Read bura-pabir Ishaya 5 Bible Online

Ishaya 5 - bura-pabir bible

Ishaya 5

¹Kulini I ata hara ha ngəni, tsa an ha na ata kəra mdərdzi ka fakərni. Hermana ka fakərni laga, ata gar na ana ya su.

²Tsa latə fakə ni ka fwaɓəla pelayeri na akwa, ka ncita ka hwulfər anap na ɓɗakɓɗaku. Tsa latə mbwar səka na nal ata ɗəffa fakə ni, ka lamta ku laga kamnyar ntsarɓəla yimər anap ni. Tsa tamata abbər tsa ata ya anap na msəra, amma təng tsa ra ya anapər mtakəu, ɗəɗahəu.

³Apani kulini pazhirna ni akwa pəla, “Giri na mjir Urushalima ka Yahuda, nthləmta giri ala yeru beɗi na akwa daɓwa yeru ka fakərna ni.

⁴Su damwa aɗi na ku mbila tə kalkal kəi hara aka fakərna amma I aɗi hara wa ya? To kamnyar mə tə tsa aɗi ya anap na msəra wa, tar na ɗəɗahari nə ri?

⁵“Ma apani wa nggədza su tə I ata hara aka fakər anapərna ni. I ata famta mtəhəra natə I kalaktə ni kəgari ni, kəi famta kadakari, ka mwaɓi mtakəu ləkwa ka da ɓɗəmnya ni ka ntsəntsarəmta ni.

⁶I ata psi fakə ni ka kusar kəla akwa. I aɗi ata kəmta ni kamnyar ka tsa jaktə ɗəɗa kəra wa, wala tsuhu fakə ni wa. I ata zhar ka thlali ka mtəhəra hartə ni. Tsuwa I ata tsawa aka dlambayeri abbər da aɗiya tər yimi akwa fakə ni wa.”

⁷Israila an fakər anapər MTHLAKU na ka Duna ta Shang, mjir Yahuda an nfur anap tə tsa nciu akwa fakə ni, tsa ana nggatə msərakurər ɗa. Tsa tamata abbər da ata ndzi ka jirkur, amma təng da akwa hara shimnyakur ka tsi mda. Tsa tamata abbər da ata hara su na kalkal, amma təng tuwar mji na akwa ɗar bwani akira ɗa antə tsa akwa nggari.

⁸Sha ku wutə giri, giri na ana mas kəyayeri ka fakayeri ka jakəngkər ata kəra natə giri kəgari hwatu. Aɗi ata fəi wa mji ata ni ka bəbalər kəi, antə giri ata sə ndzi akwa tsəɗi ni giri shi giri.

⁹MTHLAKU na ka Duna ta Shang akwa pəla ali abbər, “Mbwayeri hang na ol'ola ɓɗakɓɗaku ata sə ndzi kula mji akwa.

¹⁰Olkur fakər anap na apa bəbalər tsa bwal kuma ata sə hamta yimər anap lita nfwarkumari daci. Antə mda ata sə wuta ampani yar fakə balang duku daci akwa kuta balang kuma ar hwulfə tə mdə thləkamta.”

¹¹Sha ku wutə giri, giri na ana thlatə ɗəɗəpə mbing ka ra bara sur sa na mwavər, ka ɓukci akwa sa su har ka yimər anap ni wikantə giri.

¹²Giri ana ɗəmhə surtsa na msəra apa guləm ka yakandi, ka kəcaikəcai, ka shwala, ka yimər anap, akwa vəi kucalər səm ka sa ar giri. Amma giri aɗi ana dzama ata kəra MTHLAKU wala mzhi nggaɓəla su tə tsa akwa harari wa.

¹³Apani kamnyar tə giri namta apa giri asəndə ni wa, tsa mwantə giri akwa tsəɗi natə giri ata ra ɗar bwani apa mafa. Antə məi an ata sə kurəmta mji ol'ola ar giri, ka thləli kuri ka mambila mji.

¹⁴Duniyar mjir mambəl ka məyir ndasə mji apani, antə tsa ku kəlar mnyari bau akwa səka ka tsa ndasəmnya ɗa. Tsa ata ndasəmnya mji ol'olər Urushalima ka mji na ndzang, ka dlamar mji na akwa wika ka hara kuraku.

¹⁵Vir nda mda ata sə kəli səliyir shanga mji na hir kəra ɗa ka kəlghəi ɗa.

