓdləmta mjir ɗa.

¹⁹Da pugəu haptayeri arɗa tə mdə nam ka udzəm ka pela akwa u'u. Ɗaram da aɗi hyel wa, amma haptər udzəm ka pela tə mdə nam ka tsiya mda.

²⁰Antə kulini, MTHLAKU na Hyelər yeru, mbantə yeru akwa tsiya mjir Assiriya ni, kamnyar ka shanga tsəɗiyayeri sənda abbər gə shinga MTHLAKU an Hyel.”

²¹Antə Ishaya thlenta amsa aka Hezekiya, abbər su tə tsa kiɗa ata kəra kuthlir Assiriya ni

²²MTHLAKU akwa pəla abbər, “Bərni Urushalima akwa kumshi nga ka rutə nga, Sennakerib.

²³Wa antə ga akwa kyarari ka nggəl nə ri? Ga akwa hara kər olkur ka haptə kuraka gə ni aka wa ri? Ga akwa hara su ngəni ali, I na Hyel na ɓɗakkarkara ar Israila.

²⁴Ga ku thlentə mjir nga ka da mnya ɗimi ali abbər kamnyar hangkur sojayeri ar nga ga ku nggyari garayeri na nal nal ahar Lebanon. Ga akwa gaya abbər har ga ku mzhitə ɗəffa kuɓər nfu ni, ka perəmta nfur seda na saɓəl saɓəl, ka nthləgəmta nfwayeri na ɓɗakɓɗaku.

²⁵Ga akwa gaya abbər ga ku la jiɓayeri ka sa yimər ɗa akwa tsəɗiyir mji damwa, ka shiwantə shanga thlyaghayeri ar Masar ka səla ga.”

²⁶“MTHLAKU akwa pəla, ‘Ga aɗi ɗar nggatari abbər I an ɗəmhə su nayeri təng ɗəm wa ya? I an ɗəmhə ɗa təng waci ka nghyaɓəla ɗa kulini. I an hamta ala gə dunar nggyari tsəɗiyayeri na ka duna ka hadləmta ɗa apa kumbə ni.

²⁷An su na hara tə mjir tsəɗiyayeri nda ku ndzi mtathlaku ni. Da ku ndatədzi, ka yakata, ka tətəɓumtadzi apa pukdlər kusar mtakəu, apa maɗa kusar na ptsa ata kəra mbwa ka kəɓa ka ulta.’ ”

²⁸“ ‘Amma I asəndə nga kuta ka hili, ləɓəlar nga ka səvəyir nga, ka shanga su tə ga ana hara. I asəndə laku tə ga ana haptə hangkali akwa.

²⁹Antə kamnyar tə ga ku ndzi bəlkəu ka haptə hangkali, I ata mbwau anggilku akwa kucira ga, ka tsau lanjam akwa mnya ga, ka ngka ka ga akwa laku tə gə si akwa.’ ”

³⁰Antə Ishaya pəla aka Hezekiya, “Ngəni an seɗar su na ata sə hara: Avana ka apta giri ata səm mthlir dlawal. Amma akwa məva na makərkur giri ata mzhi thləka su ka fəi, ka nci nfur anap ka səm yari.

³¹Amma giri na ku mbili ka mpika akwa Yahuda, giri ata sə ləkəma ka ngga msəra apa nfu natə nggilangari ku ləghəi akwa di zurang ka ləkwa ya munya.”

³²Kamnyar mjirna ata sə mbila akwa Urushalima, ka ata Gar Sihiyona tə da ata sə hara hang ka titilidzi, kamnyar MTHLAKU na ka Duna ta Shang ku ɗəmhə su ngəni ka tsa hara.

³³Nggədza su tə MTHLAKU pəla ata kəra kuthlir Assiriya. Sojayeri arni aɗi ata səkwa bərni ngəni wa, wala shə afa akwa wa. Sojayeri arni aɗi ata mzhi səkwa Urushalima ka partauwayeri wa wala kawartə bərni ni ka bagaɗiyir mpa wa.

³⁴Tsu ata laku tə kuthli ni si antə tsa ata ngka, kula ntsari kuta bərni ni. I na MTHLAKU an gari ni.

³⁵I ata mbuli tsəɗi ngəni ka tsəlpitə ni, kamnyar səliyir kərna, ka kamnyar alkawal tə I kəta aka buɗarna Dauda.

³⁶Antə mdərthlentərhyel na ar MTHLAKU ku səɓəla ka kurəmta mji dəpu aru pal ka nciskumari ka ntəfu akwa vəi fəliyir mjir Assiriya. Sakatə mji thlatə ɗəɗəpa təng nggədza mshiyir ɗa apumta leɓleɓu!

³⁷Antə Sennakerib na kuthlir Assiriya ku hwi kazhar mpa ni, ka ngka aharngkiɗa ahar Nineva

³⁸Antə vir laga sakatə tsa akwa thla haptu akwa mbwar haptərni Nisrok, antə maɗa'ni Adrammelek ka Sharezer mwari ka tsi ni ka katsakar, ka hwi mwari akwa tsəɗi Ararat. Antə Esarhaddon na ɓzərni ku dlu tsiyari ka ndzi kuthli ata vəyari.