Read bura-pabir Ishaya 45 Bible Online

Ishaya 45 - bura-pabir bible

Ishaya 45

¹MTHLAKU ku carɓəla Sairus ka vəi ni kuthli ka pəla alari: I ata namtə nga ka gə ndzi ɓəɓal ka duna, ka na gə nggyari su ata kəra tsəɗiyayeri. I ata dlutsə dunar kuthlikurayeri arɗa, I ata kəlar ala gə nyarfayeri ar bərni ni, antə mdər hartari aɗi wa.

²I ata mwa akəma ga, kəi titili garayeri ka da ndzi patərathlu. I ata ɓəgələmta udzəm nyarfayeri ar əmza, kəi tadərwa zwalayeri ar liya pal pal.

³I ata hamta ala gə gəna na akwa vəi ɗuwari, gəna natə mda awutə ka nca wa. Antə ga ata sənda abbər I an MTHLAKU, abbər I an Hyelər Israila na ku kəga nga ka thləma ga.

⁴I kəga nga kamnyar ka gə dlar mjir Israila, mji natə I ku carɓəla ka da ndzi arna. I ku kəga nga ka thləma ga, ka na gə thləmər olkur, wala tə ga aɗi səndə ra wa.

⁵I an MTHLAKU shira, damwa aɗi wa, Hyel damwa aɗi wa, tar I duku. I ata na gə duna wala tə ga asəndə ra wa.

⁶I hara ngəni kamnyar ka shanga mji baɗita akwa ramta ka mwanta akwa raghəi, sənda abbər Hyel damwa aɗi wa, tar Iya, I an MTHLAKU shira, antə damwa aɗi wa.

⁷I an namtə parakəu ka kuthlu, I andər səntə ləkəma ka asar. I na MTHLAKU andər hara shanga su nayeri ni.

⁸Ndzi ka vəyayeri na amtazi pughəi jirkur akwa duniya apa yimi, ndzi ka di kəlardzi bau, ka msərakur ka jirkur ptsa akwa. I na MTHLAKU an ata hara su nayeri ni

⁹“Sha ku wutə mdə na ata kampiku ka Hyel na nam ni, tsa ndzi apa tughum həi aka mdə na hən ni. Ka tughum ana yu mdə na akwa hən ni, abbər, ‘Man su tə ga akwa namari ri’ ya? Tughum ata mzhi pəla aka mdər hən ni abbər, ‘Kamnyar mə tə ga namtə ra kula tsi ri’ ya?

¹⁰Sha ku wutə mdə na ata pəla aka mjir yarni, ‘Kamnyar mə tə giri yaɓəla ra apani ri?’ ”

¹¹MTHLAKU na Hyelər Israila na ɓɗakkarkara, Hyel na alaktə Israila akwa pəla, “Wan na gə dunar yu ra ata kəra su na ata wutə maɗa'na akəmazi ri, wala na gə dunar tsawa ali su tə kəi hara?

¹²I an namtə duniya, ka alaktə shanga mji na akwa. Ka duni antə I ku pəbəlar vəi na amtazi, ka hamta tsawa aka pci, ka thliya, ka sasəlkayeri.

¹³I ku kətə Sairus ka vəi ni kuthli, ka tsa hara ali su tə I akwa barari ka nagamtə suayeri kalkal. I ata namtə shanga su ka tsa ndzi kasəla alari. Tsa ata jaktə latə bərniyir na, Urushalima, ka msərantə mjirna na akwa mafakur, amma aɗi kamnyar watsəɓa laga wa. I na MTHLAKU an pəla su ngəni.”

¹⁴MTHLAKU akwa pəla aka mjir Israila, “Gənar mjir Masar ka Ithliyopiya ata ndzi ar giri, mjir Seba na gurjamgurjam ata sə ndzi mafar giri, da ata sə nu giri ka məsəsal akwa səla ɗa. Da ata sə zuzuri ka kiɗə su akəla giri abbər, Hyel ata vəi duku ka giri, tar tsa shini an Hyel.

¹⁵Jiri, Hyelər Israila na ana mbantə mjirni, an Hyel na ana ɗuwar kərni.

¹⁶Shanga mji na ana nam haptu ata sə ndəndatədzi, da ata sə ləkwa sur səli.

¹⁷Amma I na MTHLAKU ata sə mbantə mjir Israila, da ata sə ndzi msərmsərari ba saka madi, da aɗi ata jaktə ləkwa sur səli kəra wa.”

¹⁸Giri asənda abbər MTHLAKU na alaktə vəyayeri na amtazi, tsa duku an Hyel! Tsa an ɗəmhə duniya ka namtə ni, ka nci ni gyang. Tsa aɗi namtə ni ndzang kula kəthlərari aɗi wa amma kamnyar ka mji ndzi akwa. Tsa pəla, “I an MTHLAKU, Hyel damwa aɗi wa.

¹⁹I aɗi gari akwa vəi ɗuwari wa, wala ngkər gari laga akwa karapu wa. I aɗi hir ka mjir Israila pakə ra akwa vəi laga kula da wutə ra wa. I an MTHLAKU, antə I ana pəla jirkur, I ana ncaɓəla su na kalkal ata bəbal.”

²⁰MTHLAKU akwa pəla, “Tsaptə girdzi ka giri si adzə ra, shanga giri na ku mbili akwa tsəɗiyayeri! Mji na ana fa haptər udzəm arɗa ka mwa kəgari, ka hara adduwa aka haptu na amzhi mbantə ɗa wa, da an mji na kula kər.

²¹Sər giri ka nggungguniyir giri ni akəmi, ka mjir mbuli giri ni kəɓa ka nvwa ɗa. Wan pəla təng waci abbər su ngəni ata sə hara nə ri? Tar tsu I na MTHLAKU, haptu aɗi na amzhi mbantə mda wala duku wa, tar Iya.”

²²“Ngka giri adzə ra, kəi mbantə giri, shanga giri na akwa duniya! I an Hyel duku, damwa aɗi wa.

²³I ku kətə alkawal na ol laga, antə I aɗi ata ɓəliyari wa: Shanga mji ata sə zuzuri akəmi, shanga mji tsuwa ata sə nu ra.”

²⁴Da ka mnya ɗa ata sə pəla, “Tar akəla MTHLAKU duku shini antə mda ata mzhi wutə jirkur ka duna. Amma shanga mji na ku ɓzamtə ɗəffi ata sə ngka adzə ra ka ləkwa sur səli.

²⁵Atar na I na MTHLAKU antə shanga mjir Israila ata sə nggyari su, ka wutə səli na ola.”