¹⁶Amma mda ata hu MTHLAKU, Hyel na ka Duna ta Shang kamnyar jirkur tə tsa kəgari. Tsa ku ncaɓəla abbər tsa ana hara su na ka jirkur atar kəcəkəcəkurərni.

¹⁷Antə maɗa' təma ata sə ɓɗə kusar akwa fir tsəɗi ni apatə da ana hara akwa vəi ɓəla arɗa. Tsuwa maɗa' kwi ata sə wutə vəi ɓɗə kusar.

¹⁸Sha ku wutə giri, giri na aɗi ana mzhi ndəkə ka ɗimikur wa. Giri na ana vəkər ka thlandər abbər tsan ata vu ka giri səma akwa hara bikayeri.

¹⁹Giri ana pəla, “Ka Hyel mwa taktar ka tsa hara su tə tsa pəla tsa ata harari ka mburu wuta. Ka su tə Hyel na ɓɗakkarkara ɗəmha abbər tsa ata harari ni, hara kulini ka mburu wuta.”

²⁰Sha ku wutə giri, giri na ana pəla su na ɗimi an ɓɗaku, ka su na ɓɗaku an ɗimi. Giri na ana namtə kuthlu abbər tsan parakəu, ka namtə parakəu kuthlu. Giri ana kəta abbər su na ɗəɗahu an nənəm, ka namtə su na nənəm abbər tsa ɗəɗahəu.

²¹Sha ku wutə giri, giri na ana kəta abbər giri ɗəɗu, abbər giri masəku akwa wulər giri!

²²Sha ku wutə giri, giri na ku mula akwa sa yimər anap! Giri na mulmulari akwa gwar sur sa na mwavər!

²³Giri ana dlu sur dzəɓə mnya ka msərantə mdə na ka biku ka tsa təra kula giri ɗi ni, ka zambatə mdər jirkur.

²⁴Apani giri ata sə kura karkar apatə kədla ka kusar ana mbamtadzi tuktukku akwa u'u. Nggilanga giri ata sə hiɗamtadzi ka pukdlər giri ula ka shambar fimta, kamnyar tə giri ku nggəlar ɓəla su tə MTHLAKU na ka Duna ta Shang, na Hyelər Israila ku thlipa ala mburu.

²⁵Ngəni an su na hara tə ɗəffa MTHLAKU ku ɓzi ata kəra mjirni ni. An su na hara tə tsa kurəmta ɗa ni. Garayeri ku kənggərantədzi antə mshiyir mji mtəmta ku hartə kəra lakwayeri apa mzhiku. Amma wala apani ɗəffa MTHLAKU aɗi mtathlə wa, tsa ku zhar tsiyari tsu haptəhaptari kamnyar ɗi ɗa.

²⁶Tsa ata haptə seɗa laga aka tsəɗiyayeri na ciju. Tsa ata fifikwi ala ɗa antə da ata thlata akwa datər duniya ka da si. Ndaga ɗa ma akwa si kasha ka ufti akwa Urushalima.

²⁷Mda aɗi akwa nca ɗa na ku ghəri wa, mda aɗi na ku tsamta səlari wa. Mda aɗi akwa nca ɗa na ku heni wa, mda aɗi na akwa nggətə heni wa. Səwur mbwi kusara ɗa aɗi na mpəl wa, tsuwa kucira ɓaɓiyir ɗa aɗi na kwacahəɓəladzi wa.

²⁸Afayeri arɗa ka mnya ɗa ncwal ncwal, tsuwa mdə ku ɗəmhə laliyayeri arɗa kamnyar sha. Mpəla takwayeri arɗa ɓəɓal apa pela jinatu, antə tayayeri ar wagənər takur ɗa ana tawara apa kəwal.

²⁹Kuraka sojayeri arɗa apa nggyinggyir tsəngi na ku tsi mwaɓi ka kəta akwa təra kəgari, natə mjir mzhi dlutsari akəla ɗa aɗi wa.

³⁰Vir nda tsəɗiyayeri na dawar ɗa ata sə hara kuraku ka ɗəffu apa kərathla manda na ola ata kəra mji tə da ngkəi. Antə kəlara mdə na ha ncari ka wul tsəɗi Israila, su tə tsa ata wutari daci an kuthlu ka ɗəffə ɓzəɓza. Wala parakəu dlamba na mənggəl thlərətu ata hartə ni.