Read bura-pabir Ishaya 44 Bible Online

Ishaya 44 - bura-pabir bible

Ishaya 44

¹MTHLAKU akwa pəla abbər, “Israila, psi thləma ga ali, I ku carɓəla nga kara ndzi buɗarna.

²I an MTHLAKU na həntə nga, I an akwa wul nga təng kwabə mda yaɓəla nga. Ga aɗiya thlivər wa, ga an buɗarna, ga an dur natə I ku hir ka carɓəla.”

³“I ata hamta yimi aka di na ka thləli, ka ɓəli zərkayeri akwa vəyayeri na ul'ulari. I ata pungkər mambələrna ata kəra kəkayeri ar nga, ka vədzə barka ala ɗa.

⁴Da ata thlatə taktar apa kusar tə mda ana pungkər alari yimi, apa nfwayeri na ol'ola ata mnya zərkə na akwa hwi.”

⁵“Duku duku shanga ɗa ata sə vəngkər səli ali, ka pəla abbər da an mjirna. Da ata sə rəbutə thləmi ata bwahila tsiya ɗa, abbər, ‘I an ar MTHLAKU.’ Mji bwaduku ata pəla, ‘I an kəkar Yakub,’ ka vətə thləm fwalari abbər, ‘Mshel Israila.’ ”

⁶MTHLAKU na ka Duna ta Shang, na kuthlir Israila, MTHLAKU na ana mbuli mjir Israila akwa pəla, “I an ntangkəma, ka na aghəlta shang, Hyel damwa aɗi wa, tar Iya.

⁷Mda aɗi na ku ɗar hara su tə I hara ni ya? Ma aɗi ka tsa pəla. Mda aɗi na ku ɗar pəla su na ata hara akəmazi ya, baɗita ata səlari har ka mwanta aka tsikərari? Ma aɗi ka da pəla.

⁸Mjirna, giri aɗiya thlivər wala yakatə wa! Ai giri asəndə laku tə I hir giri akwa təng waci, giri ka kəra giri ku wutə su tə I hara. Hyel damwa aɗi wa, təng I duku, mdər mbantə damwa aɗi wala duku tə I asəndə wa.”

⁹Shanga mji na ana nam haptu da caku. Kamnyar haptayeri natə mda ana kəta apa da su laga ni ampaniyir ɗa aɗi wa. Mji na ana vəngkər səli aka haptu da an mdlyang ka bəlkəu, antə da ata ləkwa sur səli.

¹⁰Riɓa aɗi akwa nam haptu wala ka liya wala ka udzəm wa.

¹¹Shanga mji na ana nu haptu ata sə ləkwa sur səli. Ai giri asənda abbər mji tsu apa giri an nam ɗa. Apani shanga mjir nam haptu ni ka mjir vəngkər səli aka haptu ni ata sə tsaptədzi akəma MTHLAKU ka yakata ka ləkwa sur səli.

¹²Mdər ɓdla ana kətə liya ka vu akwa hakthlir u'u ka namtə haptu kəgari. Sakatə tsa akwa ɓdla tsa ana haptə mufəl ka duna, antə tsa ana nggatə mi ka thləli ka ghəra.

¹³Mdər mara ana kətə udzəm ka ngkərɓəla olkur udzəm tə tsa ata bara kəthlər kəgari ka səwu ka ɗahəɓəla ka nggulashim. Tsa ana kətə sur kəthlər arni ka thlaɓəla apatə tsa akwa barari. Aghəla nda tsa ata namtə haptu kəgari akwa dludzər mda, ka vəi akwa mashiɗərni.

¹⁴Tsa ata mzhi ra nthlətsa udzəm seda ka hara kəthlər kəgari, wala kəthlər ka udzəm ok, wala kəlara udzəm na ɓɗakɓɗaku tə tsa carɓəla akwa kuɓər nfwa. Tsuwa tsa ata mzhi ncimta nfwayeri ar seda ni akwa nca kuɓər nfu ka yimərhyel kəlanta.

