Read bura-pabir Ishaya 47 Bible Online

Ishaya 47 - bura-pabir bible

Ishaya 47

¹MTHLAKU akwa pəla aka Babila, “Ləghəi kazhar dəkəl kuthlikurər nga, kara ndzi akwa bərbər ata di. Waci gə ndzi apa ngkwar kuthli tə dakwi ana thlivər barari, bərni tə mda aɗi ɗar ngkəyari wa, amma kulini ga aɗi sur thlivər kəra wa.

²Lətə bur ka hangku na ola kara hadli mthli! Ntsui ɗangkwaliyir nga! Fi zhaɓər nga, ka pataliyir nga, ka gə ntaɓəla thlyaghayeri ni.

³Mji ata wutə vəi durakura ga, da ata wutə nga akwa sur səli rutərutari. I ata ntə dawakur ata ga, antə mdər ngkatə ra aɗi wa.”

⁴“Hyel na ɓɗakkarkara ar Israila andər pəli yeru, thləmari an MTHLAKU na ka Duna ta Shang.”

⁵MTHLAKU akwa pəla aka Babila, “Ndzəndzi akwa kuthlu kara ndzi ɗiɗi, tsəɗiyayeri aɗi ata jaktə pəla gə kwatamər ɗa wa.

⁶Ɗəffi ku ɓzi adzə mjirna, antə I ku namtə ɗa apa da aɗi mjirna kəra wa. I ku hamta ɗa akwa tsiya ga tə ga ku hara ala ɗa bwani kula kətadza, wala mji na ku hali ga ku na ɗa bwani ka duna.

⁷Gə kəta abbər ga ata ndzi kwatam ba saka madi, tə ga aɗi damitədzi ata kəra surharar ngə wa, wala dzama ata kəra laku tə su ni ata sə kura akwa wa.”

⁸“Antə psi thləma ga, bara ngga msərakur na təra vəyari ni, ga ana wuta apa su aɗi na ata wutə ngə wa, gə namta apa mda aɗi na olta gə wa. Gə namta apa salər nga wala maɗa' nga amtə kazhar ngə wa.

⁹Amma ata saka duku, akwa kuta pci pal, japwa suayeri ni ata wutə nga. Wala tə ga ana kəthlər ka məsəparayeri zumzum, salngkiri ka maɗa' nga ata mtəgəmtadzi.”

¹⁰“Ga ana wuta apa su aɗi ata wutə nga akwa ɗimikurər ngə ni wa, ga ana wuta apa mda aɗi na amzhi wutə ngə wa. Ɗəɗukur nga ka səndər nga ku shamta nga, kamnyar gə pəla mda aɗi na apa gə wa.

¹¹Antə apani asar ata si ata kəra ga, natə məsəparər nga amzhi ngkamtari wa. Bwani ata ndlangkərdzi ala gə kula səndər nga, bwani tə ga aɗi ɗar suniyari wa!

¹²Antə ləkəma ka məsəparayeri ar nga, ka hakdzayeri tə ga ana hara təng tə gə ngkyar. Mda səndə səwu nuhum da asə dlar nga, nuhum da asə thlivərantə dawayeri ar nga.

¹³Hakdzayeri na hang ni akwa ghərantə nga daci. Ndzi ka ɗeaghayeri ar ngə ni si ka da mbantə nga, mji na ana karatə sasəlkayeri ni, mji na ana ndəkɓəla vəi na amtazi, ka pəla asar tə thliya bilən ata səntari ni.

¹⁴Jiri, da ndzi tsu apa matəha kula duna, tə u'u ana mbamta ɗa karkar! Wala da ka kəra ɗa da amzhi mbantə kərɗa, akəla dunar u'u na ka ufti ni wa. Ngəni diya aɗi an jili hakthlir u'u, tə mda ana ndzəndzi ka hir ni wa.

¹⁵Tsu apani antə mjir hakdzər nga, natə ga ku kəɗar tətali adzə ɗa təng akwa sakar ngkyarkur ngə ni ata sə harari. Kəlara pal akwa nca ɗa ata sə sha, wala duku aɗi ata mzhi mbantə ngə wa.”