Read bura-pabir Ishaya 39 Bible Online

Ishaya 39 - bura-pabir bible

Ishaya 39

¹Akwa saka ngəni Merodak Baladan, na ɓzər Baladan, an kuthlir Babila. Antə sakatə tsa ku nggata abbər Hezekiya ku hara nggawa ka wutə lapiyakur, tsa thlenta alari wasika ka cautayeri.

²Antə Hezekiya ku dlu mətəpiyayeri ni ka kucali ka ncanta ala ɗa shanga gənarni. Tsa ncanta ala ɗa adzərfa, ka dinar, ka yaji, ka tulari ɗuza, ka shanga kari sojayeri arni. Su aɗi na mbila akwa mbwar pwi su, wala akwa kuthlikurərni na kula tsa ncanta ala ɗa wa.

³Antə naɓi Ishaya mwari adzə Kuthli Hezekiya, ka pəla, “Mji ngəni thlata ama ri, tsuwa man tə da pəla ala gə ri?” Hezekiya shinau alari ka pəla, “Da thlatə ciju akwa tsəɗi Babila.”

⁴Antə Ishaya jaktə yuwa abbər, “Man tə da wuta akwa kəi kuthlikurər ngə ri?” Tə Hezekiya shinau abbər, “Da ku wutə shanga su. I ku ncanta ala ɗa shanga su na akwa kəyirna ka shanga su na akwa mbwar pwi su.”

⁵Antə Ishaya pəla aka kuthli ni, “Nggədza labar tə MTHLAKU na ka Duna ta Shang pəla,

⁶Saka ata sə si natə mda ata sə famnya shanga su tə kəkayeri ar nga ku tsapta akwa kəi kuthlikur, ka mwanta ahar Babila. Su aɗi na ata mbiləmta wa.

⁷Mda ata sə fatə bwadukwa maɗa' nga natə ga an ya ka təra ka da. Da ata sə ndzi kulaɓu ka hara kəthlər akwa kəi kuthlikur ar Babila.”

⁸Antə Hezekiya pəla, “Su tə MTHLAKU pəla ni ɓɗak ka duna.” Kamnyar tsa dzama abbər tsu mda ata wutə msərakur ka lapiyakur akwa sakarni.