Read bura-pabir Ishaya 43 Bible Online

Ishaya 43 - bura-pabir bible

Ishaya 43

¹Amma kulini, Israila, MTHLAKU na həntə nga akwa pəla, “Ga aɗiya thlivər wa, kamnyar I ku pəli nga, I ku kəga nga ka thləma ga, antə gə arna.

²Sakatə ga ata təramta akwa yimi na zurang, I ata ndzi adzə nga, ga ata təramta akwa yimi na mwavər, amma ga aɗi ata satə yimi wa. Sakatə ga ata təramta akwa u'u, ga aɗi ata mbamtadzi wa, kyanggyara u'u aɗi ata mba ngə wa.

³Ai ga asənda abbər I an Hyelər nga, Hyelər Israila na mdər mbantər nga. I ata hamta Masar, ka Ithliyopiya, ka Sheba, ata vəya ga kamnyar pəli nga.

⁴I ata hamta mpika shanga mji nayeri ni ata vəya mpika ga, kamnyar gə su na pwa ali, ka kamnyar I hir nga ka duna ka na gə olkur.

⁵Ga aɗiya thlivər wa, kamnyar ga asənda abbər I adzə nga! I ata tsaptə kəkayeri ar nga na ciju akwa raghəi ka ramta, kəi ngka ka ɗa shang avəi akwa tsəɗiyir ɗa.

⁶I ata pəla aka yala ka tsa zhar nga, ka pəla aka anəm ka tsa psi nga. Ka maɗa'na shili ka mwanki na ciju akwa datər duniya, jaktə ngka akwa Israila.

⁷Shanga ɗa an mjirna, kamnyar I ku həntə ɗa ka da ni səli.”

⁸Hyel akwa pəla, “Səɓəla giri ka mjirna ngəni ata kəma duku, mji na ka nca, amma tsu da mdlyang ni, mji na ka thləm, amma tsu da twangtwang ni!

⁹Ka shanga tsəɗiyayeri tsaptədzi ka da hamta amsa. Haptu madi an ata mzhi pəla su na ata hara akəmazi ri? Madi akwa nca ɗa an ku pəla su na akwa hara kulini nə ri? Ka da si kəga seɗayeri arɗa na ata mzhi mbuli ɗa, na ata ncaɓəla ata bəbal abbər da ka jirkur.”

¹⁰MTHLAKU akwa pəla, “Mjir Israila, giri an seɗarna, I carɓəla giri ka giri ndzi mjirna, kamnyar ka giri səndə ra ka kələngkər ali ka giri nggaɓəla abbər I duku an Hyel. Hyel damwa aɗi wa, tar Iya, aɗi ɗar wutədzi wa, tsuwa aɗi ata sə wutədzi wa.”

¹¹“I duku an MTHLAKU, tar I duku an ata mzhi mbantə giri.

¹²I ku pəla abbər I ata mbantə giri, antə I nghyaɓəla alkawal tə I kətə ni, giri sur giri ku seɗatə su ngəni. Haptu aɗi na ku ɗar hara su apani wa.

¹³I an MTHLAKU, kulini ka ba saka madi. Mda aɗi na ata mzhi mbulɓəla mda akəli wa, mda aɗi na ata mzhi pali su tə I akwa harari wa.”

¹⁴MTHLAKU na mdər pəli giri, na Hyelər Israila na ɓɗakkarkara akwa pəla, “I ata thlentə sojayeri ahar Babila kamnyar kəi mbantə giri. I ata ɓəgələmta nyarfayeri ar bərni ni, antə kucalər mjir Babila ata shin ka tuwa.

¹⁵I an MTHLAKU na Hyelər giri na ɓɗakkarkara, I ku həntə giri, mjir Israila, antə I an kuthlir giri.”

¹⁶“I an vəi lambata akwa manda, ka ɓəli laku ata ɗəffa yimayeri na ol'ola.

¹⁷I an ndəkərɓəla sojayeri ar Masar, ka shanga wagənayeri ar taku ka takwayeri. I ku hangkir ɗa akira yimi na akwa mpa, antə da ku səsatə yimi ka mta, ka ndzi apa pitəla tə u'uwari ku mti!”

¹⁸Amma MTHLAKU akwa pəla abbər, “Fwari ata kəra shanga su na ku təramta, ga aɗiya ɗangtə su na ku hara waci wa.

¹⁹Kamnyar giri ata wutə ra akwa hara su bilən! Har ma I ku baɗitə harari, ai giri akwa wulari. I ata ɓəli laku akwa dəli mtakəu, ka pwi thlyaghayeri akwa hamada.

²⁰Antə wala mwaɓi mtakəu ata sə hu ra, purəm kəga kilamtakayeri ka zhimnakayeri, ma sakatə I ku hamta yimi akwa dəli mtakəu, ka pwi thlyaghayeri akwa hamada.

²¹Israila an mji natə I ku namtə kamnyar kəri, antə vir laga da ata sə hu ra akəma mji!”

²²MTHLAKU ku pəla aka Israila abbər, Giri akwa pəla giri ku ghər ka iya, amma ai giri aɗi bara dlara akəli wa.

²³“Giri aɗi sənta ali saɗaka mbamba ar təma wa, giri aɗi ni olkur atar hamta ali saɗakayeri wa. I aɗi na giri bwani atar bara saɗaka akəla giri wa, wala ghərantə giri atar bara ka giri hamta ali tulari ɗuzə wa.

²⁴Giri aɗi masta ali tulari ɗuzə na msəra wa, wala namtə ɗəffi ka saɗakar malkumər mwaɓiyir giri wa. Ata vəyari, giri ku ghərantə ra ka bikər giri, ka ghərantə ra ka suayeri na aɗi kalkal wa.

²⁵Amma ba kulini I an Hyel na ana tifəmta ala giri bikər giri, kamnyar an laku natə I akwa. Apani I aɗi ata kəsi giri akwa ɗəffi wa.”

²⁶“Ndzi giri ka mburu ra kəɓa akwa mbwar shariya ka giri pəla su na damitə giri, ka giri ncantə vəi tə giri ka jirkur akwa ni!

²⁷Kəkar giri na waci ku hara biku, mjir pwar giri tsuwa ku hara kər ɓəɓalkur ali.

²⁸An su na hara tə I ku nggəlar ka pristayeri hara ali kəthlər, ka ɗəmhə ka mdə sə shamta Israila, ka zhar tə mjirna ku ləkwa sur səli.”