Read bura-pabir Ishaya 46 Bible Online

Ishaya 46 - bura-pabir bible

Ishaya 46

¹Ngəni an datər haptayeri ar Babila! Bel ka Nebo tə waci mda ana vəngkər ala ɗa səli, kulini mdə ku fatə ɗa ka putə ɗa ata mwaɓi fa kəla, na ku ghəri akwa ndwagaldzi akira.

²Haptayeri ka mwaɓi na fatə ɗa shang, ku pəpəyimta ka zurəmta ata di. Haptayeri ni aɗi mzhi ngkatə mjir ɗa wa, tsuwa mji ni aɗi mzhi ngkatə haptər ɗa wa, antə shanga ɗa ku mwari akwa mafakur.

³Psi gir thləma giri ali, mjir Israila, shanga giri na ku mbil ka mpika. Təng tə mdə yaɓəla giri, I akwa wulwul giri.

⁴I ata ndzi Hyelər giri ba akwa olkur giri, wala sakatə shishir kəra giri ku hara mwapu. I ku namtə giri, antə I ata wulwul giri, I ata mwa ka giri ka mbuli giri.

⁵MTHLAKU akwa pəla, “Wa antə giri ata mzhi giratə yeru ka tsa ri? Kəmarna aɗi wala duku ya?

⁶Mji ana puɓəla dinar kazhar pirtayeri arɗa, ka ngkərtə kəgəɓkur adzərfar ɗa ata səkel. Da ana nar kwaba aka mdər ɓdla ka tsa ɓdləta ala ɗa haptu, aghəla nda ka da zuzuri ka vəngkər səli alari.

⁷Da ana haptə haptu ni ka kəta ata pathlaha ɗa, da ana jikəi ni ata vəi tə mdə namta alari ka zhar ni anda, kula mzhi sharardzi. Wala mdə səntə tuwarni alari, tsa amzhi ndər wa, zhar ka msərantə ni akwa bwani wa.”

⁸“Giri aɗiya fwari su ngəni wa, giri na mjir biku, ka giri kəsi akwa ɗəffa giri.

⁹Giri aɗiya fwari suayeri tə I hara waci wa, ka giri sənda abbər I duku an Hyel kəmarna aɗi wala duku wa.

¹⁰I ana pəla laku tə su ata sə kura akwa təng akwa baɗitari, təng wacira waci suayeri tə mda aɗi suniyari katagu wa. I pəla abbər su aɗi na ata hara ka ndərərna təri wa, I ata nghyaɓəla shanga su tə I ku bara harari.

¹¹I ana kəga mda ka tsa thlata akwa bwar raghəi, ka tsa si apa ɗikar kəl mtəka, ka tsa haratə su tə I ku ɗəmha. I an ɗəmha abbər I ata harari, antə I ata haratari.”

¹²“Psi gir ali thləma giri, giri na ka ɗəffa giri ɓəɓal, giri natə halamar msərantədzi aɗi ala giri wa.

¹³Aɗi ata fəi wa I ata msərantə giri, I aɗi ata shamta saka wala raka wa. Kulikulini I ata mbantə Urushalima, ka səntə səli na ola akwa Israila.”