¹⁵Aghəla tə nfwayeri ni ku hara tsa ata mba u'u ka bwadukwa udzəm ni kamnyar təlantə dzari, ka tsuwa kamnyar ta susəma kəgari. Bwadukwa udzəm ni tsa ata namtə haptu kəgari ka vəngkər səli akari.

¹⁶Bwadukwa udzəm ni tsa ana mba u'u kəgari, bwaduku tsa ana ptsa kum kəgari ka nggatə msərakurari. Bwadukwa udzəm ni tsa ana mba ka thlira ka pəla, “Mhm dzi ku hara gərgər kulini! U'u ngəni msəra ka duna.”

¹⁷Mambila udzəm ni tsa ata kətari ka namtə haptu kəgari, ka zuzuri akəmari ka kiɗə ni. Tsa ata hara adduwa abbər, “Mbantə ra bu, kamnyar ga an hyelərna!”

¹⁸Apani mjir nu haptu an bəlkəu kamta. Da ku hartə nca ɗa antə da amzhi wutə su wa. Da ku namtə kəra ɗa ɓəɓal antə da amzhi nggaɓəla su wa.

¹⁹Mdər nam haptu ni aɗi ka kər wa, mi wa tsa ata pəla aka kərari abbər, “Diya I ku mbamta bwadukwa udzəmayeri ni akwa u'u, ka ta susəma ata hakthlir u'uwari ka ptsatə kum ata ka ɓɗəmnya. Kaha! Apa madi tsuwa tə I ata namtə sur adiyakur ka mambila udzəm nə ri? Kamnyar mi tsuwa tə I ata zuzuri akəma gang ri?”

²⁰Tsa bəlkəu kamta apa mdər kwasə pənju, kərari aɗi dzəpu wa. Tsa akwa mbərsa ka su na amzhi mbantə ni wa. Tsa aɗi ka kər ar yu su abbər, “Su ngəni akwa tsi ni kam hyel nənga udzəm ndzang ri wa.”

²¹MTHLAKU akwa pəla, “Ɗangtə gir suayeri ngəni, mjir Israila, ɗangtə giri abbər giri an mjirna. I ku namtə giri ka giri ndzi mjirna, antə I aɗi ata fwari ata kəra giri ba saka madi wa.

²²I ku tsarəmta bikər giri na nggərəɓu apa kəlangkə ni, ka titiləmta bikər giri na mənggəl apa zhimaru ni. Ngka giri adzə ra, kamnyar giri ku sənda abbər I an pəli giri.”

²³“Hara gir har kucali vəyayeri na amtazi, kamnyar MTHLAKU ku haratə giri, hara gir kuraku vəyayeri na akwa kira duniya. Hara gir har kucali, garayeri, ka shanga nfwayeri na akwa mtakəu! Kamnyar MTHLAKU ku pəli mjirni, ka ncantə səliyirni akwa Israila.”

²⁴Apani MTHLAKU na pəli giri akwa pəla, “I an həntə giri akwa kuta mama' giri. I an həntə shanga su na akwa duniya. I duku an pəbəlar vəi na amtazi, sakatə I akwa nam duniya wan dlar ra akwa ri?

²⁵I ana ncaɓəla cakukur ɗeaghayeri, ka fəi shaha mjir hakdzi. I ana shinantə dzamər mji na ɗəɗu ka ndzi gapani, ka ɗəɗukurər ɗa ndzi cakukur.

²⁶Amma I ana nghyaɓəla su tə buɗarna ku pəla, ka hara kəlara su tə mjirthlentərna ku pəla aka mji, abbər mji ata nghyantə Urushalima ka damwa, tsuwa MTHLAKU ata jaktə latə bərniyayeri ar Yahuda. Mda ata jaktə latə bərniyayeri na ku huzamtadzi.

²⁷Ma I ku tsawa aka thlyaghayeri ka da ula, antə da ata ulantədzi.

²⁸Ma I ku pəla aka Sairus, kuthlir Parsiya, ‘Ga an ata hara kuthlikur ali.’ Antə tsa ata hara su tə I akwa bara ka tsa hara: tsa ata vu ka mdə jaktə latə Urushalima, ka jaktə nci səla mbwar vəngkər səli.”