Read bura-pabir Ishaya 50 Bible Online

Ishaya 50 - bura-pabir bible

Ishaya 50

¹MTHLAKU akwa pəla, “Giri ana wuta apa I kədləmta mjirna apatə sal ana kədləmta mwalankiɗa ya? Ka ma apani kakaɗər ndəkə ni ama ri? Giri ana wuta apa I ɗələmta giri akwa mafakur apatə mda ana ɗələmta maɗa'ni ya? Awa, giri təra ləkwa mafakur kamnyar bikər giri, tsuwa kamnyar ɗimikur giri antə mdə ku kədləmta mama' giri.

²Kamnyar mə tə sakatə I ra mbantə giri I aɗi wutə mda wala nggatə kuraka mda avəi wa ri? Apa duni ni kətə ya tə I amzhi mbantə giri wa? Atar mpa daci ma I ata mzhi ulantə manda, ka shinantə thlyaghayeri ka da ndzi hamada, ka kəlfayeri na akwa mta ka shiwura kamnyar tur yimi.

³I ata mzhi namtə kutahyel ka tsa ngka mənggəl, apa dlu tsa akwa tuwa kamnyar mji na ku mti.”

⁴MTHLAKU ku na ali kyanggyar na msəra kamnyar kəi dunautə mji na ku ghəri. Tədəku ɗəɗəpa tsa ana thlentə ra ka ɗəmhə ra, kamnyar nggatə su tə tsa ata thlipa ali.

⁵MTHLAKU ku na ali sənda, antə I aɗi hara nggyarɗəkur wa wala shinadzə bwahili alari wa.

⁶I ku vəi hili ka mji dlaɓwa, sakatə da akwa ntsu shishir kumi I aɗi ngkatə wa, har da ku nggəl ra ka tiftə mtili ata kəmi.

⁷Amma Hyel ana dlar ra, antə ɗimikur tə da hara ni aɗi damitə ra wa. Apani I ku nggitə ka hamta kərna. I ku sənda abbər I aɗi ata ləkwa səli wa,

⁸kamnyar mdər pəla jirkur ka msərantə ra aɗi adzə ra. Wan ata nggitə kampiku ka iya ri? Ka mthlakari si ka yeru kəɓa. Mdər burka ra ni ama ri? Ka mthlakari səɓəla.

⁹MTHLAKU, Hyel na ka Səli ta Shang surni an ata mbuli ra, kaha, wa damwa an ata pəla I ka biku nə ri? Shanga ɗa ata titila ka sha, da ata kura apa zhaɓi tə ləma kwasəmnya.

¹⁰Shanga giri na ana thlivər MTHLAKU, ka kələngkər aka su tə buɗarni pəla, ma giri akwa mwa akwa kuthlu kula parakəu, ka giri mbərsa ka MTHLAKU, ka vəkər ka Hyelər giri.

¹¹Shanga giri na ana ɗəmhədzər kurəmta mji, su tə giri ɗəmhə ni ata sə kurəmta giri sur giri. MTHLAKU surni an ata vu ka su ngəni hara, antə giri ata ɗar bwani ka duna.