Read bura-pabir Ishaya 49 Bible Online

Ishaya 49 - bura-pabir bible

Ishaya 49

¹Psi gir thləma giri ali, giri na ciju ata mnya yimi, MTHLAKU ku kəga ra təng kwabə mda yaɓəla ra, ka vəta ali thləm sakatə I tsu akwa kuta mama'na.

²Tsa ku namtə mnyi məmashu apa katsakar, ka ɓəlatə ra ka tsiyari surni. Tsa ku tsələmta ra ncwalncwal apa mnya afa, ka ɗuwamta ra akwa kwajarni.

³Tə tsa pəla ali, “Israila, ga an buɗarna, atar nga antə mji ata sə hu ra.”

⁴Amma I pəla akwa ɗəffi, “Diya I ku ghəri akwa su ni kula wutə riɓari, I ku shamta duni kula suari aɗi.” Amma wala apani I ata vəkər ka MTHLAKU, tsa ata ntəmta ali watsəɓər su tə I ana hara.

⁵“MTHLAKU ku carɓəla ra təng tə I tsu akwa kuta mama'na, ka namtə ra buɗarni na ata ngka alari ka mjirni, na ata tsapta alari mjirni Israila na titiləmtadzi. MTHLAKU ku ni olkur, tsa andər ni duna.”

⁶MTHLAKU ku pəla ali, “I ata na gə kəthlər na ola, buɗarna: Aɗi kəthlər ngka ka mambila mjir Israila daci wa, I ata namtə nga kara ndzi parakəu aka durayeri damwa, kamnyar ka shanga mjir duniya wutə mbantədzi.”

⁷MTHLAKU na Hyel na ɓɗakkarkara ar Israila akwa pəla, aka mdə natə mji ku kyarəmta ka nggəlari, natə tsa an buɗar kuthlyayeri abbər, “Kuthlyayeri ata sə wutə nga msərmsərari da ata sə thlatə kamnyar nar olkur ala ga. Kwakunayeri tsuwa ata sə wutari, ka zuzuri kamnyar nar səli ala ga, kamnyar MTHLAKU ka jirkur.” Su ngəni ata hara kamnyar MTHLAKU ku carɓəla buɗarni.

⁸MTHLAKU ku pəla aka mjirni abbər, “Akwa sakatə kalkal ka mdə mbantə giri, antə I ata ncanta abbər I hir giri, I ata kətadzə giri kəi dlar giri. I ata ɓəlatə giri ka tsəlpi giri, ka mbwi alkawal ka shanga mji atar giri. I ata zhar giri ka giri jaktə ndzəndzi, akwa tsəɗiyir giri na ku fəi kula mda akwa.

⁹I ata pəla aka mafayeri na akwa pərsəna, ‘Səɓəla giri ka giri təra!’ Ka pəla aka mji na akwa kuthlu, ‘Səɓəla giri akwa parakəu!’ Da ata ndzi apa təma na akwa ɓəla ata garayeri,

¹⁰Da aɗi ata jaktə nggatə thləli wala məi wa. Pci wala shambar na bwarbwar akwa mtakəu aɗi ata damitə ɗa kəra wa, kamnyar mdər kətadzə ɗa an ata pwar ɗa, tsa ata mwantə ɗa adzə yimər kucirkila.

¹¹I ata ɓəli laku na ola ka tsa təra akwa garayeri, ka namtə lambata ata kəra mularayeri aka mjirna.

¹²Mjirna ata sə thlata akwa diyayeri na ciju, da ata thlata akwa yala ka raghəi, ka ba akwa anəmər tsəɗi Masar.”

¹³“Ka vəyayeri na amtazi hara ha kamnyar kucali! Ka duniya hara kucali! Ka shanga garayeri thlangkər ha! Mjir MTHLAKU ku ɗar bwani, amma tsa ata kətadzə ɗa ka shiktə ɗa.”

¹⁴Amma tsu mjir Urushalima akwa pəla, “MTHLAKU ku pumta yeru! Tsa ku fwari ata kəra yeru!”

¹⁵Antə MTHLAKU akwa shinau ala ɗa abbər, “Mwala ata mzhi fwari ata kəra ɓzərni na ata u'uwa ya, ka tsa zhar kətadzə ɓzər kutari? Wala ma tsa an ata fwari ata kəra ɓzərni, I aɗi ata fwari ata kəra giri wa.

¹⁶Ai Urushalima, ga sənda abbər I ku thlaɓəla thləma ga ata kuta tsi, fwatar katangga na kalaktə nga parang akəmi.”

¹⁷“Urushalima, mjir hənɓəla nga, ku hara hang ta mjir huzamta nga, antə mjir huzamta nga ata hwi təra.

¹⁸Haptə nca ga kara wul mjir nga! Da akwa tsaptədzi ka da ngka avəi! Apatə I an Hyel na ka mpika, ndə MTHLAKU, ga ata sə gaya ata kəra mjir ngə ni, apatə mwala ata zəɓəl ana gaya ka liyar dəɓa arni.”

¹⁹“Jiri tsəɗiyir nga ku ɓzamtədzi ka ndzi kula mda, amma kulini tsa ata hara raka kamta, aka mjir nga na akwa ngka ka ndzəndzi akwa. Antə mji na fatə giri mafa ni ata ndzi ciju ka giri.

²⁰Maɗa' nga tə gə ya akwa tsəɗi mafakur, ata sə pəla ala gə vir laga abbər, ‘Vəi ngəni ku hara raka ala yeru, bara ala yeru vəi damwa ka yeru ndzi akwa!’

²¹Antə ga ata sə pəlari akwa ɗəffa ga, ‘Mi! I hara ka wutə maɗangkyar ngəni hang nə ri? Maɗa'na ku mti ka zhar ra apa mwala ciri, mdə ku kətə ra ka təra ka iya apa mafa, wa an yatsə maɗangkyar ngəni ri? I ku sə mbil azi shira, maɗangkyar ngəni thlata ama ri?’ ”

²²MTHLAKU, Hyel na ka Səli ta Shang akwa pəla aka mjirni abbər, “I ata haptə tsi aka durayeri damwa ka da si, ka hapta alamərna aka tsəɗiyayeri, antə da ata si ka maɗashili ar nga akwa thlimbəla ɗa, ka maɗa nga na maɗangkwi ata hila ɗa ka səntə ɗa.

²³Kuthlyayeri arɗa ata ndzi baba' nga, kuthli mwanki arɗa ata ndzi mama' nga ka wulwul nga. Da ata zuzuri akəma ga ka kəma ɗa ata di, ka fatə kalau kamnyar na gə səli. Antə ga ata sə sənda abbər I an MTHLAKU, mda aɗi na ata mbwi ɗəffari ka səkə ra, ka ɗəffari ɓzi wa.”

²⁴Mda ata mzhi dlutsə su tə soja fata akwa mpa ya? Mda ata mzhi mbulɓəla mafa akwa tsiya mjir duna ya?

²⁵MTHLAKU akwa pəla “Amma ngəni an su na ata sə hara. Mda ata sə dlutsə mafa akwa tsiya mjir duna ka dlutsə su tə soja fata akwa mpa. I ata mpa ka mji na ku mpa ka ga, kəi mbantə maɗa nga.

²⁶I ata vu ka mji na ana na giri bwani ni tsəgəi nvwa ɗa, ka hangkur mamshir mji tə da pumta akwa mpa ni wikantə ɗa. Antə shanga mji ata sənda abbər, I an MTHLAKU na mdər mbantə giri, Hyel na ka duna ar Israila na pəli giri.”