Read bura-pabir Ishaya 41 Bible Online

Ishaya 41 - bura-pabir bible

Ishaya 41

¹Hyel pəla abbər, “Ndzi giri ɗiɗi ka giri nggatə ra, shanga giri na ciju ata mnya yimi. Ɗəmhə girdzi ka suayeri tə giri ata sə pəlari akəma alkali, mda ata na giri saka ka giri gari. Shahə girdzi kudzəha adzə ra, ka shariya thlamta ala mburu su na kalkal ata kər.

²Wan thlentə kuthlir bwar raghəi ri, wan ku nggyari su akwa kəlara vəi tə tsa mwari ata nə ri? MTHLAKU an vu ka tsa nggyari tsəɗiyayeri zumzum, tə tsa ana ntsəntsarəmta kuthlyayeri akira səlari. Tsa ana kurəmta mjirni ka katsakar, ka titiləmta ɗa pal pal apa bərbər, ka fimta ɗa apa buɗər kusar tə shambar fata.

³Tsa ana kədlə ɗa ka hwi na ka ufti apa ka səlari tsəkwar di wa, ka kuri lapiya kula dəkəidzi.

⁴Giri tamata abbər wan haratə su nayeri nə ri? Wan ɗəmhə su təng waci aka kəlara zamanayeri na akwa si si ri? Tsu Iya na MTHLAKU na aɗi akwa baɗitari, I natə shanga sur duniya ata sə kura ata nci.

⁵Mji na ciju ciju ata mnya yimi ku wutə suayeri tə I hara ni, antə da ku thlivəra ka yakata. Antə da ku ɗəmhədzi ka si kamnyar mpa.

⁶Kəlara mda akwa dunautə nvwani abbər, ‘Kara ndzi ɓəɓal!’

⁷Mdər marsu ana dunautə mdər ɓdlə dinar, mdər nggili haptu ni ana pəla aka mdər ɓdlari, abbər, ‘Ga ku pakhə ɓɗaku!’ Antə da ana kukwahə ɗa ka kusa ɓəɓal ta da asə suta ka təri.”

⁸Amma ar nga Israila, gə na buɗarna, giri an mji natə I ku carɓəla, giri na kəkayeri ar Ibrahim na pazhirna.

⁹I ku kəgaɓəla nga akwa datər duniya I ku səntə nga azi ka pəla ala ga abbər, “Ga an buɗarna na carcarari. I ku carɓəla nga antə I aɗi ata fwari ngə wa.”

¹⁰Apani ga aɗiya thlivər wa, kamnyar I adzə nga, ga aɗiya damitədzi wa kamnyar I an Hyelər nga. I ata dunautə nga, kəi dlar nga, I ata mbwa kir ala ga, antə ga ata səma.

¹¹Jiri, shanga dawayeri ar nga, ata sə ndəndatədzi ka ləkwa sur səli, mji na ku bara mpar nga da ata mta.

¹²Ga ata sə bara kara wutə ɗa ka nca ga, amma ga aɗi ata wutə ɗa kəra wa, kamnyar da ku kuri.

¹³I na MTHLAKU na Hyelər nga, I an kəsi tsi mazəma ga, ka pəla, “Ga aɗiya thlivər wa, I ata dlar nga.”

¹⁴MTHLAKU akwa pəla abbər, “Israila, wala tə gə raka kula duna apa nggura, ga aɗiya thlivər wa kamnyar I ata dlar nga. I an MTHLAKU na mdər mbantər giri, Hyel na ɓɗakkarkara ar Israila.

¹⁵I ata namtə nga apa sur dəkə mthli, na bilən ka hir na ncwalncwal.” “Ga ata hadləmta dawayeri ar nga apatə mda ana hadləmta garayeri, apatə mda ana hadləmta ɗəɗəgəlayeri ka da ndzi bərbər.

¹⁶Ga ata sə haptə ɗa ka puhəmta ɗa, ka shambar fiɓəla ɗa ka təra ka da, antə shambar na mwavər ata sə titiləmta ɗa. Antə ga ata sə hara kucali kamnyar I an MTHLAKU, ga ata sə hu ra, Hyel na ɓɗakkarkara ar Israila.”

¹⁷“Ma sakatə mjirna ku sə tur yimər sa, sakatə wulya ɗa ku uli kamnyar thləli, antə I na MTHLAKU ata sə dlar ɗa I na Hyelər Israila, aɗi ata fwari ɗa pət wa.

¹⁸I ata ɓəli thlyaghayeri akwa kəra garayeri, ka ntuli kucirkilayeri akwa mularayeri. I ata namtə hamada ka tsa ndzi kufayeri, ka mtakər hamada sə nghyi ka kucirkila.

¹⁹I ata vu ka nfur seda sə nghyantə hamada, ka nfur shawa, ka nfur pukdla, ka zaitun ptsa anda. I ata vu ka kuɓər nfwa thlata akwa vəi tə su ana ptsa ata wa, kuɓər nfur mənta, ka anthləmamshi, ka mambila nfwayeri na ɓɗakɓɗaku.

²⁰Apani kəlara mda ata wutə sur ndatə ngəni, ka sənda abbər I na MTHLAKU an harata, Hyelər Israila na ɓɗakkarkara an harata.”

²¹MTHLAKU na kuthlir Israila ku pəla aka haptayeri abbər, “Man nggungguniyir giri nə ri? Pəla giri. Ncantə giri jirkur giri ni, ma aɗi.

²²Ngkər giri ala yeru su na ata sə hara, ka yeru sə səndə ma sakatə su ni ku hara. Ngkərɓəla ala yeru suayeri na ku hara waci, ka karapur ɗa ka yeru sənda. Ma apani wa, ngkər ala yeru su na ata sə hara akəmazi.

²³Pəla ala yeru su na ata sə hara aghəlazi, antə yeru ata sənda abbər giri hyel jiri. Hara gir su na ɓɗaku wala su na ɗimi, na ata thlivərantə yeru ka tsi duna yeru.

²⁴Ai gira sənda abbər giri aɗi suma wa, antə wujir aɗi tə giri ana kuri hwatu wa. Shanga mji na ana nu giri da an sur cika!”

²⁵“I ku vəi mdər pwar laga akwa bwar raghəi, amma tsa ata thlatə təbwar yala ka si. I ata səntə ni ka tsa dlər tsəɗiyayeri. Tsa ata vəngkər səli ali antə tsa ata ntsəntsarəmta kuthlyayeri apa maɓu.

²⁶Haptu madi akwa nca giri an pəla su apani ata hara ri, tə yeru ata mzhi pəla abbər giri ku hara kalkal? Aɗi akwa nca giri wala duku na pəla su ata kər wa, mda aɗi na nggatə giri akwa pəla su laga wa.

²⁷I an ntangkəmar psəmnya labar ngəni aka mjir Urushalima, I thlenta ala ɗa labar na msəra abbər, ‘Wul giri mjir giri akwa si! Da akwa ngka avəi!’

²⁸Amma sakatə I ku wula akwa nca haptayeri, I aɗi wutə haptu wala duku na ka sur pəla wa, aɗi wala duku na amzhi hamta ali amsa wa.

²⁹I wuta abbər shanga su tə da akwa harari ni pwatədzi daci, da aɗi ana kuri wujir wa, su aɗi natə haptayeri arɗa amzhi kuriyari wa.”