Read bura-pabir Ishaya 38 Bible Online

Ishaya 38 - bura-pabir bible

Ishaya 38

¹Akwa saka ndaga antə Hezekiya ku hara nggawa na mwavər har tə tsa abaka mta. Antə naɓi Ishaya na ɓzər Amoz ku mwari adzə ni, ka pəla alari, “MTHLAKU akwa pəla kara ɗəmhə kutakəyir nga kalkal, kamnyar ga ata mta, ga aɗi ata thlata akwa nggawakur ngəni wa.”

²Antə Hezekiya ku shinar kəmari təbwar dza mbwa, ka hara adduwa aka MTHLAKU,

³abbər, “Ɗangtə bu MTHLAKU abbər I ku nu nga ka hara kəthlər ala ga akwa jirkur ka ɗəffi duku, ka hara su na ku kəskəra ga.” Antə tsa baɗitə tuwa ka duna.

⁴Antə MTHLAKU pəla aka Ishaya,

⁵ka tsa mwari adzə Hezekiya ka pəla alari abbər, “I na MTHLAKU, na Hyelər kəkar nga Dauda, I ku nggatə adduwar nga ka wutə shimwiyir nga. Antə kulini I ata jakəngkər ala gə məva kumnya ntəfu aka fəyir mpika ga

⁶I ata mbuli nga ka bərni Urushalima akwa tsiya kuthlir Assiriya, ka ləkəma ka ɓəla tsəɗi ni.”

⁷Antə nggədza seɗa natə MTHLAKU ata hamta ala gə kamnyar ncanta abbər tsa ata nghyaɓəla alkawalərni.

⁸Ata lakur ləmta akwa mbwa na amta natə Kuthli Ahaz latə ni, I ata vu ka shanggur ngka ka bwahili mnyar ndərar səl kuma. Antə shanggur ni ku ngka ka bwahili mnyar səl kuma.

⁹Aghəla tə Hezekiya ku thlata akwa nggawakur antə tsa rəbutə ha ngəni:

¹⁰I dzama abbər akwa sakar dakwikurərna I ata mta ka mwari akwa duniyar mji mtəmta, I aɗi ata ndzi ka mpikə kəra wa.

¹¹I dzama abbər I aɗi ata jaktə wutə MTHLAKU wa, wala jaktə wutə mdə ka mpika akwa duniya wa.

¹²Mdə ku thlamta səwur mpikəi ka təra kəgari, apatə mdər ɓəla ana huzamta tent, apatə mdər tsa puwa ana thlaɓəla kuntu akwa garga. Jiri, I dzama abbər Hyel ata dlu mpikəi.

¹³I pi akwa tuwa har tə viri kura, apa dlu tsəngi ana akwa hukthlə ɗethlərna. I akwa dzama abbər Hyel ata tsi ra.

¹⁴Kurakəi ku sha ka ndzi kula duna, I akwa tuwa apa bukəl twangtwang. Nci ku ghəri akwa wul su amtazi. MTHLAKU, I akwa ɗar bwani, dlar ra bu usa.

¹⁵Man tə I ata mzhi pəlari ri? Kamnyar MTHLAKU ka kərari an pəla, tsa ka kərari an thlentə nggawakur ni. Antə kamnyar tə ɗəffi ku ɓzi, I ata nu su ka hangkal akwa shanga ndzəndziyirna.

¹⁶MTHLAKU, ndzəndziyir duniya ni shang apani, tsa ana vu ka mdə thliptə laku ndzəndzi lapiya. Mbantə ra kəi ndzi lapiya bu, kəi jaktə ndzi ka mpika.

¹⁷Bwani tə I ɗar ni ku sə ndzi ali su na ka barka, kamnyar ga ku msərantə ra akwa mnya mta, ka tifəmta ali bikərna.

¹⁸Kamnyar mji na akwa kula amzhi usar ngə wa, mji mtəmta amzhi fwal ngə wa. Da amzhi vəkər ka ɓɗakkurər ngə wa.

¹⁹Tar mdə na ka mpika an ata mzhi usar nga, apatə I akwa harari kulini ni. Mjir ya ana ngkər ɓɗakkurər nga aka maɗa' ɗa.

²⁰MTHLAKU, ga ku mbantə ra. Antə yeru ata fwal nga ka guləm, akwa mbwar vəngkər səli ala ga, shanga virayeri ar mpika yeru.

²¹Antə Ishaya pəla aka buɗayeri ar Hezekiya, “Namtə giri malər kamnda ka giri fadza aka mbəlkari ni, ka tsa wutə lapiyakur.”

²²Antə Hezekiya pəla, “Man seɗar su na ata ncanta ali abbər I ata mzhi jaktə ngka akwa mbwar vəngkər səli ri?”