Read bura-pabir Ishaya 40 Bible Online

Ishaya 40 - bura-pabir bible

Ishaya 40

¹“Shiktə gir mjirna, shiktə giri ɗa,” ndə Hyelər giri.

²“Gari aka mjir Urushalima ka hangkal. Pəla ala ɗa abbər sakar bwaniyir ɗa ku kuri, tsuwa mdə ku tifəmta ala ɗa bikər ɗa. MTHLAKU ku ɗi ɗa kalkal ka ɗimikur tə da hara.”

³Mdə laga akwa gari ka kuraku abbər, “Ɓəli laku akwa mtakəu aka MTHLAKU! Namtə laku na dwaɗu akwa mtakəu aka Hyelər mburu!

⁴Shiktə shanga mularayeri, titili shanga garayeri. Ka shanga ɗəɗəgəlayeri ngka bəbal, ka vəyayeri na jukurjukur ngka patərathlu.

⁵Antə səliyir MTHLAKU ata sə kəlardzi, ka shanga mji na akwa duniya wuta. MTHLAKU surni an pəla su ngəni.”

⁶Mdə laga akwa gari ka kuraku abbər, “Psəmnya!” Antə I pəla, “Man su tə kəi psəmnya nə ri?” “Psəmnya abbər shanga mji ndzi apa kusar, ɓɗakkurər ɗa aɗi ana fəi ka təramta ɓɗakkur pukdlə na akwa mtakəu wa.

⁷Kusar ana tətəɓwa, pukdla ana suta sakatə MTHLAKU ku tsa ɗa ka shambar faku. Jiri mji aɗi təramta kusar ka nggitər su wa.

⁸Kusar ana tətəɓwa, pukdla ana məma amma ndərər Hyel ata ndzi ba saka madi.”

⁹Lətə kəra gar na nal, Sihiyona, gə na ana səntə labar na msəra! Haptə kuraka ga, Urushalima kara psəmnya labar na msəra! Psəmnya ka kuraku na ola kula thlivəra, psəmnya aka bərniyayeri na akwa Yahuda, abbər, “Nggədza Hyelər giri akwa si!”

¹⁰Ndaga MTHLAKU na Hyel akwa si ka dunar kuthlikur, tsa ata hara kuthlikur ka duna. Ndaga ni akwa si ka watsəɓa, aka mji na ɓɗaku ka mji na ɗimi.

¹¹Tsa ata wulwul mjirni apatə mdər ɓəla ana hara aka ciɓərni: tsa ata tsaptə maɗa' təma akwa thlimbəlari ka fəfahə ɗa akwa kərathlari, ka pwar məma təmayeri ni ka hangkal.

¹²Mda aɗi na ku ɗar ngkərtə hangkur manda ka kutatsiyari ya, wala ngkərtə baukur vəi na amtazi ka mandaɓar tsiyari? Mda aɗi na ku ɗar fau shanga həi duniya akwa bwakti ya, wala ngkərtə kəgəɓkur gar wala ɗəɗəgəl ata səkel ya?

¹³Mda aɗi na ku ɗar ngkərwa MTHLAKU akwa laku ya, wala mzhi thlipa alari su wala nar sauri ya?

¹⁴Mda aɗi natə MTHLAKU ku ɗar tsəkwitə ni ka tsa thlipa alari lakur hara su na kalkal ya, wala ncaɓəla alari lakur ɗəɗukur ya?

¹⁵Awa, kamnyar aka MTHLAKU, tsəɗiyayeri ni aɗi suma wa, da ndzi apa njinjir yimi pal na tərkwa bwakti, kəkafu apa bərbər na təri ata səkel. Kəgəɓkur ɗəɗəgəlayeri ndzi alari apa bərbər lipa duku.

¹⁶Shanga mwaɓi na akwa kuɓər nfur Lebanon amzhi sur hamta saɗaka aka Hyelər yeru wa, nfwayeri na akwa tsuwa amzhi mbatə u'uwari wa.

¹⁷Tsəɗiyayeri aɗi su laga akəmari wa.

¹⁸Wa antə mda ata mzhi giratə ni ka Hyel ri? Su madi antə mda ata mzhi pəla dludzər nə ri?

¹⁹Hyel aɗi dludzi ka haptu wala raka wa, haptu tə mjir ɓdla ana fəi dzari ka dinar, ka namtə vəi vətari ka adzərfa.

²⁰Mdə natə tsa aɗi ka adzərfa wala dinar wa, tsa ata carɓəla udzəm na ahəktə wala hiɗa wa. Tsa ana baratə mdə na masəkur mar su, ka tsa marta alari su na aɓəl ka təri wa.

²¹Giri aɗi səndəng? Giri aɗi nggatə su ata kərəng? Giri aɗi nggatə laku tə duniya ni baɗita akwang?

²²Tsa na Hyel na ata dəkəl kuthlikur an namta, tsa na ka ndzi amta duniya akwa vəi na amta ta shang, mji na akwa duniya ndzi alari miɗiɗi apa maɗa hawa. Tsa ndərar vəi na amtazi apa lapəli, ka pəbəlar ni apa tent ka mji ndzi akwa.

²³Tsa ana fəi kuthlyayeri na ka duna, ka namtə ɗa suma wa.

²⁴Da ndzi tsu apa su ptsəptsa na raka raka, na haɗa ptsa tə səla ɗa aɗi ləghəi akwa di wa. Ma tsa tsa ɗa ka shambar fakə da ata ula, antə shambar ata fimta ɗa apa kusar.

²⁵Wan tə mda amzhi giratari ka Hyel na ɓɗakkarkara ri? Mda aɗi na dludzi ka tsa ya?

²⁶Haptə gir nca giri ahar hyel! Giri tamatə wan nam sasəlkayeri nə ri? Tsu tsa na puɓəla ɗa dlama dlama apa sojayeri, ka nar thləm aka kəlara pal akwa nca ɗa. Tsa ka duna swaiswai, antə sasəlka aɗi wala duku na ku sha alari wa.

²⁷Kamnyar mə tə giri akwa nggungguni ri, mjir Israila, abbər MTHLAKU asəndə jili bwani tə giri akwa wa, wala damitədzi ka su na ku tsəkwar giri wa?

²⁸Giri aɗi səndəng? Giri aɗi nggatəng? MTHLAKU an Hyel na ba saka madi, tsa an namtə shanga duniya. Tsa aɗi ana ghər wa, wala ka ɗəffari fa ni wa, mda aɗi na amzhi səndə dzamərni wa.

²⁹MTHLAKU ana na duna aka mji na ku ghəri, ka dunautə mji na kula duna.

³⁰Wala kustayeri ana ghəra ka ndzi kula duna, wala shili na akwa nggari ka duna ana tsamta səla ɗa ka ndla.

³¹Amma mji na ana mbərsa ka MTHLAKU da ata wutə duna bilən. Da ata ndzi ka duna apa duku na ana fəla ahar hyel ata ɓəɓəka ɗa, da ata hwi ka hwi amma da aɗi ata ghər wa, da ata mwa ka mwa amma da aɗi ata ghər wa.