Read bura-pabir Ishaya 51 Bible Online

Ishaya 51 - bura-pabir bible

Ishaya 51

¹MTHLAKU akwa pəla abbər, Psi gir thləma giri ali, giri na akwa bara hara su kalkal, giri na akwa nu ra. Wul gir Ibrahim na kəkar giri, pela tə mdə nthləɓəla giri ata.

²Wul gir Ibrahim kəkar giri na waci, ka Saratu mwala na yaɓəla giri waci. Sakatə I kəga Ibrahim, tsa aɗi ka ɓzər wa, amma I ku vədza alari barka ka nar kəkayeri hang.

³Kamnyar I ata shiktə Sihiyona, I ata kətadzə shanga mji na akwa vəyayeri arni tə mji ndlədlamta ni. Wala tə tsəɗi ni kula yimi, I ata namtə ni ɓɗaku apa gadina, apa gadina na ɓɗaku tə I vəi akwa Eden. Antə mjir Sihiyona ata sə usa ra, ka hara har kucali ka msərakur ali.

⁴Psi gir thləm ali, mjirna, ka giri nggatə su tə I ata pəlari: I ata thlipa aka durayeri damwa, ka thlipa ala ɗa laku tə da ata səndə jirkur

⁵kulikulini I ata hara su na kalkal kəi msərantə giri, sakatə I ata mbantə ɗa abaka hara. I ka kəri an ata sə hara kuthlikur ata kəra tsəɗiyayeri ni. Diyayeri na ciju ata mnya yimi akwa sək səyirna, da ata səkə ra ka vuwur su akwa ɗəffu kəi mbantə ɗa.

⁶Haptə nca ga ahar hyel kara wul kutahyel ka gə pwi nca ga akwa duniya. Suayeri na ata kutahyel ata sə sha apa ɗer, duniya ata sə kukwahəmtadzi apa zhaɓə halhala, antə shanga mji tsuwa ata kurəmtadzi apa ciri. Amma I ata na giri mbantədzi na ba saka madi, ka hara kuthlikur ka jirkur kula vəi data.

⁷Psi gir thləm ali, giri na asəndə su na kalkal, giri na ku kəsi tsawurna akwa ɗəffa giri. Giri aɗiya thlivər kyartəkur ar mji wa, wala ka nggəl su arɗa fəi shaha giri wa.

⁸Kamnyar pərpər ata sə kwasəmnya ɗa apa zhaɓi, ka kulamnya kwasəmnya ɗa apa puwa. Amma mbantədzi tə I ata na giri ata ndzi ba saka madi, tsuwa I ata na giri nggyari su ba saka madi.

⁹Thlatə MTHLAKU kara dlar yeru! Kəthlər ka duna ga kara mbantə yeru, apatə gə hara akwa zamanayeri na təramta. Ga ku thləthlau mwaɓi manda na ɗimi duku duku, ka ntsəvəmta pwapur kutayimi na olta kwakula

¹⁰Ga an ulantə manda na ola, ka ɓəli laku ata ɗəffa yimi na zurang, ka mji tə gə pəli təramta akwa kasəla.

¹¹Antə mji tə ga ku pəli ɗa, ata ngka akwa Urushalima ka kucali, da ata ngka ka ha kucali na ola. Da ata ndəka ka ɗəffə ɓzəɓza, antə da ata ndzi ka kucali ba saka madi.

¹²MTHLAKU akwa pəla, I an mdə na ana dunautə nga. Kamnyar mə tə ga ata thlivər mdə na ata mta, wala ɓzər mdə na anggitə su wa apa kusar ri?

¹³Ga ku fwari ata kəra MTHLAKU na həntə ngə ya, na pshari vəi na amtazi, ka nci səla duniya? Kamnyar mə tə tədəku ga akwa thlivər mji na akwa na gə bwani ri, mji natə da akwa bara kəl mpika ga? Ɗəffə bwarbwarkur ar mjir na gə bwani ni ku kuri,

¹⁴kulikulini mji na akwa ɗar bwani ata msəra, da aɗi ata mtə wala ləkwa kur mtə wa, wala tur susəm wa.

¹⁵Kamnyar I an MTHLAKU na Hyelər giri, I ana nggurtə manda ka tsa mpa ka kuraku. Thləmi an MTHLAKU na ka Duna ta Shang!

¹⁶I ku pəla ala gə su tə ka gə pəla, ka ɗuwar nga ka shanggur mandaɓar tsi! I an pwi sasəlkayeri amtazi, ka nci səla duniya. Antə kulini I akwa pəla aka Urushalima, abbər, “Giri an mjirna!”

¹⁷Thlatə Urushalima, Thlatə kara thləthlata! Gə na ku sa bwani akəla MTHLAKU, bwani tə tsa na gə sakatə ɗəffari ku ɓzi. Ga ku samnya bwani ni karkar, ka ləkwa mwa mbalmbalari.

¹⁸Mdər nca ala gə laku aɗi wa, aɗi akwa nca mjir nga wala duku wa. Mda aɗi akwa nca mji tə gə kəlantə wala duku, na amzhi kəsi tsiya ga ka pwar ngə wa.

¹⁹Asarayeri ngəni suɗə ni ku si ata kəra ga: mpa ku huzamta ka hilantə tsəɗiyir nga, tsuwa mi ku ngkəi mjir nga. Antə mdər shiktə nga aɗi wala duku wa.

²⁰Ɗəffə bwarbwarkur ar MTHLAKU ku pungkərdzi ata kəra ɗa, antə mjir nga ku thləvamtadzi ka pumtadzi, akwa shanga matəngndlər lakur kutadi, da ndzi apa kimar tə dərku ngkəi.

²¹Antə psi gir thləm, giri na akwa ɗar bwani akwa Urushalima, giri na akwa mwa mbalmbalari apa giri wikəwikari,

²²MTHLAKU na Hyelər giri na ana mbuli giri akwa pəla, “Wula, I akwa kələmta ɗewa tə I hamta ala giri akwa ɗəffə bwarbwarkurərni. Mda aɗi ata jaktə vu giri akwa sa bwani ngəni na vu giri akwa mwa mbalmbalari ni kəra wa.

²³Kulini I ata hamtari aka mji na ana na giri bwani, mji na vu giri pəpəi akwa lakur kuta di ka mwa ata hila giri apa dlu giri di ni.”