Read bura-pabir Ishaya 42 Bible Online

Ishaya 42 - bura-pabir bible

Ishaya 42

¹“Nggədza buɗarna, natə I ku dunautə ni, natə I an carɓəla ni, natə I akwa nggatə msərakurərni. I ku vəngkər mambələrna ata kərari antə tsa ata thlamta shariya na kalkal aka mji.

²Tsa aɗi ata mburar kurakari wala haptə kurakari wa, wala hara ka mdə nggatə kurakari ata lakur kutadi wa.

³Tsa aɗi ata ɓələmta kədla na kula duna wa, wala kuri tsi u'ur pitəla tə mdə ku kəmta u'urni wa. Akwa jirkur antə tsa ata vu ka mdə hara jirkur

⁴Tsa aɗi ata ghər wa wala hartə mnyari wa, tar ma tsa wuta abbər jirkur ku ncidzi akwa duniya. Mji na ciju ata mnya yimi ata sək surthlipərni.”

⁵Hyel na MTHLAKU an namtə vəyayeri na amtazi ka pəbəli ɗa, tsa na ku pshari duniya ka shanga su na akwa. Tsa an hamta mpika aka shanga mji, ka hamta ala ɗa mambəla. Antə tsa na MTHLAKU ni pəla aka buɗarni abbər,

⁶“I na MTHLAKU ku kəga nga, ka na gə dunar hara su na kalkal aka shanga mji. I ata tsəlpitə nga ka dlar nga. Atar nga antə I ata mbwi alkawal ka shanga mji, atar nga antə durayeri damwa ata səndə su na kalkal.

⁷Ga ata kəlar nca mji na mdlyang, ka msərantə pərsənayeri na akwa kuthlu.

⁸“I an MTHLAKU, ngəni an thləmi. Haptu aɗi natə yeru ata ndəkəi olkurərna ka tsa wa, I aɗi ata hir ka haptu dlu huwa na arna wa.

⁹Suayeri natə I pəla, da ku nghyaɓəladzi. Kulini I ata psəmnya suayeri damwa bilən, təng kwabə da abaɗitə hara.”

¹⁰Hara gir ha na bilən aka MTHLAKU ka shanga mjir duniya hu ni ka har huwa! Hu gir ni, giri na ana lənggu ata yimi, hu gir ni, shanga su na ka mpika akwa yimi! Hara gir ha, shanga giri na ciju aɓəla bwanda mandayeri.

¹¹Ndzi ka bərniyayeri na akwa hamada haptə kuraka ɗa, ka diyayeri ar mjir Kedar hara kucali. Ndzi Ka mji na ahar Sela hara ha kamnyar kucali, ka da haptə kuraka ɗa ata kəra garayeri!

¹²Ka mji na ciju ata mnya yimi nar səli ka hu MTHLAKU!

¹³MTHLAKU ata səɓəla ka ɗəffu apa soja, tsa ata səɓəla apa soja na ka ɗəffari bwarbwar. Tsa ata haptə kurakər dləra na ata nthlə hyala mda, tsa ata dlər dawayeri arni ka mula ala ɗa.

¹⁴Hyel pəla, “I ku fəi akwa psəngkər thləm, I aɗi shinangkər aka mjirna wa. Amma kulini tar kəi hara su ata kər, I ata tuwa ka mpika apa mwala kutərya.

¹⁵I ata huzamta garayeri kəga ɗəɗəgəlayeri, ka ulantə shanga su na ka thlali mirakəu. I ata vu ka thlyaghayeri ula ka ndzi hamada, ka ulantə shanga kufayeri.

¹⁶I ata pwar mji na mdlyang akwa laku tə da aɗi ɗar nuwari wa. I ata namtə ka kuthlu na akəma ɗa ndzi parakəu, ka namtə vəyayeri na jukurjukur ka tsa ndzi patərathlu. Nayeri ni an alkawal tə I kəta antə I ata nghyaɓəla ɗa, I aɗi ata zharari wa.

¹⁷Amma mji na ana mbərsa ka haptayeri, ka kəga ɗa abbər haptayeri, da ata sə ləkwa sur səli ka duna.”

¹⁸MTHLAKU akwa pəla, “Psi gir thləma giri, twangtwangayeri! Kəlar giri nca giri, mdlyangayeri, ka giri wutə su!

¹⁹Mda aɗi na mdlyang ka təramta buɗarna wa, wala twangtwang ka təramta mdə tə I thlentə wa. Mda aɗi na mdlyang ka təramta mdə tə I carɓəla wa, wala mdlyang ka təramta buɗar MTHLAKU wa.

²⁰Israila, ga ana wutə suayeri hang, amma ga aɗi ana vədzə hangkal ala ɗa wa. Gə ka thləmər nggatə su, amma ga aɗi ana nggaɓəla su kəgari wa.”

²¹MTHLAKU ana hir su na kalkal parang, apani tsa ana namtə tsawayeri arni ka səli, ka bara ka mji kətə səli aka tsawu ni.

²²Amma kulini mdə ku thla mji ngəni ka dlutsə sur ɗa, mdə ku fatə ɗa ka pu ɗa akwa kuayeri, ka ɗuwar ɗa akwa pərsəna. Mdə ku fatə ɗa apa su gapani, kula mdər pəli ɗa.

²³Wa akwa nca giri kulini na ata psi thləmari ri, na ata vədzə hangkalari aka su akəmazi?

²⁴Wan zhar tə mdə thla mjir Israila ka dlutsə sur ɗa nə ri? Aɗi tsu MTHLAKU natə mburu hara alari biku ni wa ya? Tsa antə mburu nggəlar ta nu lakurni, ka nggəlar su tə tsa thlipa ala mburu.

²⁵Apani tsa ku pumta ɗəffari ata mburu, ka na mburu bwani akwa mpa. Tsa ku kalaktə mburu ka u'u ka mba mburu, amma ba kulini mburu aɗi thliptə su wa, wala ncanta apa su ku damitə mburu wa.