Read bura-pabir Ishaya 48 Bible Online

Ishaya 48 - bura-pabir bible

Ishaya 48

¹“Psi gir thləma giri, giri na mjir Israila, giri na akwa nyarmbwar Yahuda: Giri ana kahyel akwa thləma MTHLAKU, ka pəla giri ana vəngkər səli aka Hyelər Israila, amma thlandər antə giri akwa harari.

²Giri ana gaya abbər giri maɗa' bərni na ɓɗakkarkara, ka pəla abbər giri ana mbərsa ka Hyelər Israila, natə thləmari an MTHLAKU na ka Duna ta Shang.”

³MTHLAKU akwa pəla aka mjir Israila, “Təng wacira waci antə I pəla su na ata sə hara akəmazi, antə kula shamta saka shanga su tə I pəla ni ku hara.

⁴I ka səndari abbər ga ata hara kər ɓəɓalkur, ɓəɓal apa liya mənggəl, anggatə su wa apa əmza.

⁵Təng waci I ku pəlaɓəla ala gə su nayeri ni, kwabə suayeri ni ahara I ku jikatə ɗa ala ga, ta ga asə kəta abbər haptayeri ar nga an hara ɗa.

⁶Ga ku nggatə su tə I pəla ni, tsuwa ga wutə ɗa ka nca ga akwa hara, amma ba kulini ga aɗi kələngkər wa. Kulini I ata pəla ala gə suayeri bilən na ata sə hara, suayeri tə ga aɗi ɗar nggatə su ata kər wa.

⁷I haɗahaɗa nam ɗa ashina, da aɗi fəi wa, ta ga asə pəla ga səndə ɗa təng waci.

⁸Ga aɗi ɗar nggatari wa, ga aɗi ɗar səndari wa, təng waci ga aɗi ana psi thləma ga wa. Təng waci I ka səndari abbər gə shimnya, təng tə mdə yaɓəla nga gə ɓzəɓzari.”

⁹“Kamnyar səli tə I kəgari I ata mbwi ɗəffi, kamnyar ka mji sə hu ra I ata zhar ɗi nga, ta I asə shamta nga.

¹⁰I ku ngkərtə duna ga akwa u'ur bwani, tsu apatə mda ana ɓwaɓəla adzərfa. Amma I ku wuta abbər gə kula ampani.

¹¹Kamnyar kəri surna antə I ku mbantə giri, I aɗi ata hir ka mji zhar hu thləmi wa, wala zhar ka mdə damwa wutə səliyirna wa.”

¹²MTHLAKU akwa pəla “Psi gir thləma giri ali, giri na mjir Israila, mji natə I ku carɓəla! I duku an Hyel, I an ntangkəma ka na aghəlta shang.

¹³I an vəi səla duniya ka tsi, I an pəbəlar vəi na amtazi ka tsi mazəmi. Sakatə I ku gari, antə təkəma duniya ka vəi na amtazi ku wutədzi.”

¹⁴“Tsaptə girdzi shanga giri, ka giri psi thləm! Aɗi akwa nca haptayeri ar giri na ku ɗar pəla su apani ya? Aɗi na ku ɗar pəla abbər, I na MTHLAKU ata carɓəla mdə tə I hira, ka vu ni ka tsa shamta mjir Babila ya? Abbər tsa ata hara su tə I pəla alari?

¹⁵I an mdə na pəla gari ngəni ni, I an kəga Sairus, I ku thlentə ni antə tsa səma akwa su tə tsa ata harari.”

¹⁶“Shahə girdzi adzə ra ka giri psi thləma giri, Təng akwa baɗitari I ku gari ata bəbal, ka wuta abbər su tə I pəla ni ku nghyaɓəladzi.” Antə kulini MTHLAKU, Hyel na ka Səli ta Shang, ku nghyantə ra ka mambələrni ka thlentə ra.

¹⁷Hyel na ɓɗakkarkara ar Israila, MTHLAKU na pəli nga akwa pəla, “I an MTHLAKU na Hyelər nga, na akwa thlipa ala gə su na ata dlar nga, ka ncaɓəla ala gə laku na kalkal ka gə nuwa.”

¹⁸“Ma abbər ga an kələngkər aka tsawayeri arna! Sakani ga ata ndzi ka msərakur hang, apa thlyagha tə yimərni ana nghyi ka puɓəladzi! Ga ata ndzi ka dunar nggyari su apa mpar yimi.

¹⁹Sakani kəkayeri ar nga ata sə ndzi hang apa wuyakər mnya manda, sakani I ata wuta abbər su aɗi tsəkwar ɗa wa.”

²⁰Kulini hwi kazhar Babila, kara msəra! Haptə kuraka ga kara psəmnya ka kucali, thlentə labar ni ba akwa datər duniya abbər, “MTHLAKU ku mbantə mjirni, Israila!”

²¹Sakatə MTHLAKU mwantə mjirni akwa mtakəu na bwarbwar kula yimi, da aɗi nggatə thləli wa. Tsa vu tə yimi ku səɓəla ala ɗa akwa pela, tsa ku ntau pela ni antə yimi ku puɓəladzi.

²²MTHLAKU pəla, “Amma saka aɗi tə kəmanggar ata ndzi ka ɗəffari pwipwiyari wa.”